ترامپ ا ق ش- تا ج ي اتاۋى «سۋپەرينتەللەكت» دەپ وزگەرتىلگەنىن جاريا ەتتى

ول بۇل مالىمدەمەنى نيۋ-يوركتە ءوتىپ جاتقان ب ۇ ۇ باس اسسامبلەياسىندا ايتتى، دەپ حابارلايدى Kazinform ار اگەنتتىگىنە سىلتەمە جاساي وتىرىپ.

ترامپتىڭ ايتۋىنشا، «جاساندى» ءسوزىن قولدانۋ ول ناقتى ينتەللەكت ەمەس سەكىلدى اسەر قالدىرادى جانە تەحنولوگيا تۋرالى بۇرىس كوزقاراس تۋدىرادى. سوندىقتان امەريكا پرەزيدەنتى ا ق ش- تا جاساندى ينتەللەكت «سۋپەرينتەللەكت» دەپ اتالاتىنىن جاريالاپ، باسقا ەلدەردى دە سوعان ەلىكتەۋگە شاقىردى.

- ەندى بارلىق ا ق ش قۇجاتتارىندا جانە بۇكىل الەمدەگى قۇجاتتاردا دا «جاساندى» ءسوزى الدەقايدا ءدال «سۋپەر» تەرمينىمەن اۋىستىرىلادى دەپ ۇمىتتەنەمىن. باسقاشا ايتقاندا، سۋپەرينتەللەكتتىڭ جاڭا الەمىنە - SI الەمىنە قوش كەلدىڭىزدەر. بۇل ءسوز ومىرشەڭ بولا ما، كورە جاتارمىز. قۇلاققا جاعىمدى ەستىلەدى. بۇل الدەقايدا جاقسى جانە الدەقايدا ءدال اتاۋ، - دەدى اق ءۇي باسشىسى.

ترامپ سونىمەن قاتار ا ق ش سۋپەرينتەللەكتتىڭ دامۋىن شەكتەگىسى كەلمەيتىنىن، كەرىسىنشە وعان قولداۋ كورسەتەتىنىن مالىمدەدى.

ول سونداي-اق قۇراما شتاتتار ج ي- ءدىڭ دامۋىن ءجىتى قاداعالايتىنىن، قاجەت بولعان جاعدايدا «ادىلەت مينيسترلىگى مەن ا ق ش- تىڭ باسقا دا قۇقىق قورعاۋ ورگاندارى باقىلاۋعا الۋعا دايىن» ەكەنىن اتاپ ءوتتى.

دونالد ترامپ وسى اپتادا قىتاي ءتوراعاسى شي جينپيڭمەن كوپتەن كۇتكەن كەزدەسۋ الدىندا وسىنداي مالىمدەمە جاساپ وتىر. وسى كەزدەسۋدە تاراپتار جاساندى ينتەللەكت ماسەلەلەرى تالقىلانادى دەپ كۇتىلىپ وتىر.

ا ق ش پرەزيدەنتى شي جينپيڭنىڭ قۇرمەتىنە مەملەكەتتىك كەشكى اس ۇيىمداستىرۋدى جوسپارلاپ وتىر، وعان Nvidia ،OpenAI جانە Apple سياقتى تەحنولوگيالىق كومپانيالاردىڭ باسشىلارى قاتىسپاق.

ەسكە سالا كەتەيىك، ترامپ بۇعان دەيىن 2019-جىلى قۇرعان عارىش كۇشتەرىنە ۇقساس جاساندى ينتەللەكت كۇشتەرىن قۇراتىنىن جاريالاعان.