ترامپ: ۋكراينامەن سيرەك كەزدەسەتىن مينەرالدار جونىندەگى كەلىسىمگە كەلەسى اپتادا قول قويىلادى

استانا. KAZINFORM – ا ق ش پرەزيدەنتى سوعىستىڭ باستالۋىنا جاۋاپكەرشىلىكتى بۇرىنعى پرەزيدەنت بايدەنگە جۇكتەدى. بۇل تۋرالى انادولى حابارلادى.

ترامپ اق ۇيدە يتاليانىڭ پرەمەر-ءمينيسترى دجوردجيا مەلونيدى قابىلداپ، رەسەي مەن ۋكراينا اراسىنداعى سوعىسقا قاتىستى سوڭعى جاعداي تۋرالى ايتتى.

ترامپ كييەۆپەن سيرەك كەزدەسەتىن مينەرالدار بويىنشا كەلىسىم اياقتالعانىن مالىمدەدى.

- بىزدە پايدالى قازبالار جونىندە كەلىسىم بار، وعان كەلەسى بەيسەنبىدە قول قويىلادى دەپ ويلايمىن. ۋكراينا بۇل كەلىسىمدى ورىندايدى دەپ ۇمىتتەنەمىز، كورە جاتارمىز. ءبىراق بۇل ماسەلە بويىنشا ۋاعدالاستىق بار، - دەدى ول.

ماسكەۋدەگى رەسەيلىك تاراپپەن جۇرگىزىلىپ جاتقان كەلىسسوزدەر تۋرالى ايتا كەلە، ترامپ وسى اپتادا ماسكەۋدەن حابار كۇتىپ وتىرعانىن جەتكىزدى.

ۋكراينا پرەزيدەنتى ۆلاديمير زەلەنسكي سوعىس ءۇشىن جاۋاپتى ما دەگەن سۇراققا ا ق ش پرەزيدەنتى بىلاي جاۋاپ قاتتى.

- زەلەنسكيدىڭ جاۋاپتى ەكەنىن بىلمەيمىن، ءبىراق بۇل سوعىس مۇلدە باستالماۋى كەرەك ەدى. مەن زەلەنسكيدى ايىپتامايمىن، ءبىراق ونىڭ وتە جاقسى جۇمىس ىستەپ جاتقانىن دا ايتا المايمىن. مەن ونىڭ جانكۇيەرى ەمەسپىن، - دەپ جاۋاپ بەردى ول.

سوعىستىڭ باستالۋىنا جاۋاپكەرشىلىكتى ا ق ش- تىڭ بۇرىنعى پرەزيدەنتى دجو بايدەنگە جۇكتەگەن ترامپ ەندى بۇل سوعىستى توقتاتۋ قاجەت ەكەنىن جانە ءوزى وسى باعىتتا جۇمىس ىستەپ جاتقانىن اتاپ ءوتتى.

- رەسەي - الدەقايدا ۇلكەن ەل، اسكەري جاعىنان قۋاتتى دەرجاۆا. ەگەر ءسىز اقىلدى بولساڭىز، بايدەندى بۇل كرەسلودا وتىرعانى ءۇشىن ايىپتاۋعا بولاتىن سوعىسقا كىرىسپەس ەدىڭىز، - دەدى ول.

ترامپ سونداي-اق يتاليانىڭ ۋكرايناداعى بىتىمگەرلىك ميسسياسىنا قاتىسۋى جونىندەگى سۇراققا دا جاۋاپ بەرىپ كەتتى.

- بۇل - يتاليانىڭ شەشىمى. مەن بىتىمگەرلىك ميسسياعا كوزقاراسىم دۇرىس، - دەپ جاۋاپ بەردى.

ايتا كەتەلىك يتاليا پرەمەر-ءمينيسترى دجوردجيا مەلوني ەۋروپا ءۇشىن تاريفتەردى تومەندەتۋگە قول جەتكىزۋ ماقساتىندا اق ۇيگە بارعان ەدى.