تۇندە نەگە تىرناق الۋعا بولمايدى. ەتنوگراف ءتۇسىندىردى
قازاقتىڭ كەز كەلگەن ىرىم-تىيىمىنىڭ تاربيەلىك ءمانى بار. بالا كەزدە «تۇندە تىرناق الما، تىرناقتى بەلگىلى ءبىر كۇندەرى عانا العان دۇرىس، تىرناقتى جەرگە كوم» دەگەن نانىم-سەنىمگە تولى ىرىمداردى ەستىگەن بولارسىز. بۇل ىرىمنىڭ ءمانى نەدە؟ تىرناقتى نە ءۇشىن تۇندە الۋعا بولمايدى؟ ەتنوگراف بولات بوپاي ۇلى ءتۇسىندىردى.
ەتنوگرافتىڭ ايتۋىنشا، بۇرىن قازاقتار تۇندە تىرناق العان ادامعا قاۋىپ تونەدى دەپ سەنگەن ەكەن.
«قازاق بالاسى تۇندە تىرناق الۋدى جامان ىرىمعا سانايدى. ەرتەدە ادامنىڭ جانى تىرناق ۇشىندا تۇرادى دەپ سەنگەن حالىق، تۇندە تىرناق العان ادامعا قاۋىپ تونەدى دەپ قورىققان. تۇندە الىپ تاستاعان تىرناقتى شايتان مالعۇلىن الىپ، ونى ادامنىڭ حالال اسىنا سالىپ كەتەدى دەپ ىرىم ەتكەن. وعان قوسا قاراڭعى تۇسكەندە تىرناق الۋ كوزى كورمەيتىن ادامدار ءۇشىن دە قاۋىپتى سانالعان»، - دەپ جاۋاپ بەردى بولات بوپاي ۇلى.
سونىمەن قاتار، حالىق اراسىندا نەگىزىندە و دۇنيەلىك بولعان ادامنىڭ تىرناعىن تۇندە العان دەگەن اڭىز بار. سوندىقتان ءتىرى ادام تۇندە تىرناق الماۋى كەرەك دەپ ەسەپتەلگەن.
ال، تىرناق الۋعا ءدىن جاعىنان كەلەتىن بولساق، شاريعات بويىنشا قاجىلىق جانە ۇمرا قۇلشىلىعىن وتەۋ بارىسىندا يحرام كيىپ جۇرگەن كەزدە عانا تىرناق الۋعا بولمايدى. تىرناقتى، ابزالى اپتاسىنا ءبىر رەت الىپ تۇرۋ كەرەك. ال قىرىق كۇننەن اسسا - حارامعا جاقىن بولىپ ەسەپتەلىنەدى.
تىرناق الۋ ادەبى بويىنشا، اۋەلى وڭ قولدىڭ سۇق ساۋساعىنان باستاپ، رەتىمەن ورتاڭعى، اتى جوق جانە شىناشاق، ەڭ سوڭىندا باس بارماعىنىڭ تىرناعى الىنادى. سول قولى شىناشاعىنان باستاپ، رەتىمەن باس بارماعىنىڭ تىرناعىن الۋمەن اياقتالادى. اياق تىرناقتارىن وڭ اياعىنىڭ كىشكەنتاي باشپايىنان باستاپ، رەتىمەن الادى. سول اياعىنىڭ تىرناعىن، كەرىسىنشە، ۇلكەن باشپايىنان باستاپ، كىشكەنتاي باشپايىنان اياقتايدى.
تىرناق الۋعا بولمايتىن جەرلەر:
تىرناقتى اسحانادا، بەتى اشىق ىدىس تۇرعان جەردە، داستارحان باسىندا جانە ادام تۇرعان جەردە الماعان دۇرىس.
