ترامپ ا ق ش پرەزيدەنتى رەتىندەگى العاشقى سوزىندە نە تۋرالى ايتتى
استانا. KAZINFORM - ا ق ش- تىڭ 47- پرەزيدەنتى دونالد ترامپ ۆاشينگتوندا ءوتىپ جاتقان ۇلىقتاۋ راسىمىندە ءسوز سويلەپ، امەريكانىڭ التىن عاسىرى باستالعانىن مالىمدەدى. ول وسى كۇننەن باستاپ مەملەكەتتىڭ گۇلدەنە بەرەتىنىن ايتتى.

جاڭا پرەزيدەنت سوزىندە يمميگراتسيا مەن ەكونوميكاعا نازار اۋداراتىن «ءبىرقاتار بۇيرىقتارعا» قول قوياتىنىن جانە «ەلدىڭ وڭتۇستىك شەكاراسىندا ۇلتتىق توتەنشە جاعداي» جاريالايتىنىن اتاپ ءوتتى.
ترامپ يمميگراتسيالىق ساياساتتىڭ كۇشەيەتىنىن جانە زاڭسىز يمميگرانتتاردى «كەلگەن جەرلەرىنە» دەپورتاتسيالاۋدى باستايتىنىن جەتكىزدى.
- ءبىز «مەكسيكادا قالۋ» ساياساتىن قالپىنا كەلتىرەمىز. مەن باسىپ الۋ جانە بوساتۋ سياقتى فاكتورلاردى جويامىن. سونىمەن بىرگە قىلمىسپەن، لاڭكەستىك ۇيىمدارمەن دە كۇرەسەمىز.
1798 - جىلعى شەتەلدىك جاۋلار تۋرالى زاڭعا جۇگىنە وتىرىپ، مەن ءبىزدىڭ ۇكىمەتتى ا ق ش- قا، سونىڭ ىشىندە ءبىزدىڭ قالالارىمىز بەن قالا ماڭىنداعى ەلدى مەكەندەرگە جويقىن قىلمىس اكەلەتىن بارلىق شەتەلدىك باندالار مەن قىلمىستىق جەلىلەردىڭ باسشىلارىن جويۋ ءۇشىن قۇقىق قورعاۋ ورگاندارىنىڭ تولىق كۇشىن پايدالانۋعا باعىتتايمىن، - دەدى ترامپ.
ول سوزىندە ا ق ش- تى قاۋىپ- قاتەر مەن باسىپ كىرۋدەن قورعاۋدان ارتىق جاۋاپكەرشىلىك جوق ەكەنىن جانە ءدال سولاي ىستەيتىنىن ايتتى.
ونىڭ سوزىنشە، مينيسترلەر كابينەتىنىڭ مۇشەلەرى رەكوردتىق ينفلياتسيانى جەڭۋ جانە شىعىندار مەن باعالاردى جىلدام تومەندەتۋ ءۇشىن قولدارىندا بار بارلىق كۇشتى جۇمىلدىرۋدا. ينفلياتسيا داعدارىسى ەنەرگيانىڭ كوپ جۇمسالۋى مەن قىمباتتاۋىنان تۋىندادى.
ترامپ بۇگىن ەلدە «ەنەرگەتيكالىق توتەنشە جاعداي» جاريالاۋدى جوسپارلاپ وتىر. امەريكا تاعى دا الەمدەگى ەڭ كوپ مۇناي مەن گازعا يە يندۋستريالدى ەلگە اينالادى.
- ءبىز باعانى تومەندەتەمىز، ستراتەگيالىق رەزەرۆتەرىمىزدى قايتادان قۋاتقا تولتىرامىز جانە امەريكالىق ەنەرگيانى بۇكىل الەمگە ەكسپورتتايمىز. قايتادان باي ەل بولامىز، بۇعان اياعىمىزدىڭ استىنداعى «سۇيىق التىن» كومەكتەسەدى، - دەدى جاڭا پرەزيدەنت.
