ترامپ امەريكا عىلىمى جاڭا التىن عاسىرعا قادام باسقانىن جاريالادى

ترامپ اق ءۇيدىڭ عىلىم جانە تەحنولوگيا ساياساتى باسقارماسىنىڭ ديرەكتورى مايكل كراتسيوسپەن بىرگە Tesla جانە SpaceX كومپانياسىنىڭ باس ديرەكتورى يلون ماسكقا، Google كومپانياسىنىڭ نەگىزىن قالاۋشى سەرگەي برينگە، Nvidia كومپانياسىنىڭ باس ديرەكتورى دجەنسەن حۋانعا جانە AMD كومپانياسىنىڭ باس ديرەكتورى ليزا سۋعا ۇلتتىق عىلىم مەدالىن تابىس ەتتى.

Microsoft كومپانياسىنىڭ باس ديرەكتورى ساتيا نادەللا مەن Dell Technologies كومپانياسىنىڭ نەگىزىن قالاۋشى مايكل دەلل تەحنولوگيا جانە يننوۆاتسيا ۇلتتىق مەدالىمەن ماراپاتتالدى. ترامپ عىلىم مەن تەحنولوگياعا قوسقان ۇلەسى ءۇشىن العىس ايتىپ، لاۋرەاتتاردى «تاريحتى جاسايتىن ادامدار» دەپ اتادى.

ءىس-شاراعا OpenAi، Anthropic, Amazon Web Services, Crusoe, Emerald AI جانە Micron Technology سياقتى جەتەكشى تەحنولوگيالىق كومپانيالاردىڭ وكىلدەرى دە قاتىستى.

ءسامميتتىڭ نەگىزگى تاقىرىپتارىنىڭ ءبىرى عىلىمي زەرتتەۋلەردى قارجىلاندىرۋ بولدى. امەريكانىڭ جاساندى ينتەللەكت (ج ي) كومپانيالارى فەدەرال اگەنتتىكتەرگە ەسەپتەۋ قۋاتى مەن عىلىمي قۇرالدارعا شامامەن 2,4 ميلليارد دوللار نەسيە بەرەتىنىن جاريالادى. اسىرەسە، ج ي، كۆانتتىق ەسەپتەۋلەر، يادرولىق ەنەرگەتيكا جانە عارىشتى زەرتتەۋگە ارنالعان جاڭا تەحنولوگيالارعا نازار اۋدارىلدى.

ترامپ اكىمشىلىگى سونىمەن قاتار عىلىمي پروگرەستى جەدەلدەتۋ جوسپارلارىن ۇسىندى. اتاپ ايتقاندا پەرسپەكتيۆالى عالىمدار تىكەلەي قارجىلاندىرىلماق. بيلىك بيۋروكراتيالىق كەدەرگىلەردى ازايتۋدى كوزدەپ وتىر، بۇل ولاردىڭ پىكىرىنشە، زەرتتەۋلەردى باياۋلاتادى.

سونىمەن قاتار NASA مەن ا ق ش-تىڭ ەنەرگەتيكا مينيسترلىگى يادرولىق تەحنولوگيالاردى عارىش باعدارلامالارىنا ەنگىزۋ بويىنشا سەرىكتەستىك تۋرالى جاريالادى.

سامميتكە قاتىسۋشىلار ا ق ش عىلىمي كوشباسشىلىعىن ساقتاۋ ءۇشىن شەتەلدىك مامانداردى تارتۋدىڭ ماڭىزدىلىعىن اتاپ ءوتتى. Nvidia كومپانياسىنىڭ باس ديرەكتورى دجەنسەن حۋان جانە Carnegie Mellon University پرەزيدەنتى فارنام دجاحانيان يمميگرانتتاردىڭ امەريكالىق يننوۆاتسيالارعا ايتارلىقتاي ۇلەس قوساتىنىن اتاپ ءوتتى.

بۇعان دەيىن ترامپ ج ي اتاۋىن «سۋپەرينتەللەكت» دەپ وزگەرتۋ تۋرالى جاريالاعان بولاتىن.