تەگەران ورمۋز بۇعازىن اشۋعا دايىن ەكەنىن مالىمدەپ، ا ق ش- قا شارت قويدى
استانا. KAZINFORM - تەگەران بۇۇ باس اسسامبلەياسى اياسىندا ۆاشينگتونمەن اراداعى تەكەتىرەستى باسەڭدەتۋدىڭ ءبىر جولىن ۇسىندى. بۇل تۋرالى Kazinform اگەنتتىگىنىڭ مەنشىكتى ءتىلشىسى حابارلايدى.
يران ا ق ش اسكەري قىسىمدى توقتاتىپ، ەلدىڭ تەڭىز ايلاقتارىن قورشاۋعا الۋدى دوعارسا، ورمۋز بۇعازىن جەتى كۇن ىشىندە اشۋعا دايىن. بۇل تۋرالى سەيسەنبىدە يراننىڭ جوعارى لاۋازىمدى شەنەۋنىگى Reuters اگەنتتىگىنە مالىمدەدى.
- ا ق ش جاعدايدى ديپلوماتيالىق جولمەن رەتتەۋگە نيەتتى ەكەنىن رەسمي تۇردە حابارلاۋى كەرەك. وسىدان كەيىن تاراپتار الداعى ۇدەرىستىڭ مەرزىمىن ءوزارا كەلىسىپ الادى، - دەدى اگەنتتىككە بەرگەن سۇحباتىندا يران شەنەۋنىگى.
ونىڭ ايتۋىنشا، نيۋ-يورككە كەلگەن يران دەلەگاتسياسىنا ۆاشينگتونمەن ديپلوماتيالىق بايلانىستى قايتا جانداندىرۋ ءۇشىن قاجەتتى وكىلەتتىك بەرىلگەن.
تەگەراننىڭ بۇل ۇسىنىسى 16-قىركۇيەكتە دەلدالدار ارقىلى اقش تارابىنا جەتكىزىلگەن. اسكەري قيمىلداردى توقتاتۋ شارتتارى دا وسى جولمەن تالقىلانۋى مۇمكىن.
- ب ۇ ۇ باس اسسامبلەياسى ا ق ش- قا ديپلوماتيالىق كەلىسسوزدەرگە قايتا ورالۋعا قولايلى مۇمكىندىك بەرەدى. الايدا ونى قايتا باستاۋ ءۇشىن ۆاشينگتون ناقتى قادامدار جاساۋى كەرەك، - دەدى يران شەنەۋنىگى.
يران پرەزيدەنتى ماسۋد پەزەشكيان سەيسەنبىدە بۇۇ باس اسسامبلەياسىنىڭ سەسسياسىنا قاتىسۋ ءۇشىن نيۋ-يورككە اتتاندى. قازىرشە ونىڭ بۇۇ شتاب-پاتەرىندە ا ق ش پرەزيدەنتى دونالد ترامپپەن كەزدەسۋى جوسپارلانىپ وتىرعان جوق.
ماسۋد پەزەشكيان ۇشار الدىندا حالىقارالىق الاڭداردا يراننىڭ ۇستانىمىن قورعاۋعا نيەتتى ەكەنىن مالىمدەدى. بۇعان دەيىن نيۋ-يورككە يراننىڭ سىرتقى ىستەر ءمينيسترى ابباس اراكچي كەلگەن بولاتىن. ول ب ۇ ۇ باس حاتشىسى انتونيۋ گۋتەرريشپەن تەلەفون ارقىلى سويلەسىپ، وزگە مەملەكەتتەردىڭ وكىلدەرىمەن ءبىرقاتار كەزدەسۋ وتكىزۋدى جوسپارلادى.
بۇل ديپلوماتيالىق مالىمدەمەلەر اسكەري قيمىلداردىڭ قايتا باستالۋى مۇمكىن دەگەن ەسكەرتۋلەر ايتىلعان تۇستا جاسالدى.
جەكسەنبىدە يراننىڭ ورتالىق اسكەري قولباسشىلىعى ا ق ش- تىڭ ايماقتاعى ءبىرقاتار ەلدىڭ قولداۋىمەن جاڭا اسكەري وپەراتسيا باستاۋعا دايىندالىپ جاتقانى تۋرالى اقپارات العانىن مالىمدەدى. تەگەران مۇنداي جاعداي ورىن السا، جاۋاپ شارالارى ەش شەكتەۋسىز جۇرگىزىلەتىنىن ەسكەرتتى.
سونىمەن قاتار يراننىڭ يادرولىق قارۋدى تاراتپاۋ تۋرالى شارتتان شىعۋعا دايىندالىپ جاتقانى حابارلانعان بولاتىن.