دونالت ترامپ «جاسىل جاڭا مامىلە» مەن ەلەكتروموبيل مانداتىن توقتاتاتىنىن جانە امەريكانىڭ ۇلى اۆتوموبيل وندىرۋشىلەرىنە بەرگەن ۋادەسىن ورىندايتىنىن اتاپ ءوتتى.
- مەن امەريكالىق جۇمىسشىلار مەن وتباسىلاردى قورعاۋ ءۇشىن بۇكىل ساۋدا جۇيەسىن رەفورمالاۋعا دەرەۋ كىرىسەمىن، - دەدى سودان سوڭ.
ا ق ش باسشىسى امەريكالىق ازاماتتارعا سالىق سالۋدىڭ ورنىنا، ءوز ازاماتتارىن بايىتۋ ءۇشىن شەت ەلدەرگە سالىق سالاتىنىن ايتتى. وسى ماقساتتا قازىناعا بارلىق تاريفتەر مەن الىمداردى جينايتىن سىرتقى كىرىستەر قىزمەتىن جاساقتاماق.
- امەريكالىق ارمان جاقىندا ورالادى جانە فەدەرالدى ۇكىمەتىمىزدىڭ سەنىمى مەن تيىمدىلىگىن قالپىنا كەلتىرۋ ءۇشىن بۇرىن-سوڭدى بولماعانداي گۇلدەيدى.
مەن سونداي-اق بارلىق ۇكىمەتتىك سەنزۋرانى دەرەۋ توقتاتۋ جانە امەريكادا ءسوز بوستاندىعىن قالپىنا كەلتىرۋ تۋرالى بۇيرىققا قول قويامىن، - دەدى ترامپ.
ول «بۇدان بىلاي امەريكا قۇراما شتاتتارى ۇكىمەتىنىڭ رەسمي ساياساتى تەك ەكى جىنىس - ەركەك پەن ايەل بولۋى كەرەك» دەگەندى دە قوستى.
پرەزيدەنت الەم بۇرىن-سوڭدى كورمەگەن ەڭ قۋاتتى ارميانى قۇرۋدى كوزدەپ وتىر.
- ءبىز ءوز جەتىستىگىمىزدى تەك جەڭگەن شايقاستارىمىزبەن عانا ەمەس، سونىمەن بىرگە ءبىز اياقتاعان سوعىستارمەن دە ولشەيتىن بولامىز. مەن بىتىمگەرشىلىك پەن بىرىكتىرۋشى بولعانىمدى ماقتان تۇتامىن. ماسەلەن، كۇنى كەشەگى جاعدايدى قۋانا حابارلايمىن. تاياۋ شىعىستاعى كەپىلگە الىنعاندار ۇيلەرىنە، وتباسىلارىنا ورالۋدا. امەريكا جەر بەتىندەگى ەڭ ۇلى، ەڭ قۋاتتى، ەڭ قۇرمەتتى مەملەكەت رەتىندە ءوزىنىڭ لايىقتى ورنىن، الەمنىڭ تاڭدانىسىن قايتارادى، - دەدى ترامپ.
ول جاقىن ارادا «مەكسيكا شىعاناعىنىڭ» اتاۋىن «امەريكا شىعاناعى» دەپ وزگەرتىپ، ا ق ش- تى تاريفتەر مەن تالانتتار ارقىلى وتە باي ەتكەن 25- پرەزيدەنت ۋيليام ماككينليدىڭ داڭقىن قايتارۋدى كوزدەپ وتىر.
ترامپ پاناما كانالىنىڭ اقىماقتىقپەن پاناماعا بەرىلگەنىن اتاپ ءوتتى. امەريكا قۇراما شتاتتارى جوباعا بۇرىنعىدان دا كوپ اقشا جۇمسادى جانە پاناما كانالىن سالۋ كەزىندە 38000 ادامنىڭ ءومىرىن قيدى.
