ترامپ ا ق ش پەن قىتاي اراسىنداعى كەلىسسوزدەردە «ۇلكەن ىلگەرىلەۋ» بولعانىن مالىمدەدى
استانا. KAZINFORM - شۆەيتساريادا وتكەن كەلىسسوزدەر بارىسىندا ا ق ش پەن قىتاي «تولىق قايتا جۇكتەۋ» جونىندە كەلىستى، دەپ مالىمدەدى ا ق ش پرەزيدەنتى دونالد ترامپ. ول كەڭەسۋلەردىڭ العاشقى كۇنىن «وتە جاقسى» دەپ اتادى، دەپ حابارلايدى BBC اگەنتتىگى.
- كوپ نارسەنى تالقىلادىق، كوپتەگەن ماسەلەلەر بويىنشا كەلىسىمگە كەلدىك. ۇلكەن ىلگەرىلەۋشىلىككە قول جەتكىزدىك، - دەپ جازدى ترامپ ءوزىنىڭ Truth Social الەۋمەتتىك جەلىسىندە، الايدا ناقتى نە تۋرالى ەكەنىن ناقتىلامادى.
ا ق ش پەن قىتاي دەلەگاتسيالارى بۇل دەمالىس كۇندەرى جەنيەۆادا ەكى كۇندىك كەلىسسوزدەر وتكىزىپ جاتىر. ماقساتى - ترامپ ءساۋىر ايىنىڭ باسىندا باستاعان ساۋدا سوعىسىن جەڭىلدەتۋ. ونىڭ باستاماسىمەن ا ق ش قىتاي تاۋارلارىنا سالىناتىن كەدەندىك تاريفتەردى كۇرت كوتەرگەن ەدى. بۇعان جاۋاپ رەتىندە پەكين دە تاريفتەردى ارتتىردى. ناتيجەسىندە سالىق مولشەرى %100 دان اسىپ، ەكى ەل اراسىنداعى ساۋدا ءىس جۇزىندە توقتاپ قالعان.
Reuters اگەنتتىگىنىڭ حابارلاۋىنشا، سەنبى كۇنى وتكەن دەلەگاتسيالار كەزدەسۋى سەگىز ساعاتقا سوزىلىپ، جەكسەنبى كۇنى تاڭەرتەڭ جالعاسادى. بۇل - ساۋدا سوعىسى باستالعالى بەرى قوس ەلدىڭ جوعارى لاۋازىمدى وكىلدەرىنىڭ العاشقى بەتپە-بەت كەزدەسۋى.
بۇعان دەيىن ترامپ اق ءۇيدىڭ «روزالار باعى» الاڭىندا مالىمدەمە جاساپ، ا ق ش- تىڭ جاڭا تاريفتىك ساياساتىن جاريالاعان ەدى.
ول الدىمەن قىتايعا سالىناتىن تاريفتەردى %125 عا، كەيىن %145 عا دەيىن كوتەردى. ءوز كەزەگىندە قىتاي ا ق ش تاۋارلارىنا تاريفتى %125 عا دەيىن ارتتىردى.
بۇعان دەيىن حابارلانعانداي، قىتاي تاۋارلارىن ا ق ش باج سالىعىن اينالىپ ءوتۋ ءۇشىن وڭتۇستىك كورەيا ءونىمى رەتىندە كورسەتىپ جاتىر.
