ترامپ يراننىڭ بىتىمگە كەلۋ تۋرالى ۇسىنىسىنان باس تارتقانىن راستادى
استانا. KAZINFORM – ا ق ش پرەزيدەنتى دونالد ترامپ يراننىڭ ءبىر اپتاعا اتىستى توقتاتۋ جانە ورمۋز بۇعازىن اشۋ تۋرالى ۇسىنىسىن قابىلداماعانىن راستادى، دەپ حابارلايدى DW.
- مەن ولاردىڭ ۇسىنىسىن قابىلدامايمىن. ولار بىردەن بۇعازدى اشۋ تۋرالى كەلىسىم جاساعىسى كەلەدى، ويتكەنى وراسان زور شىعىنعا ۇشىراپ جاتىر. ولار كەلىسىم جاساعىسى كەلەدى، مەنىڭشە، بۇل قالىپتى جاعداي. مەن دە كەلىسىم جاساعاندى ۇناتامىن، ءبىراق مۇنداي كەلىسىمگە جول بەرىلمەيدى، - دەدى ترامپ 26-قىركۇيەكتە جۋرناليستەرگە.
بۇعان دەيىن تەگەران ءبىرقاتار شارت ورىندالعان جاعدايدا ءبىر اپتادان كەيىن ورمۋز بۇعازى ارقىلى كەمەلەردىڭ قوزعالىسىن قالپىنا كەلتىرۋدى جانە قاقتىعىستى ۇزاق مەرزىمدى رەتتەۋ جونىندەگى كەلىسسوزدەردى قايتا باستاۋدى ۆاشينگتونعا ۇسىنعان.
DW حابارلاعانداي، يران پرەزيدەنتى ماسۋد پەزەشكيان ا ق ش سانكتسيالارى مەن تەڭىز بلوكاداسى كۇشىندە بولعانشا، تەگەران ورمۋز بۇعازى ارقىلى كەمەلەردىڭ ەركىن ءوتۋىن قامتاماسىز ەتپەيتىنىن مالىمدەگەن.
ا ق ش پەن يران اراسىنداعى ءۇشىنشى تاراپتاردىڭ اراعايىندىعىمەن جۇرگىزىلىپ جاتقان كەلىسسوزدەر جالعاسىپ جاتىر. 23-قىركۇيەكتە ترامپ ەكى ەل اراسىنداعى ب ۇ ۇ باس اسسامبلەياسى اياسىنداعى بايلانىستاردىڭ «وتە ناتيجەلى» بولعانىن ايتقان ەدى. يراننىڭ مەملەكەتتىك بۇقارالىق اقپارات قۇرالدارىنىڭ مالىمەتىنشە، تەگەران سول كەزدە كەمە قاتىناسىن قايتا جانداندىرۋ شارتتارىنىڭ قاتارىندا تەڭىز بلوكاداسىن توقتاتۋدى، بۇعاتتالعان اكتيۆتەردى بوساتۋدى جانە اسكەري قيمىلداردى توقتاتۋدى اتاعان.
