ترامپ ا ق ش پرەزيدەنتىنىڭ جالاقىسىن نەگە المايتىنىن ايتتى
استانا. KAZINFORM – ا ق ش پرەزيدەنتى دونالد ترامپ CBS News ارناسىنىڭ «60 مينۋت» باعدارلاماسىنا بەرگەن سۇحباتىندا رەسپۋبليكاشىلداردىڭ ارالىق سايلاۋداعى جەڭىلىسىنە قاتىستى پىكىر ءبىلدىرىپ، دەموكراتتارمەن الداعى جۇمىستىڭ جايىن ءسوز ەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ترامپ رەسپۋبليكاشىلداردىڭ سايلاۋداعى جەڭىلىسىنە يرانمەن اراداعى سوعىس اسەر ەتكەنىن ايتتى.
- مەنىڭشە، ولاردىڭ سوعىسقا قارسى بولۋىنىڭ باستى سەبەبى دە وسى. ويتكەنى يراننىڭ يادرولىق قارۋى بولماۋى كەرەك دەگەنگە ءبارى كەلىسەدى دەپ ويلايمىن. يران ەشقاشان يادرولىق قارۋعا يە بولمايدى. ءبىر قىزىعى، يزرايلگە دەگەن وشپەندىلىك تە كۇشتى. جۇرتتىڭ يزرايلگە كوزقاراسى تەرىس سياقتى، - دەدى دونالد ترامپ.
سونداي-اق ول سوعىستان ءاردايىم الىس جۇرۋگە تىرىسقانىن ايتىپ، وسى ۋاقىتقا دەيىن سەگىز قاقتىعىستىڭ شەشىمىن تاپقانىن جەتكىزدى.
جۇرگىزۋشى ارالىق سايلاۋدان كەيىن سوعىستى ءورشىتۋ جوسپارى بار-جوعىن سۇراعاندا، ترامپ: «جوق، ونداي جوسپارىم جوق. بۇعان ەشقانداي سەبەپ تە، نەگىز دە كورىپ تۇرعانىم جوق»، - دەپ جاۋاپ بەردى.
بۇعان قوسا ول سوعىس كەزىندە ا ق ش قورعاۋىنا العان ەلدەر ۆاشينگتوننىڭ اسكەري شىعىندارىن وتەيتىنىن ايتتى.
- ا ق ش قورعاۋىنا العان ەلدەردىڭ بارلىعى سوعىسقا بايلانىستى شىعىننىڭ ءبارىن وتەيدى. ءبىز جۇمسالعان قاراجاتتى تولىق قايتارىپ الامىز. مەن ولارعا مۇنى ايتتىم، ولار شىعىندى تولىعىمەن وتەيدى. ويتكەنى ا ق ش- تىڭ قولداۋىنسىز ولار قازىرگىدەي جاعدايدا بولماس ەدى. امەريكا بولماسا، يزرايل دە بولماس ەدى، - دەدى دونالد ترامپ.
سۇحبات بارىسىندا ا ق ش پرەزيدەنتى دەموكراتيالىق پارتيامەن قارىم-قاتىناستى دامىتۋ مۇمكىندىگىنە دە توقتالدى. ونىڭ ايتۋىنشا، كوپتەگەن دەموكراتپەن «قارىم-قاتىناسى جاقسى» جانە ولارمەن بىرلەسە جۇمىس ىستەي الادى.
بۇدان بولەك جۇرگىزۋشى ترامپقا تاعى دا يمپيچمەنت جاريالانۋى مۇمكىن بە دەگەن ماسەلەنى دە كوتەردى. اق ءۇي باسشىسى مۇنداي شەشىمگە نەگىز جوق ەكەنىن ايتتى.
- مۇنداي جاعدايدى ەلەستەتە دە المايمىن. سوندا مەن نە ىستەپ قويدىم؟ پرەزيدەنتتىگىمدەگى ەڭ تابىستى ەكى جىل وسى بولدى، - دەدى دونالد ترامپ.
سونداي-اق پرەزيدەنت قورعانىس ءمينيسترى پيت حەگسەتكە يمپيچمەنت جاريالاۋ جونىندەگى تالاپتاردى ورىنسىز دەپ سانايتىنىن ايتتى.
- ولار وعان يمپيچمەنت جاريالاعىسى كەلەدى. بۇل - ۇلكەن ادىلەتسىزدىك. ءبىز ەكى سوعىسقا قاتىسىپ، ەكەۋىندە دە جەڭىسكە جەتتىك. ۆەنەسۋەلادا دا، يراندا دا جەڭدىك، - دەدى دونالد ترامپ.
ترامپ وزىنەن كەيىن ا ق ش پرەزيدەنتى قىزمەتىنە كەلۋى مۇمكىن تۇلعالار قاتارىندا ۆيتسە-پرەزيدەنت دجەي دي ۆەنس پەن مەملەكەتتىك حاتشى ماركو رۋبيونى اتادى. ول رۋبيونى لايىقتى كانديدات دەپ باعالادى.
بۇدان بولەك ترامپ پرەزيدەنتتىككە ۇمىتكەر بولاتىن وزگە دە تۇلعالار بار ەكەنىن ايتىپ، ولاردىڭ ەسىمدەرىن اتاۋدان باس تارتتى.
- باسقا دا ۇمىتكەرلەر كوپ. ولاردىڭ اراسىندا بىرنەشە مىقتى سەناتور بار. مەن ولاردىڭ ءبارىن تانيمىن، ءبارى دە ماعان ۇنايدى. سوندىقتان بۇل ىسكە ارالاسۋىم دا، ارالاسپاۋىم دا مۇمكىن، - دەدى ول.
سۇحباتتا پرەزيدەنتتىڭ قارجىلىق جاعدايى دا ءسوز بولدى. جۇرگىزۋشى ترامپتان قىزمەتىنە كىرىسكەننەن بەرى بايلىعىنىڭ 3 ميلليارد دوللارعا ارتقانى تۋرالى سۇرادى. ترامپ تابىسىنىڭ وسكەنىن راستاپ:
- باسقالار سياقتى مەنىڭ دە تابىسىم ءوستى. ءسىز دە اكسيا ساتىپ الۋىڭىز كەرەك ەدى، - دەدى.
- تۇسىندىرەيىن. مەن بايلىعىمدى ەسەپتەپ، وعان كوپ باس قاتىرا بەرمەيمىن. اقشام جەتكىلىكتى، ءتىپتى بۇرىن ويلاعانىمنان دا كوپ. كاپيتالىم وسكەن شىعار، ءبىراق ونى ناقتى بىلمەيمىن. قارجىمدى ۇلىم قاداعالايدى. ول - وتە ادال، جاقسى جىگىت. بۇل ماسەلەنى ونىمەن ءتىپتى تالقىلامايمىن. پرەزيدەنتتىك قىزمەتكە كىرىسپەي تۇرىپ-اق قوماقتى قاراجاتىم بولعان. مەن جالاقى المايمىن. ال بۇعان دەيىنگى پرەزيدەنتتەردىڭ ءبارى جالاقى الىپ كەلگەن، - دەدى دونالد ترامپ.
بۇعان دەيىن ا ق ش- تا سايلاۋداعى جەڭىلىستەن كەيىن پەنتاگون باسشىسىنا يمپيچمەنت جاريالانۋى مۇمكىن ەكەنىن حابارلاعان بولاتىنبىز.
