تەرگەۋ بارىسىندا X جەلىسى ۇلى بريتانياداعى تارتىپسىزدىكتەرگە ىقپالى نازارعا الىنادى
استانا. kazinform - ەۋروپالىق كوميسسيانىڭ X الەۋمەتتىك جەلىسىنە قاتىستى تەرگەۋى بارىسىندا جەلىنىڭ ۇلى بريتانياداعى تولقۋلارعا دەگەن جاۋابى ەسكەرىلۋى مۇمكىن، دەپ جازادى Euronews.
2023 -جىلدىڭ جەلتوقسانىندا جاريالانعان پروتسەسس ە و-نىڭ جاڭا زاڭى بويىنشا قارالعان العاشقى سوت ءىسى بولدى.
تەرگەۋ X كومپانياسىنىڭ تاۋەكەلدەردى باسقارۋ، مازمۇندى مودەراتسيالاۋ، جارنامانىڭ اشىقتىعى جانە زەرتتەۋشىلەر ءۇشىن دەرەكتەرگە قول جەتكىزۋ سياقتى سالالاردا زاڭدى بۇزعان- بۇزباعانىن زەرتتەيدى.
30-شىلدەدە ساۋتپورتتاعى ءبي ستۋدياسىنا جاسالعان شابۋىل كەزىندە بالالار قازا تاپقاننان كەيىن ۇلى بريتانيادا باستالعان نارازىلىق شەرۋلەرى كەي قالالاردا جاپپاي تارتىپسىزدىكتەر مەن زورلىق- زومبىلىققا ۇلاستى.
X الەۋمەتتىك جەلىسى بۇل وقيعادا ۇلكەن ءرول اتقاردى دەپ سانالادى. الدىمەن ول ساۋتپورت شابۋىلى تۋرالى شيەلەنىس پەن جالعان اقپارات تاراتۋ قۇرالى رەتىندە پايدالانىلدى، ونىڭ ميللياردەر يەسى يلون ماسكتىڭ پرەمەر-ءمينيستردى سىناۋى نارازىلىق پەن زورلىق-زومبىلىقتى كۇشەيتە ءتۇستى.
بۇگىن بريتاندىق رەتتەۋشى الەۋمەتتىك جەلىلەردى ءوز پلاتفورمالارىن ەلدە جالعاسىپ جاتقان تارتىپسىزدىكتەر كەزىندە زورلىق-زومبىلىققا شاقىرۋ ءۇشىن پايدالانباۋعا شاقىردى.
«ۇلى بريتانياداعى جاعداي ەۋروكوميسسيانىڭ تەرگەۋىنە اسەر ەتە الا ما؟» دەگەن سۇراققا اتقارۋشى بيلىك وكىلى Euronews-كە: «ءبىز، ارينە، اڭعال بولماۋىمىز كەرەك، ە و-دا دا جاناما اسەرلەر بولۋى مۇمكىن»، - دەپ جاۋاپ بەردى.
بريۋسسەل ۇلى بريتانياداعى جاعدايدى، سونداي-اق X پلاتفورماسىنىڭ وسى وقيعالارعا رەاكسياسىن مۇقيات قاداعالاپ وتىر، دەپ اتاپ ءوتتى ول.
اۆتور
ەركەجان سماعۇلوۆا
