تۇقىمى سۋعا كەتكەن اقتوبەلىك ديقاننىڭ ماسەلەسى قالاي شەشىلدى

اقتوبە. KAZINFORM - اقتوبە وبلىسى قۇمقۇدىق اۋىلىندا كوكتەمگى سۋ تاسقىنى كەزىندە شارۋا قوجالىعىنىڭ 80 توننا تۇقىمى جارامسىز بولىپ قالدى.

астыұ
Фото: ҚР Орталық коммуникациялар қызметі

شارۋالار اراسىندا ءوزارا تۇقىم ايىرباستاۋ ءجۇرىپ، «ءالي» وندىرىستىك كووپەراتيۆى 400 گ ا جەرگە بيداي ەكتى.

اقتوبە وبلىسى بويىنشا بيىل 700 مىڭ گەكتاردان استام اۋماق يگەرىلەدى. قازىرگى كەزدە 220 مىڭ گەكتار اۋماقتا كوكتەمگى دالالىق جۇمىستارى جۇرگىزىلدى.

- سۋ تاسقىنى كەزىندە وسىمدىك شارۋاشىلىعىنا ايتارلىقتاي زيان كەلمەدى. قازىر ەگىس القاپتارىنىڭ ءبارى جارامدى، ەگىن ەگۋ جۇمىسى ءجۇرىپ جاتىر. ءساۋىر ايىنىڭ سوڭعى ونكۇندىگى مەن مامىر ايىنىڭ باسىنان باستاپ 220 مىڭ گەكتارعا ەگىس جۇمىستارى ءجۇردى. ونىڭ ىشىندە 160 مىڭ گەكتارى ءداندى داقىلدار، 32 مىڭ گەكتارى مايلى داقىلدار، 30 مىڭ گەكتارى مال ازىعى جانە 1,4 مىڭ گا كارتوپ، 500 گا كوكونىس، قالعان 200 گ ا باقشا داقىلدارى. ايتا كەتەرلىگى، ايتەكە بي اۋدانى قۇمقۇدىق اۋىلى «ءالي» وندىرىستىك كووپەراتيۆىندە تۇقىمدى سۋ باستى. اكىمدىك تاراپىنان شىعىندى وتەۋ جولى قاراستىرىلىپ جاتىر. بۇگىندە شارۋاشىلىق شارۋالار اراسىنداعى ءوزارا تۇقىم ايىرباستاۋ تاسىلىمەن تۇقىم الىپ، ەگىس جۇمىسىن جۇرگىزدى. قازىر 400 گەكتار القاپقا بيداي ەكتى. ەلىمىزدە اۋىل شارۋاشىلىعى سالاسىندا جەكە جانە زاڭدى تۇلعالارعا شىعىندى وتەۋ قاعيدالارى بەكىتىلدى. ول جەردە ەگىستىك القاپتاردىڭ سۋعا كەتۋى قاراستىرىلىپ وتىر. بىزدە ەگىستىك القاپ ەمەس، تۇقىم بولىپ تۇر. ءالى دە مينيسترلىك ارقىلى ناقتىلاۋ كەرەك، - دەدى اقتوبە وبلىستىق اۋىل شارۋاشىلىعى جانە جەر قاتىناستارى باسقارماسى ءبولىمىنىڭ باسشىسى نۇربەك رايىمبايەۆ.

ونىڭ ايتۋىنشا، بيىل جالپى 400-430 مىڭ توننا استىق، 40 مىڭ توننا مايلى داقىل جينالادى دەپ بولجاندى. ورتاشا ونىمدىلىگى گەكتارىنا 10 سەنتنەر بولۋى مۇمكىن.

ايتا كەتەيىك، كوكتەمگى سۋ تاسقىنى كەزىندە اقتوبەدە 3 مىڭنان استام مال ولەكسەسى تىركەلدى. بارلىعى 1500 دەن استام مال باسىنا 264,4 ميلليون تەڭگە وتەلدى.

سوڭعى جاڭالىقتار