ترامپ امەريكا قۇراما شتاتتارىنىڭ رەسمي ءتىلىن جاريالادى
استانا. KAZINFORM - بۇعان دەيىن اعىلشىن تىلىنە مۇنداي مارتەبە بەلگىلى ءبىر شتاتتاردا عانا بەرىلگەن، دەپ جازادى BBC.
ا ق ش پرەزيدەنتى دونالد ترامپ ەل تاريحىندا العاش رەت اعىلشىن ءتىلىن فەدەرالدى دەڭگەيدە رەسمي ءتىل دەپ تانۋ تۋرالى جارلىققا قول قويدى.
ا ق ش تاريحىندا بارلىق نەگىزگى قۇجات، سونىڭ ىشىندە كونستيتۋتسيا مەن تاۋەلسىزدىك دەكلاراتسياسى اعىلشىن تىلىندە جازىلعانىمەن، ەلدە ەشقاشان زاڭ شىعارۋ دەڭگەيىندە مۇنداي رەسمي ءتىل بولعان ەمەس. اعىلشىن تىلىنە رەسمي مارتەبە بەرۋدى جاقتايتىن ProEnglish توبىنىڭ مالىمەتىنشە، اعىلشىن ءتىلى ا ق ش-تىڭ 50 شتاتىنىڭ 32 سىندە رەسمي ءتىل رەتىندە تانىلعان.
- اعىلشىن ءتىلىن امەريكا قۇراما شتاتتارىنىڭ رەسمي ءتىلى رەتىندە تانۋ قاجەتتىلىگى بۇرىننان بار، - دەلىنگەن جارلىق ماتىنىندە.
ول سونداي-اق ا ق ش-تا 350 دەن استام ءتىل قولدانىلاتىنىن مويىنداعانىمەن، ورتاق ءتىل «ۇلتتىق بىرلىككە ىقپال ەتەتىنىن» ايتادى.
ۇكىمەتتىڭ 2019 -جىلعى دەرەكتەرىنە سايكەس، ا ق ش-تىڭ 68 ميلليونعا جۋىق تۇرعىنى ۇيىندە اعىلشىن تىلىندە سويلەمەگەن. ولاردىڭ كوپشىلىگى وزگە ءتىلدى قولدانعان. 40 ميلليوننان استام تۇرعىن يسپان تىلىندە سويلەستى دەگەن دەرەك بار.
ترامپ بۇعان دەيىن بايدەن اكىمشىلىگىنىڭ يمميگراتسيالىق ساياساتىن سىناعان كەزدە اعىلشىن ءتىلىن رەسمي ءتىل دەپ جاريالاۋ مۇمكىندىگىن تالقىلاعان بولاتىن.
- ءبىزدىڭ ەلدە بۇكىل ەل بويىنشا بىردە- ءبىر ساراپشى سويلەي المايتىن تىلدەر بار. بۇل - ەسسىزدىك، ءبىزدىڭ ەلدە ەشكىم ەستىمەگەن تىلدەر بار. قورقىنىشتى نارسە، - دەدى ترامپ 2024 -جىلى رەسپۋبليكالىق پارتيانىڭ سەزىندە.
ترامپ ءوزىنىڭ جاڭا بۇيرىعىمەن 2000 -جىلعى بيلل كلينتوننىڭ فەدەرالدى اگەنتتىكتەر مەن فەدەرالدى بيۋدجەتتەن كومەك الاتىن بارلىق ۇيىمدى اعىلشىن ءتىلىن بىلمەيتىن ازاماتتارعا اۋدارماشىلىق كومەك كورسەتۋدى تالاپ ەتەتىن بۇيرىعىن جويدى. ەندى باسقا تىلدەردە قىزمەت كورسەتۋدى قالايتىنىن اگەنتتىكتەر وزدەرى شەشەدى.
ءبىر ايدان استام ۋاقىت بۇرىن اق ۇيگە ورالعان ترامپ ونداعان بۇيرىققا قول قويدى.
ولاردىڭ كوپشىلىگى ونىڭ «امەريكانى قايتادان ۇلى ەتۋ» ۇرانىنا ەنگەن كونسەرۆاتيۆتى دۇنيەتانىمىن كورسەتەدى.
