تۇنگى رەيستەر، تومەن جالاقى: «قازاق ەير» ۇشقىشتارى باسشىلىعىنا ۇندەۋ جاسادى

استانا. قازاقپارات - Qazaq Air اۋە كومپانياسىنىڭ پيلوتتارى كومپانيا باسشىلىعىنا ۇندەۋ جاساپ، جالاقى كوتەرۋ ماسەلەسىن كوتەردى، دەپ حابارلايدى كولىك مينيسترلىگىنىڭ باسپا ءسوز قىزمەتى.

مينيسترلىك تاراتقان اقپاراتقا سايكەس مالىمدەمەدە قويىلعان نەگىزگى تالاپتار مىنانداي:

تۇنگى رەيستەر ءۇشىن تولەم جۇيەسىن قايتا قاراۋ،
كومانديرلەردىڭ جالاقىسىن كوتەرۋ،
ەكىنشى پيلوتتاردىڭ جالاقىسىن كوتەرۋ جانە بارلىق پيلوتتار ءۇشىن تولەمدى ارتتىرۋ.
- قازاقستان رەسپۋبليكاسىنىڭ كولىك مينيسترلىگى اۋە كومپانياسىنان بۇل مالىمدەمەنى ەلدىڭ قولدانىستاعى زاڭناماسىنا سايكەس قاراۋدى تالاپ ەتەدى، - دەلىنگەن ۆەدومستۆو حابارلاماسىندا.

كولىك مينيسترلىگىنىڭ مالىمەتىنشە، Qazaq Air اۋە كومپانياسىنىڭ %49 ى Sovico توبىنا، تاعى %49 ى سامۇرىق قازىناعا، ال %2 ى Kazasia Holding Limited كومپانياسىنا تيەسىلى.

بۇدان بۇرىن حابارلانعانداي، 11-قازاندا قوستاناي اۋەجايىندا قوستاناي - استانا باعىتىنداعى Qazaq Air ۇشاعى اۋەگە كوتەرىلگەن كەزىندە ۇشاقتىڭ شاسسي دوڭگەلەگى جانا باستاعان.