تراكتورشى-ماشينيست كۋالىگىن قالاي الۋعا بولادى

قۇجاتتى ەلەكتروندىق ليتسەنزيالاۋ پورتالى ارقىلى ونلاين نەمەسە جەرگىلىكتى مەملەكەتتىك ورگانعا جۇگىنۋ ارقىلى راسىمدەۋگە بولادى. بۇل تۋرالى اباي وبلىسى اكىمدىگىنىڭ باسپا ءسوز قىزمەتى حابارلادى.

تراكتور مەن وزدىگىنەن جۇرەتىن ارنايى تەحنيكانى باسقارۋ ءۇشىن كادىمگى جۇرگىزۋشى كۋالىگى جەتكىلىكسىز. وعان تراكتورشى-ماشينيست كۋالىگى قاجەت.

قانداي قۇجاتتار قاجەت؟

كۋالىك الۋعا ءوتىنىش بەرمەس بۇرىن مىنا قۇجاتتاردى دايىنداۋ كەرەك:

ارنايى وقۋ كۋرسىن اياقتاعانى تۋرالى كۋالىك نەمەسە «اۋىل شارۋاشىلىعىن مەحانيكالاندىرۋ» ماماندىعى بويىنشا ديپلوم؛

كولىك قۇرالىن باسقارۋعا جارامدىلىعىن راستايتىن № 073/ۋ نىسانىنداعى مەديتسينالىق انىقتاما؛

مەملەكەتتىك باج تولەنگەنىن راستايتىن قۇجات؛

3,5 × 4,5 س م فوتوسۋرەت.

مەملەكەتتىك باج مولشەرى - 0,5 ا ە ك.

كۋالىكتى ونلاين قالاي راسىمدەۋگە بولادى؟

قۇجاتتى elicense.kz ەلەكتروندىق ليتسەنزيالاۋ پورتالى ارقىلى الۋعا بولادى. ول ۇشىن:

پورتالعا ەتسق نەمەسە eGov Mobile قولدانباسىنداعى QR كود ارقىلى كىرىڭىز.

ىزدەۋ جولاعىنا «تراكتورلاردى جانە ولاردىڭ بازاسىندا جاسالعان ءوزى جۇرەتىن شاسسيلەر مەن مەحانيزمدەردى باسقارۋ قۇقىعىنا كۋالىكتەر بەرۋ» قىزمەتىنىڭ اتاۋىن ەنگىزىڭىز.

قاجەتتى قىزمەتتى تاڭداپ، ءوتىنىشتى تولتىرىڭىز جانە سۇرالعان قۇجاتتاردىڭ ەلەكتروندىق كوشىرمەلەرىن تىركەڭىز.

وتىنىشكە ە س ق ارقىلى قول قويىپ، جىبەرىڭىز.

ءوتىنىش پەن قۇجاتتار تەكسەرىلگەننەن كەيىن كۋالىك ەكى جۇمىس كۇنى ىشىندە دايىندالادى.

كۋالىكتى ونلاين راسىمدەۋ مۇمكىندىگى بولماسا، تۇرعىلىقتى جەرىڭىزدەگى جەرگىلىكتى مەملەكەتتىك ورگاننىڭ اۋىل شارۋاشىلىعى بولىمىنە جۇگىنۋگە بولادى.

ەسكە سالايىق، بۇعان دەيىن جۇرگىزۋشى كۋالىگىنە ەمتيحانعا eGov ارقىلى جازىلۋعا بولاتىنىن جازعان ەدىك.