ەتنوسارالىق قاتىناس ماسەلەسىن ەشقاشان ساياسات قۇرالىنا اينالدىرۋعا بولمايدى - پرەزيدەنت
استانا. KAZINFORM - قازاقستاندا كەلىسىم، توزىمدىلىك، دوستىق ۇعىمدارى قۇر ۇران ەمەس، ازاماتتاردىڭ كۇندەلىكتى ءومىر سالتىنا اينالعان قۇندىلىق. بۇل تۋرالى قازاقستان حالقى اسسامبلەياسىنىڭ XXⅩⅣ سەسسياسىندا مەملەكەت باسشىسى قاسىم-جومارت توقايەۆ ايتتى.
- سوڭعى جىلدارى ەلىمىزدىڭ ساياسي-يدەولوگيالىق كەلبەتى تۇبەگەيلى وزگەردى. ەكونوميكادا جۇيەلى رەفورمالار قولعا الىندى. ەڭ باستىسى، قوعامنىڭ سانا-سەزىمى وزگەرە باستادى. كەيىنگى جىلدارى ساياسي وقيعالارعا باعا بەرۋ تۇرعىسىنان حالقىمىزدىڭ كوزقاراسى دا جاڭا سيپاتقا يە بولدى. العا قاراي ادىمداپ قادام باستى دەۋگە بولادى. ءبىز زاماناۋي جانە الدىڭعى قاتارلى قوعامعا اينالدىق. مۇنىڭ ءبارى بىزدەگى قوعامدىق كەلىسىم ۇلگىسىنە دە تىڭ تالاپتار قويادى. كەشە عانا ءتيىمدى سانالعان ءادىس-تاسىلدەر بۇگىن جارامسىز بولۋى مۇمكىن. بىزگە ەسكىلىكتىڭ ىزىنە قايتا تۇسپەۋ ءۇشىن بارلىق جەتىستىكتەرىمىز بەن ساتسىزدىكتەرىمىزدى تارازى باسىنا قويىپ، زەردەلەۋ قاجەت. ەڭ اۋەلى، اسسامبلەيا قىزمەتىنىڭ ءمانى مەن مازمۇنىن قايتا قاراعان ءجون. مەنىڭ تۇسىنىگىمدە اسسامبلەيا مەملەكەتتىڭ ەتنوسارالىق سالاداعى بارلىق جۇمىسىنا باعىت بەرەتىن ستراتەگيالىق شتابقا اينالۋى كەرەك، - دەدى قاسىم-جومارت توقايەۆ.
مەملەكەت باسشىسى اتالعان ناقتى مىندەتتەردى جۇزەگە اسىرۋ ۇلتارالىق قارىم-قاتىناس سياقتى ماڭىزدى ءارى نازىك سالادا اتقارىلىپ جاتقان اۋقىمدى ىستەردى جاڭا مازمۇنمەن تولىقتىراتىنىنا سەنىمدى ەكەنىن باسا ايتتى.
- ۇلتارالىق كەلىسىم مەن تۇراقتىلىقتى نىعايتۋ - مەملەكەتتىك ساياساتتىڭ باستى باعىتتارىنىڭ ءبىرى جانە سولاي بولىپ قالا بەرەدى. قازاقستاندا كەلىسىم، توزىمدىلىك، دوستىق ۇعىمدارى قۇر ۇران ەمەس، ازاماتتاردىڭ كۇندەلىكتى ءومىر سالتىنا اينالعان قۇندىلىق. اۋقىمدى قاقتىعىستار، ساۋدا سوعىستارى، ادام ءومىرىنىڭ قۇنسىزدانۋى كەزەڭىندە بەيبىتشىلىكتىڭ قادىرى ەرەكشە ارتا ءتۇستى. ويتكەنى، بۇل - دامۋدىڭ باستى كەپىلى. بارلىعىمىز قال-قادىرىمىزشە بەيبىتشىلىكتى ساقتاۋعا اتسالىسامىز. مەن بۇعان دەيىن بارلىق اكىمدەرگە تۇراقتى تۇردە ەتنوسارالىق، ۇلتارالىق كەلىسىم ماسەلەسىنە ارنالعان جينالىس وتكىزىپ تۇرۋدى تاپسىردىم. ورتالىق جانە جەرگىلىكتى اتقارۋشى ورگاندار وسى ماڭىزدى سالانى ءجىتى نازاردا ۇستاۋى كەرەك. ەتنوسارالىق جانە كونفەسسياارالىق قاتىناس ماسەلەسىن ەشقاشان ساياسات نەمەسە ءتۇرلى ارانداتۋ قۇرالىنا اينالدىرۋعا بولمايدى. بۇل - مەملەكەتتىڭ دە، بۇكىل قوعامنىڭ دا بۇلجىماس قاعيداسى، - دەدى پرەزيدەنت.
