ترامپ كانادانىڭ قارسى تاريفتەرىنە جاۋاپ بەردى

استانا. KAZINFORM - ا ق ش پرەزيدەنتى دونالد ترامپ كانادا پرەمەر- ءمينيسترى تريۋدونى تاعى دا «گۋبەرناتور» دەپ اتاپ، كانادالىق يمپورتقا بۇرىن ەنگىزىلگەن 25 پايىزدىق باج سالىعىنان كەيىن كانادانىڭ اينا تاريفىنە الىمدار قولدانۋمەن قورقىتتى، دەپ حابارلايدى DW اقپارات اگەنتتىگى.

ا ق ش پرەزيدەنتى دونالد ترامپ كانادا پرەمەر- ءمينيسترى دجاستين تريۋدوعا كانادا يمپورتتىق امەريكاندىق تاۋارلارعا باج سالىعىن ەنگىزەتىن بولسا، يمپورتتىق باج سالىعىن ودان ءارى كوبەيتەمىز دەپ سەس كورسەتتى.

- ءوتىنىش، كانادا گۋبەرناتورى تريۋدوعا ا ق ش- قا جاۋاپ تاريفتەرىن ەنگىزگەن كەزدە ءبىزدىڭ اينا تاريفتەرىمىز بىردەن سول سوماعا وسەتىنىن ءتۇسىندىرىڭىزشى! - دەپ جازدى ول سەيسەنبى، 4-ناۋرىز كۇنى كەشكە ءوزىنىڭ Truth Social پلاتفورماسىندا.

سول كۇنى تريۋدو ا ق ش- تىڭ كۇشىنە ەنگەن تاريفتەرىن تالقىلاۋ ءۇشىن وتتاۆادا وتكەن باسپا ءسوز كونفەرەنتسياسىندا دونالد ترامپ باستاعان ساۋدا داۋىندا اگرەسسيۆتى پوزيتسيا ۇستاندى.

- ا ق ش ءوزىنىڭ ەڭ جاقىن سەرىكتەسى جانە وداقتاسى، ەڭ جاقىن دوسى كاناداعا قارسى ساۋدا سوعىسىن باستادى… - دەپ مالىمدەدى كانادا پرەمەر-ءمينيسترى.

ول ا ق ش پرەزيدەنتىنە جەكە سويلەگەن سوزىندە:

- دونالد، سەن وتە اقىلدى جىگىت بولساڭ دا، بۇل اقىماقتىق، - دەدى.

وتتاۆا ا ق ش- تىڭ ارەكەتتەرىنە قارسى سوتقا جۇگىنبەك

دجاستين تريۋدونىڭ تۇسىندىرۋىنشە، سەيسەنبىدەن باستاپ كانادا امەريكالىق تاۋارلارعا، جالپى قۇنى 30 ميلليارد كانادالىق دوللار بولاتىن ونىمدەرگە 25 پايىزدىق باج سالىعىن ەنگىزەدى، ال قالعان 125 ميلليارد كانادالىق دوللار كولەمىندەگى تاۋارلارعا سالىناتىن باج سالىعى 21 كۇننەن كەيىن كۇشىنە ەنەدى.

سونىمەن قاتار، ول وتتاۆا دۇنيەجۇزىلىك ساۋدا ۇيىمىنا ۆاشينگتونعا قارسى سوتقا شاعىمداناتىنى ايتتى.

تريۋدو سونداي-اق ترامپتىڭ «كانادا ەكونوميكاسىن كۇيرەتۋدى» قالايتىنىن، ويتكەنى بۇل ونىڭ كانادانى «اننەكسيالاۋىن» جەڭىلدەتەتىنىن مالىمدەدى. كانادانىڭ پرەمەر- ءمينيسترى «بۇل ەشقاشان بولمايدى» جانە كانادا «ەشقاشان 51-مەملەكەت بولمايدى» دەپ قوستى - سوڭعى اپتالاردا ترامپ ۇلكەن ەلدىڭ ا ق ش قۇرامىنا قوسىلۋ ويىن بىرنەشە رەت العا تارتتى. تريۋدو سونىمەن قاتار تاريفتەردى فەنتانيل داعدارىسىمەن اقتاۋ «مۇلدەم جالعان، مۇلدەم نەگىزسىز، مۇلدەم جاڭىلىستىراتىن» ەكەنىن قوسىپ ءوتتى.

ترامپ پەن تريۋدو اراسىنداعى «سىپايىلىقپەن الماسۋدان» كەيىن ا ق ش ساۋدا ءمينيسترى گوۆارد ليۋتنيك امەريكالىق تەلەديدار ەفيرىندە كانادا مەن مەكسيكاداعى ارىپتەستەرىمەن «كۇنى بويى تەلەفونمەن سويلەسكەنىن» حابارلادى.

- مەن ونىڭ (دونالد ترامپ. — رەد. ) كەلىسىمگە كەلەتىنىنە سەنەمىن، - دەدى ليۋتنيك.

ول قورىتىندى 5-ناۋرىزدا جاريالاناتىنىن قوسىپ ءوتتى.

ەسكە سالا كەتسەك، سەيسەنبى كۇنى ا ق ش پرەزيدەنتى دونالد ترامپتىڭ مەكسيكا مەن كانادادان يمپورتتالاتىن تاۋارلارعا 25 پايىزدىق جانە قىتاي تاۋارلارىنا 20 پايىزدىق جاڭا باج سالىعى كۇشىنە ەندى.

زارينا تۋعانبايەۆا