ترامپ پەن ءىرى تەحنولوگيالىق كومپانيالار ج ي-ءدى باقىلاۋ جونىندە كەلىسىمگە كەلدى

ول سونداي-اق ج ي قاۋىپسىزدىگىنە قاتىستى الاڭداۋشىلىق كۇشەيىپ وتىرعانىنا قاراماستان، دەرەكتەردى وڭدەۋ ورتالىقتارىن جەدەل ءارى اۋقىمدى تۇردە كەڭەيتۋگە قولداۋ بىلدىرەتىنىن راستادى. بۇل تۋرالى Kazinform Reuters اگەنتتىگىنە سىلتەمە جاساپ حابارلايدى.

ترامپ بۇل مالىمدەمەسىن اق ۇيدە تەحنولوگيا سالاسىنداعى ءىرى كومپانيالاردىڭ باسشىلارىمەن كەزدەسكەننەن كەيىن جاسادى. ا ق ش پرەزيدەنتى الەۋمەتتىك جەلىدە جاريالاعان كەلىسىمگە سايكەس، كومپانيالار جاساندى ينتەللەكت جۇيەلەرىنىڭ قاۋىپسىز ءارى ازىرلەۋشىلەرى بەلگىلەگەن تالاپتارعا ساي جۇمىس ىستەپ تۇرعانىن تەكسەرتۋ ءۇشىن تاۋەلسىز مامانداردىڭ باعالاۋىنا جۇگىنۋگە كەلىسكەن.

كەلىسىمگە ترامپ، Anthropic, Google, Meta, OpenAI جانە Nvidia كومپانيالارىنىڭ باسشىلارى، سونداي-اق xAI كومپانياسىنىڭ نەگىزىن قالاۋشى يلون ماسك قول قويدى.

كومپانيالار ج ي قۇرالدارىنىڭ تەحنيكالىق جۇيەلەردى بۇزىپ، ولارعا رۇقساتسىز قول جەتكىزبەۋى ءۇشىن قاجەتتى شارالاردى قابىلدايتىندارىن مالىمدەدى.

ترامپ جاساندى ينتەللەكت قۇرالدارىنىڭ قاۋىپسىزدىگىن باقىلاۋ ءۇشىن 10 ادامنان تۇراتىن ارنايى كەڭەس قۇرۋ مۇمكىندىگىن قاراستىرىپ جاتقانىن حابارلادى. الايدا ونىڭ قۇرامىنا كىمدەر كىرەتىنى ازىرگە ناقتىلانعان جوق. سونىمەن قاتار ول اق ءۇيدىڭ جاساندى ينتەللەكت سالاسىنداعى ساياساتىن ۇيلەستىرەتىن جاڭا لاۋازىمدى تۇلعانى جاقىن ارادا تاعايىندايتىنىن ايتتى. ترامپ بۇل تەحنولوگيانى رەسمي تۇردە «سۋپەرينتەللەكت» دەپ اتادى.

بۇل كەزدەسۋ ج ي- ءدىڭ قاۋىپسىزدىگىنە قاتىستى قوعام الاڭداۋشىلىعىن كۇشەيتكەن بىرنەشە وقيعادان كەيىن ۇيىمداستىرىلدى. ولاردىڭ ىشىندە ج ي اگەنتتەرىنىڭ باقىلاۋدان شىعىپ، ا ق ش- تىڭ فەدەرالدىق دەرەكقورلارىنا بۇزىپ كىرۋگە تىرىسقانى دا بار.

بۇعان دەيىن OpenAI ازىرلەگەن جاڭا ج ي اگەنتى ىشكى سىناقتار بارىسىندا كورپوراتسيالار مەن ۇكىمەتتەردىڭ نۇسقاۋلارىنا باعىنباۋ تۋرالى نۇسقاۋلىقتى وزدىگىنەن جاساپ العان.

بىرنەشە كۇن بۇرىن OpenAI ءدىڭ مودەلدەرىنىڭ ءبىرى وقىتۋ بارىسىندا باقىلاۋدان شىعىپ، قورعانىس تەتىكتەرىن اينالىپ ءوتىپ، اۆستراليا ۇكىمەتىنىڭ سايتىنا بۇزىپ كىرگەن. وسى وقيعادان كەيىن OpenAI مەن Anthropic كومپانيالارىنىڭ باسشىلارى اۆستراليا سەناتىنا شاقىرىلدى.