ترامپ نيۋ-يوركتەگى ساياباقتا ات اربالارعا تىيىم سالۋعا قارسى شىقتى

ونىڭ ايتۋىنشا، عاسىردان استام تاريحى بار بۇل ءداستۇردىڭ توقتاۋى قالا تاريحىنىڭ ءبىر بولىگىن جوعالتۋمەن تەڭ. بۇل تۋرالى ا ق ش پرەزيدەنتى Truth Social جەلىسىندەگى جازباسىندا جاريالادى.

ترامپ ءوز جازباسىندا ورتالىق ساياباقتا ءجۇز جىلدان استام ۋاقىت بويى تۋريستەردى سەرۋەندەتۋگە پايدالانىلىپ كەلگەن جىلقىعا جەگىلگەن اربالاردىڭ قىزمەتى توقتايتىنىنا وكىنىش ءبىلدىردى.

- ورتالىق ساياباقتاعى عاسىردان استام تاريحى بار، كوپشىلىك جاقسى كورەتىن ات جەگىلگەن اربالار ءداستۇرىنىڭ اياقتالىپ كەلە جاتقانى وكىنىشتى. بۇعان كوبىنە ءبىر قايعىلى وقيعا سەبەپ بولدى. بۇل ماڭدا كولىك اپاتتارى ءجيى بولادى، ءبىراق سول ءۇشىن كولىكتەردىڭ ساياباققا كىرۋىنە تىيىم سالىنبايدى. ەندەشە، اربالارعا نەگە تىيىم سالىنادى؟ بۇل تاماشا ءداستۇر ەدى. قالا تاريحىنىڭ تاعى ءبىر بولىگى وتكەننىڭ ەنشىسىندە قالعالى تۇر. ءبىز ونى ساعىناتىن بولامىز،- دەپ جازدى ا ق ش پرەزيدەنتى.

22-قازاندا نيۋ-يورك قالالىق كەڭەسى ات اربالارعا تىيىم سالۋدى كوزدەيتىن زاڭ جوباسىن ماقۇلدادى.

قۇجاتقا سايكەس، 2028-جىلعى 1-ماۋسىمنان باستاپ قالادا كوممەرتسيالىق ماقساتتا ات اربالاردى پايدالانۋعا تىيىم سالىنادى. زاڭ جوباسىن نيۋ-يورك ءمەرى زوحران مامداني مەن قالالىق كەڭەس ءتورايىمى دجۋلي مەنين قولداپ وتىر.

باستاما ورتالىق ساياباقتا بولعان قايعىلى وقيعادان كەيىن «رومانچ زاڭى» دەپ اتالدى. 2026 -جىلى ماۋسىم ايىندا 18 جاستاعى تۋريست رومانچ ماحادجان ات اربادان قۇلاپ، قازا تاپقان.

تىيىمدى قولداۋشىلار جانۋارلاردى قورعاۋ جانە ساياباققا كەلۋشىلەردىڭ قاۋىپسىزدىگىن ارتتىرۋ قاجەتتىگىن العا تارتادى. ال وسى سالا وكىلدەرى جۇمىس ورىندارىنىڭ قىسقارۋى جانە نيۋ-يوركتەگى ەجەلگى تۋريستىك داستۇرلەردىڭ ءبىرىنىڭ جويىلۋى مۇمكىن ەكەنىن ەسكەرتەدى.

زاڭ جوباسىندا وسى سالادا ەڭبەك ەتەتىن ادامداردى قولداۋ باعدارلاماسىن ازىرلەۋ قاراستىرىلعان. ونىڭ اياسىندا جۇمىسقا ورنالاسۋعا كومەكتەسۋ جانە قايتا دايارلاۋ شارالارى جۇزەگە اسىرىلماق. سونداي-اق اربالاردى پايدالانۋعا تىيىم سالىنعاننان كەيىن قالا بيلىگى جىلقىلارعا ىزگىلىك قاعيداتتارىنا ساي كۇتىم جاسالۋىن قامتاماسىز ەتۋگە ءتيىس.

قالالىق كەڭەس ماقۇلداعاننان كەيىن قۇجاتتى تۇپكىلىكتى راسىمدەۋدەنن وتكىزۋ قاجەت.

بۇعان دەيىن يتاليادا تۋريستەرگە ارنالعان ات اربالارعا تىيىم سالىنۋى مۇمكىن ەكەنىن جازعان بولاتىنبىز.