ترامپ يزرايلدىڭ يرانعا سوققى بەرۋىنە قارسى – ب ا ق

يزرايل پرەمەر-ءمينيسترى بينيامين نەتانياحۋ يرانعا قارسى اۋقىمدى اسكەري وپەراتسيانى 10-11-قازاندا وتكىزۋدى كوزدەگەن. ا ق ش پرەزيدەنتى دونالد ترامپ 3-قاراشادا وتەتىن كونگرەسس سايلاۋىنا دەيىن مۇنداي اسكەري قيمىلداردى قايتا باستاۋعا قارسى بولدى.

The Times of Israel باسىلىمىنىڭ حابارلاۋىنشا، يزرايل اسكەرى يراننىڭ يادرولىق نىساندارىنا، مەملەكەتتىك مەكەمەلەر مەن ەلەكتر ستانسالارىنا، سونداي-اق باسقا دا ازاماتتىق نىساندارعا بىرنەشە كۇن اۋەدەن سوققى جاساۋدى كوزدەگەن. جاڭا وپەراتسيانىڭ اۋقىمى مەن قارقىنى بيىل اقپاندا ا ق ش پەن يزرايلدىڭ يرانعا بىرلەسىپ جاساعان سوققىلارىنان دا اسىپ تۇسۋگە ءتيىس ەدى.

ا ق ش پرەزيدەنتى ارالىق سايلاۋ قارساڭىندا اسكەري وپەراتسيا وتكىزۋگە قولداۋ بىلدىرمەگەن. ال جوسپارلانعان سوققىلارعا امەريكالىق اسكەردىڭ تىكەلەي قاتىسۋى كوزدەلگەن-كوزدەلمەگەنى ازىرگە بەلگىسىز.

الداعى اپتالاردا اسكەري قيمىلدار قايتا باستالۋى مۇمكىن. مۇنداي جاعدايدىڭ ورىن الۋىن دەرەككوز جوققا شىعارمايدى.

باسىلىمنىڭ مالىمەتىنشە، يزرايل جاڭا بارلاۋ دەرەكتەرىن ەسكەرە وتىرىپ، يران اۋماعىنداعى نىسانداردىڭ جاڭارتىلعان ءتىزىمىن ا ق ش- قا ۇسىنعان. وعان بۇعان دەيىنگى اسكەري وپەراتسيا كەزىندە سوققى جاسالماعان ازاماتتىق ينفراقۇرىلىم نىساندارى دا ەنگىزىلگەن.

ۆاشينگتون مەن تەل-اۆيۆ اراسىنداعى كەلىسپەۋشىلىكتەر تۋرالى اقپارات ەكى ەلدىڭ اسكەري باسشىلىعى كەلىسسوزدەردى جالعاستىرىپ جاتقان تۇستا جاريالاندى.

19-قازاندا ا ق ش قورعانىس ءمينيسترى پيت حەگسەت يزرايلگە الدىن الا جاريالانباعان ساپارمەن بارىپ، نەگيەۆ شولىندەگى ۋۆدا اۋە بازاسىندا بينيامين نەتانياحۋمەن كەزدەستى.

يزرايل پرەمەر-ءمينيسترىنىڭ وكىلى دورون شپيلمان كەزدەسۋدىڭ وتكەنىن راستاپ، تاراپتار ايماقتاعى قاۋىپ-قاتەردى جانە قورعانىس پەن شابۋىل باعىتىنداعى ا ق ش-يزرايل ىنتىماقتاستىعىن تالقىلاعانىن اتاپ ءوتتى.

ونىڭ سوزىنشە، حەگسەت يزرايلگە ا ق ش- تىڭ بىرنەشە مىڭ اسكەري قىزمەتكەرىن ورنالاستىرۋعا مۇمكىندىك بەرگەنى ءۇشىن العىس بىلدىرگەن.

پەنتاگون ا ق ش قورعانىس ءمينيسترىنىڭ ساپارىنا قاتىستى ازىرگە رەسمي تۇسىنىكتەمە بەرگەن جوق.

ا ق ش اكىمشىلىگى قاراشاداعى سايلاۋعا دەيىن يرانعا سوققى جاساۋدى قايتا باستاۋعا قارسى. اق ءۇي باسپا ءسوز حاتشىسىنىڭ ورىنباسارى اننا كەللي ۆاشينگتوننىڭ 3-قاراشاعا دەيىن مۇنداي وپەراتسيا جۇرگىزۋدى جوسپارلامايتىنىن راستادى.

يزرايلدە يرانمەن سوعىستى قايتا باستاۋ ماسەلەسى 27-قازانعا بەلگىلەنگەن پارلامەنت سايلاۋى قارساڭىندا تالقىلانىپ جاتىر.

بۇعان دەيىن يزرايلدىڭ 12-ارناسى نەتانياحۋدىڭ ترامپتى ەكى ەلدە دە سايلاۋ وتپەي تۇرىپ يرانعا سوققى بەرۋدى قايتا باستاۋعا شاقىرعانىن حابارلاعان. دەگەنمەن يزرايل پرەمەر-ءمينيسترى سايلاۋعا دەيىن جاڭا اسكەري وپەراتسيا باستاۋعا نيەتتى ەمەس ەكەنىن اشىق مالىمدەگەن.

يزرايل ب ا ق- تارىنىڭ حابارلاۋىنشا، ارميا باس شتابىنىڭ باستىعى ەيال زامير جاۋىنگەرلىك ازىرلىكتى كۇشەيتۋ ماقساتىندا سايلاۋ كۇنىنە دەيىن اسكەري قىزمەتشىلەردىڭ دەمالىسىن توقتاتۋعا بۇيرىق بەرگەن.

سونىمەن قاتار يران پرەزيدەنتى ا ق ش پەن يزرايلدىڭ گازاداعى ارەكەتىن گەنوتسيد دەپ اتاعانىن جازعان ەدىك.