ترامپ امەريكادا «بوستاندىق كۇنىن» جاريالادى
استانا. KAZINFORM - دونالد ترامپ رەسمي تۇردە تاريفتەردى كوتەرۋگە شاقىرار الدىندا الەۋمەتتىك جەلىدەگى جازباسىندا بۇگىن ەلدە «بوستاندىق كۇنى» ەكەنىن مالىمدەدى، دەپ حابارلايدى Newsmax.
- امەريكادا بوستاندىق كۇنى! - دەپ حابارلادى ول Truth الەۋمەتتىك جەلىسىندە.
2-ءساۋىر «بوستاندىق كۇنى» بولدى جانە امەريكا قۇراما شتاتتارى بۇدان بىلاي باسقا ەلدەرمەن ساۋدا تەڭگەرىمىنىڭ بۇزىلۋىنا جول بەرمەيتىنىن ءبىلدىردى.
وتكەن اپتادا ترامپ بەيسەنبىدەن باستاپ بارلىق اۆتوموبيل يمپورتىنا %25 باج سالىعىن جاريالادى، ال بولات پەن اليۋمينيگە %25 جاھاندىق تاريفتەر كۇشىنە ەندى. ناۋرىزدا قىتايدىڭ بارلىق تاۋارىنا %20 تاريف ەنگىزىلگەن ەدى، بۇعان بەيجىڭ جاۋاپ رەتىندە ءوز تاريفتەرىن ىسكە قوستى.
ترامپ اق ۇيدە ءوز جوسپارىن بايانداۋ ءۇشىن شىعىس ۋاقىتى بويىنشا ساعات 16.00-گە «امەريكانى قايتادان ۇلى ەلگە اينالدىرامىز» اتتى باسپا ءسوز ءماسليحاتىن بەلگىلەدى.
بۇدان بۇرىن پرەزيدەنت دونالد ترامپ ا ق ش-تىڭ بارلىق ساۋدا سەرىكتەستەرى ءۇشىن %10 تاريفتى جانە ءوزىنىڭ «امەريكا ءبىرىنشى كەزەكتە» اتتى باعدارلاماسى اياسىندا وزگە ونداعان مەملەكەتكە بارلىق سالانى قامتيتىن جوعارى باج سالىعىن ەنگىزۋدى قاراستىراتىن پاكەتىن ۇسىنعانىن جازدىق.
جوعارى باج سالىعىنا تاپ بولعان قىتايدىڭ ساۋدا مينيسترلىگى بۇل شەشىمگە قاتاڭ قارسىلىق ءبىلدىرىپ، ءوز مۇددەسىن قورعاۋ ءۇشىن قاجەتتى قارىمتا شارالار قابىلدايتىنىن مالىمدەدى.
