تەننيس: قازاقستان جاس وسپىرىمدەر قۇراماسى قىتايدى جەڭدى

شىمكەنت. KAZINFORM - شىمكەنت قالاسىندا 16 جاسقا دەيىنگىلەر اراسىندا دەۆيس كۋبوگى ازيا-تىنىق مۇحيت ايماعى بويىنشا ىرىكتەۋ تۋرنيرىنىڭ توپتىق باسەكەلەرى اياقتالدى.

قازاقستان قۇراماسى ا توبىنداعى سوڭعى كەزدەسۋىندە قىتاي كومانداسىن 3:0 ەسەبىمەن جەڭدى.

الدىمەن دامير جالعاسباي ليانگ ليانگتى 7:6 (7:0)، 6:2 ەسەبىمەن قاپى قالدىردى. ال، زاڭعار نۇرلان ۇلى كونگ ۆەيدەن 7:5، 6:3 ەسەبىمەن باسىم ءتۇستى. جۇپتىق سىندا دانيەل تازابەكوۆ پەن د. جالعاسباي جۇبى ليانگ-جەن دۋەتىن جەڭدى - 6:4، 6:3.

وسىلايشا، قازاقستاندىقتار ءوز توبىنان شيرەك فينالعا ءبىرىنشى ورىنمەن شىقتى. الايدا جەرەبە قورىتىندىسىنا سايكەس قازاقستان قۇراماسىنا ازۋلى قارسىلاس تاپ بولدى.

23-مامىر كۇنى سەرگەي كۆاكتىڭ شاكىرتتەرى جاسوسپىرىمدەر اراسىندا دەۆيس كۋبوگىنىڭ التى دۇركىن چەمپيونى اۋستراليامەن وينايدى. وتكەن جىلى دا قوس قۇراما كەزدەسىپ، وندا قازاقستاندىقتار 2:0 ەسەبىمەن جەڭىسكە جەتكەن ەدى.

شيرەك فينالىنا سونداي-اق مىنا قۇرامالار كەزدەسەدى: كورەيا - گونكونگ، قىتايلىق تايبەي - ءۇندىستان، جاپونيا - قىتاي.

ەسكە سالا كەتەيىك، بۇدان بۇرىن تەننيستەن الەم چەمپيوناتىندا قازاقستان جاس وسپىرىمدەر قۇراماسىنىڭ ىرىكتەۋ جارىسىنىڭ شيرەك فينالىندا وينايتىنىن جازعان بولاتىنبىز.