ونىڭ پايىمىنشا، بۇل - ەشقاشان بولماۋى ءتيىس مامىلە. پاناما كەلىسىمدەردى بۇزدى جانە امەريكالىق كەمەلەرگە، سونىڭ ىشىندە امەريكا قۇراما شتاتتارىنىڭ اسكەري- تەڭىز كۇشتەرىنە دەگەن كوزقاراسى ادىلەتسىز.
- بىرىنشىدەن، بۇگىن مەن امەريكا حالقىنا تاريح، ەل، ەڭ ۇلى وركەنيەت تالاپ ەتەتىن باتىلدىق پەن كۇش- قۋاتپەن قايتا ارەكەت ەتەتىن ۋاقىت كەلدى دەپ ۇندەۋ جولدايمىن. ءبىز حالقىمىزدى جاڭا جەڭىستەر مەن تابىستارعا جەتەلەيتىن بولامىز.
وركەندەۋىن ارتتىرىپ، جەرىن كەڭەيتىپ، قالالارىن سالىپ، ءۇمىتىمىزدى اقتاپ، تۋىمىزدى جاڭا كورىكتى كوكجيەكتەرگە جەلبىرەتەتىن ەل بولامىز. ءبىز امەريكالىق عارىشكەرلەردى ۇشىرۋ ارقىلى «جۇلدىزدارعا» اشىق بارلاۋىمىزدى جالعاستىرامىز.
امبيتسيا - ۇلى حالىقتىڭ قان تامىرى. ءدال قازىر ءبىزدىڭ ۇلت باسقالاردان دا ءورشىل، بىزدەي حالىق جوق، - دەدى دونالت ترامپ.
پرەزيدەنت ءوزىنىڭ تاريحي- ساياسي ورالۋى تۋرالى دا اتاپ ءوتتى.
- مەنىڭ قازىر سىزدەردىڭ الدارىڭىزدا تۇرعانىم - بىردەڭەنى ىستەۋ مۇمكىن ەمەس دەگەنگە ەشقاشان سەنبەۋ كەرەك ەكەندىگىنىڭ دالەلى. ءبىزدىڭ ەلىمىزدى ءبىزدىڭ قۇقىقتارىمىز بەن بوستاندىقتارىمىز ءۇشىن قولىندا بارىن بەرگەن پاتريوتتاردىڭ ۇرپاقتارى قۇردى جانە جاساقتادى. ولار بىرىگىپ تەمىر جول سالىپ، ءزاۋلىم عيماراتتار تۇرعىزدى، ۇلكەن تاس جولدار سالىپ، ەكى دۇنيەجۇزىلىك سوعىستان امان ءوتىپ، فاشيزم مەن كوممۋنيزمدى تالقانداپ، كەز كەلگەن قيىندىقتى جەڭىپ شىقتى، - دەدى ول.
سونىمەن قاتار حالىق امەريكا تاريحىنداعى ەڭ ۇلى ءتورت جىلدىقتىڭ تابالدىرىعىندا تۇرعانىن جانە ولار بىرگە امەريكانى قالپىنا كەلتىرەتىنىن جەتكىزدى.
- مەن سەندەرمەن بىرگەمىن، سەندەر ءۇشىن كۇرەسەمىن. مەن سەندەر ءۇشىن جەڭەمىن. ءبىز بۇرىن- سوڭدى بولماعانداي جەڭەمىز. ءبىزدىڭ التىن عاسىرىمىز ەندى عانا باستالدى. بارلىقتارىڭىزعا راحمەت! - دەپ اياقتادى ا ق ش- تىڭ جاڭا پرەزيدەنتى ءسوزىن.
ايتا كەتەيىك، قاسىم- جومارت توقايەۆ دونالد ترامپتى قىزمەتىنە رەسمي تۇردە كىرىسۋىمەن قۇتتىقتادى.