ترامپ كونگرەسس سايلاۋىنا دەيىن يرانعا سوققى جاسامايدى
استانا. KAZINFORM – ا ق ش پرەزيدەنتى دونالد ترامپ تەگەرانمەن كەلىسسوزدەر ناتيجەلى ءجۇرىپ جاتقانىن ايتىپ، 3-قاراشادا وتەتىن ارالىق سايلاۋعا دەيىن يرانعا اسكەري سوققى جاسالمايتىنىن مالىمدەدى، دەپ حابارلايدى Kazinform اگەنتتىگىنىڭ ۆاشينگتونداعى مەنشىكتى ءتىلشىسى.
- ءبىز يران يسلام رەسپۋبليكاسىمەن ءتيىمدى كەلىسسوز جۇرگىزىپ جاتىرمىز، - دەپ حابارلادى دونالد ترامپ Truth Social جەلىسىندە.
ترامپ يراننىڭ ەكونوميكالىق جاعدايى ناشارلاپ، اسكەري الەۋەتى دە السىرەگەنىن مالىمدەدى. سونداي-اق ول يرانعا قاتىستى تەڭىز قورشاۋى تولىق كۇشىندە قالاتىنىن اتاپ ءوتتى.
- ءبىز ا ق ش- تا 3-قاراشادا وتەتىن ارالىق سايلاۋعا دەيىن يرانعا شابۋىل جاسامايمىز. يراننىڭ يادرولىق قارۋى بولمايدى! - دەپ جازدى ا ق ش پرەزيدەنتى Truth Social الەۋمەتتىك جەلىسىندەگى پاراقشاسىندا.
Breitbart باسىلىمىنىڭ مالىمەتىنشە، پەنتاگون ا ق ش ورتالىق قولباسشىلىعىنا يرانعا قارسى اۋقىمدى اسكەري وپەراتسيالاردى قايتا باستاۋعا ازىرلىكتى اياقتاۋدى بۇيىرعان. بۇل حاباردان ءبىر كۇن وتكەن سوڭ ترامپ ءوز مالىمدەمەسىن جاريالادى. اسكەري سوققىلار يراننىڭ ەنەرگەتيكالىق ينفراقۇرىلىمى مەن يادرولىق نىساندارىنا باعىتتالۋى مۇمكىن.
بۇعان دەيىن ا ق ش پەن يران اراسىنداعى تەكەتىرەستىڭ ءوربۋى، كەلىسسوزدەردىڭ بارىسى جانە اسكەري قاقتىعىستىڭ قايتا باستالۋ ىقتيمالدىعى تۋرالى جازعان بولاتىنبىز.
