ترامپ ۋكرايناعا بارلىق اسكەري كومەكتى توقتاتۋعا بۇيرىق بەردى
استانا. KAZINFORM - ا ق ش پرەزيدەنتى دونالد ترامپ ۋكرايناعا اسكەري كومەكتى ەل باسشىلىعى «بەيبىتشىلىككە ادالدىعىن» كورسەتكەنگە دەيىن توقتاتۋعا بۇيرىق بەردى. بۇل ترامپتىڭ اق ءۇيدىڭ سوپاقشا كابينەتىندە ۋكراينا پرەزيدەنتى ۆلاديمير زەلەنسكيمەن داۋلاسقاننان كەيىن بىرنەشە كۇن وتكەن سوڭ بولدى، دەپ حابارلايدى BBC.
- پرەزيدەنت بەيبىتشىلىكتى جاقتايتىنىن انىق ءبىلدىردى. ءبىز ءۇشىن ارىپتەستەرىمىزدىڭ دە وسى ماقساتقا ۇمتىلعانى كەرەك. ءبىز كومەكتى توقتاتىپ، ونىڭ ماسەلەنى شەشۋگە كومەكتەسەتىنىنە كوز جەتكىزۋ ءۇشىن قايتا قاراستىرىپ جاتىرمىز، - دەپ كەلتىردى الەمدىك اقپارات اگەنتتىكتەرى مەن امەريكالىق باق اق ءۇيدىڭ رەسمي وكىلىنىڭ سوزدەرىن.
ترامپتىڭ ءوزى ازىرگە بۇل شەشىمگە قاتىستى پىكىر بىلدىرگەن جوق، اق ۇيدەن دە رەسمي اقپارات تۇسكەن جوق.
دۇيسەنبىدە «ۋكرايناعا اسكەري كومەكتى توقتاتاسىز با؟» دەگەن سۇراققا ترامپ: «ارى قاراي نە بولاتىنىن كورەمىز» دەدى.
Bloomberg جانە Fox News حابارلاۋىنشا، ءۇزىلىس ترامپ ۋكراينا باسشىلىعىنىڭ بەيبىتشىلىككە ۇمتىلىسىن تانىتقانىنا كوز جەتكىزگەنشە سوزىلادى.
- ا ق ش ۋكرايناعا قازىرگى اسكەري كومەكتىڭ بارلىعىن ترامپ ەل باسشىلارىنىڭ بەيبىتشىلىككە ادالدىق تانىتاتىنىنا قاناعاتتانبايىنشا توقتاتادى، - دەپ حابارلادى Bloomberg اق ءۇي وكىلىنىڭ ءسوزىن.
«بۇل كومەكتىڭ تۇراقتى اياقتالۋى ەمەس، بۇل ءۇزىلىس» دەپ حابارلادى Fox News اكىمشىلىك قىزمەتكەرىنە سىلتەمە جاساپ.
Bloomberg مالىمەتىنشە، بۇل شەشىم ۋكرايناعا جەتكىزىلمەگەن بارلىق امەريكالىق اسكەري تەحنيكاعا، سونىڭ ىشىندە ترانزيتتەگى نەمەسە پولشا ارقىلى وتەتىن ءترانزيتتى كۇتىپ تۇرعان قارۋعا دا قاتىستى بولادى.
حابارلانعانداي، شەشىمنىڭ ورىندالۋىن قاداعالاۋ پەنتاگون باسشىسى پيت حەگسەتكە جۇكتەلگەن.
دۇيسەنبى كۇنى كەشكە Wall Street Journal باسىلىمى ا ق ش- تىڭ قازىرگى جانە بۇرىنعى شەنەۋنىكتەرىنە سىلتەمە جاساي وتىرىپ حابارلاعانىنداي، ترامپ اكىمشىلىگى ۋكرايناعا جاڭا قارۋ-جاراق ساتۋدى قارجىلاندىرۋدى توقتاتقانىن جانە كيەۆتىڭ رەسەيلىك كۇشتەرگە قارسى تۇرۋ قابىلەتىنە قاۋىپ توندىرەتىن ا ق ش قويمالارىنان جەتكىزىلىمدەردى توقتاتۋدى قاراستىرىپ جاتىر.
سوڭعى اپتالاردا اق ءۇي سىرتقى كومەكتى توقتاتقان كەزدە جاڭا جەتكىزىلىمدەردى قارجىلاندىرۋ ءىس جۇزىندە توقتاتىلدى، دەپ جازدى باسىلىم، وسى ارادا ۋكرايناعا نەگىزگى قارۋ-جاراق جەتكىزۋ ارناسىن جابۋعا ىقتيمال قادامدار ترامپ پەن زەلەنسكي اراسىنداعى كيكىلجىڭنەن بىرنەشە كۇن وتكەن سوڭ جاسالدى.
مەملەكەتتىك حاتشى ماركو رۋبيو بۇعان دەيىن ۋكرايناعا جەتكىزىلىمدەردى سىرتقى كومەككە تىيىم سالۋ تۋرالى بۇيرىققا قول قويعان، ءبىراق مەملەكەتتىك دەپارتامەنتتىڭ جوعارى لاۋازىمدى قىزمەتكەرى پيتەر ماروككو كييەۆكە كومەكتىڭ كەلۋىنە رۇقسات بەرۋ ءۇشىن پەنتاگونعا قاجەتتى حات جىبەرگەن جوق، دەدى WSJ اڭگىمەلەسۋشىلەرى.
امەريكالىق شەنەۋنىكتەردىڭ ايتۋىنشا، جاڭا اسكەري جەتكىزىلىمدەر بولماسا، ۋكراينانىڭ رەسەيگە قارسى سوعىستى قازىرگى قارقىنمەن جالعاستىرۋ ءۇشىن قارۋ-جاراعى جىلدىڭ ورتاسىنا دەيىن جەتكىلىكتى بولۋى مۇمكىن. بۇل ترامپتىڭ اق ۇيگە ورالعانعا دەيىن كيەۆكە قارۋ- جاراق جەتكىزۋدى كۇرت ارتتىرعان كوبىنە بايدەن اكىمشىلىگىنىڭ ارقاسىندا بولىپ وتىر، دەپ جازدى WSJ.
بۇعان دەيىن ترامپ پەن زەلەنسكي نە تۋرالى سويلەسكەنىن جازعان بولاتىنبىز.
