ەتنيكالىق قازاق بالالارىنا ارنالعان «Jas Qazaq» جازعى- ەتنو لاگەرى جۇمىسىن باستادى
استانا. KAZINFORM - قازاقستان رەسپۋبليكاسى سىرتقى ىستەر مينيسترلىگىنە قاراستى «وتانداستار قورى» ك ە ا ق ۇيىمداستىرۋىمەن جانە IQanat قورىنىڭ قولداۋىمەن شەتەلدە تۇراتىن ەتنيكالىق قازاق بالالارىنا ارنالعان جازعى ەتنو- لاگەرى جۇمىسىن باستادى.
وتانداستار قورىنىڭ «Jas Qazaq» جازعى ەتنو- لاگەرى ءتورتىنشى رەت ۇيىمداستىرىلىپ وتىر. وسىعان دەيىن 400 دەن اسا قانداس بالالار قاتىسسا، بيىل رەسەي، موڭعوليا، وزبەكستان، قىرعىز رەسپۋبليكاسى، قىتاي، وڭتۇستىك كورەيا جانە يران ەلدەرىنەن كەلگەن 255 ەتنيكالىق قازاق بالالارىنىڭ باسىن قوستى. قاتىسۋشىلاردىڭ اراسىندا توتەنشە جاعداي كەزىندە قازاقستاندىق دوستارىنا جىلۋ جيناعان موڭعوليالىق قازاق بالالارى، قوعامنىڭ ءتۇرلى بايقاۋلارىنا قاتىسىپ، بىلىمدەرى مەن بىلىكتىلىكتەرىن دالەلدەگەن قاراكوز قانداستارىمىز بار.
لاگەر 2024 -جىلعى 24-ماۋسىم جانە 7-شىلدە ارالىعىندا بۋرابايداعى «iQanat High School of Burabay» مەكتەبى بازاسىندا وتەدى. بالالار ەكى اپتادا قازاق ءتىلى، تاريحى مەن سالت- ءداستۇرىن ۇيرەنىپ، ۇلتتىق ويىندار مەن مۋزىكالىق اسپاپتاردا وينايدى، اتقا ءمىنىپ، كيىز ءۇي قۇرادى، ەلىمىزدەگى جوعارى وقۋ ورىندارىنىڭ قاتىسۋىمەن وتەتىن ءبىلىم كورمەسىنە قاتىسادى جانە ەڭ باستىسى الەمنىڭ كوپتەگەن ەلىنەن دوستار تابادى.
25-ماۋسىم كۇنى لاگەردىڭ رەسمي اشىلۋ سالتاناتىنا ءماجىلىس دەپۋتاتتارى بولات كەرىمبەك جانە نۇرگۇل تاۋ، روسسوترۋدنيچەستۆونىڭ استاناداعى وكىلدىك باسشىسى ولگا فيلونوۆا، «وتانداستار قورى» ك ە ا ق پرەزيدەنتى دانيار قادىروۆ جانە IQanat مەكتەبىنىڭ ديرەكتورى زايكەن جانات قاتىسىپ، بالالارعا اقجارما تىلەكتەرىن ءبىلدىردى.
ايتا كەتەيىك، قازاقستان رەسپۋبليكاسى سىرتقى ىستەر مينيسترلىگىنە قاراستى «وتانداستار قورى» كوممەرتسيالىق ەمەس اكسيونەرلىك قوعامى (قوعام) شەتەلدە تۇراتىن وتانداستارىمىزعا جۇيەلى تۇردە مادەني- گۋمانيتارلىق جانە اقپاراتتىق- كونسۋلتاتسيالىق قولداۋ كورسەتىپ كەلەدى. ەتنيكالىق قازاق بالالارىنا ءتۇرلى تانىمدىق جوبالاردى ۇيىمداستىرۋ ولاردىڭ اتامەكەنىن تانىپ- بىلۋىنە وڭتايلى مۇمكىندىك تۋعىزىپ وتىر.
