ترامپ، شي جانە پۋتين قىتايدا نە تالقىلادى؟

استانا. قازاقپارات – ا ق ش پرەزيدەنتى دونالد ترامپ، قىتاي ءتوراعاسى شي جينپيڭ جانە رەسەي پرەزيدەنتى ۆلاديمير پۋتين ءۇشجاقتى كەزدەسۋ وتكىزىپ، ب ۇ ۇ رەفورماسى، ەنەرگەتيكالىق جەتكىزىلىمدەردى ارتتىرۋ جانە يادرولىق قاۋىپ-قاتەردى ازايتۋ ماسەلەلەرىن تالقىلادى.

ا
AP news

بۇل تۋرالى AP news جازدى.

كەزدەسۋ ازيا-تىنىق مۇحيتى ەكونوميكالىق ىنتىماقتاستىعى (APEC) سامميتى اياسىندا ءوتتى جانە ءبىر ساعاتتان استام ۋاقىتقا سوزىلدى. تاراپتار يادرولىق قارۋدى باقىلاۋ مەن ونى قولدانۋ قاۋپىن تومەندەتۋ جونىندە ديالوگ جۇرگىزۋگە كەلىسكەن.

دونالد ترامپ ا ق ش، رەسەي جانە قىتاي يادرولىق قارۋ سانىن قىسقارتۋ ءارى ونى قولدانۋ قاۋپىن ازايتۋ ماسەلەسىن تالقىلاۋعا ەرەكشە مۇمكىندىككە يە ەكەنىن ايتتى.

شي جينپيڭ يادرولىق قارۋعا تىيىم سالۋ جانە ونى جويۋ قاجەتتىگىن اتاپ ءوتىپ، يادرولىق قارۋدان ازات الەم قۇرۋعا شاقىردى. ال ۆلاديمير پۋتين ەكىنشى دۇنيەجۇزىلىك سوعىستا جەڭىسكە جەتكەن ءۇش ەلدىڭ حالىقارالىق بەيبىتشىلىكتى ساقتاۋ ءۇشىن ورتاق جاۋاپكەرشىلىگى بار ەكەنىن مالىمدەدى.

كەزدەسۋدە يران ماسەلەسى مەن ەنەرگەتيكالىق جەتكىزىلىمدەر دە قوزعالدى. بۇعان دەيىن ترامپ شي جينپيڭمەن جەكە كەزدەسىپ، ورمۋز بۇعازى ارقىلى مۇناي تاسىمالىن قامتاماسىز ەتۋ جانە ا ق ش- تىڭ اۋىل شارۋاشىلىعى ونىمدەرىن قىتايعا جەتكىزۋدى ارتتىرۋ ماسەلەلەرىن تالقىلاعان.

شي جينپيڭ ا ق ش پەن قىتاي قارىم-قاتىناسى ترامپتىڭ پرەزيدەنتتىگى كەزىندە جالپى تۇراقتانىپ، جاقسارعانىن ايتتى. سونداي-اق ەكونوميكالىق جانە ساۋدا ماسەلەلەرى بويىنشا بايلانىستى نىعايتۋ قاجەتتىگىن جەتكىزدى.

ترامپ ۆلاديمير پۋتينمەن دە جەكە كەزدەسىپ، ۋكرايناداعى سوعىستى رەتتەۋ ماسەلەسىن تالقىلاعان. كەزدەسۋ شامامەن 40 مينۋتقا سوزىلعان.

ەسكە سالساق، بۇعان دەيىن الەم كوشباسشىلارى شىنجىندە جينالىپ جاتقانىن حابارلادىق. ەكى كۇنگە جوسپارلانعان جوعارى دەڭگەيدەگى كەزدەسۋگە 21 مۇشە ەكونوميكانىڭ كوشباسشىلارى مەن وكىلدەرى قاتىستى.