ۆەتنامدىق كومپانيا ەلىمىزدەگى اۋەجايلاردىڭ ءبىرىن ساتىپ الۋعا نيەتتى
استانا. KAZINFORM - ۆەتنامدىق SOVICO Group كومپانياسى ەلىمىزدەگى اۋەجايلاردىڭ ءبىرىن ساتىپ الۋعا نيەتتى. بۇل تۋرالى پرەمەر- ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ايتتى.
- ۆەتنام - وڭتۇستىك- شىعىس ازياداعى ەڭ ۇلكەن سەرىكتەستەرىمىزدىڭ ءبىرى. 2023 -جىلى تاۋار اينالىمى 1 ميلليارد دوللارعا جۋىقتادى. الايدا، وبەكتيۆتى سەبەپتەرگە بايلانىستى ءبىرشاما تومەندەپ كەتتى. وتكەن جىلدى 879 ميلليون دوللارمەن اياقتادىق. نەگىزىنەن ول جاققا جارتىلاي فابريكاتتار، شيكىزات، مىرىش، قورعاسىن، مىس ۇلكەن كولەمدە جەتكىزەمىز. ول جاقتان تۇرمىستىق تەحنيكا مەن وڭدەلگەن تاۋار الامىز. ۆەتنامدا بۇل سالا وتە جاقسى دامىعان. مەملەكەت باسشىسىنىڭ سوڭعى ساپارى بارىسىندا ۆەتنامنىڭ يندۋستريالىق ايماعىنا دا بارعان ەدىك. وتە قاتتى ۇنادى. ول جەردە جاپوندىق جانە وڭتۇستىك كورەيالىق كومپانيالار جۇمىس ىستەيدى. وزدەرىنىڭ وندىرىستەرىن جولعا قويعان. شارتتارى وتە جاقسى. بۇل سالادا ولاردان ۇيرەنەتىن دۇنيەلەرىمىز بار، - دەدى ول اقوردادا ب ا ق وكىلدەرىنىڭ ساۋالىنا وراي.
ۆيتسە- پرەمەر سول ساپار قورىتىندىسىندا ۆەتنامدىق SOVICO Group كومپانياسى Qazaq Air كومپانياسىن ساتىپ العانىن ەسكە سالىپ ءوتتى.
- تاياۋدا عانا ول وسىندا كەلىپ، مەن كەزدەستىم. ول اۋەجايدى ساتىپ الۋ نەمەسە باسقارۋعا الۋ مۇمكىندىگىن قاراستىرىپ وتىر. ويتكەنى، كەز كەلگەن اۋە كومپانياسى ءۇشىن قالاي دەگەندە دە بازالىق اۋەجاي قاجەت. كومپانيا وتە ۇلكەن. حالىقارالىق اۋە كومپانيالارىمەن دە وتە جاقسى بايلانىسى بار. بوينگ كومپانياسىمەن ۇلكەن كەلىسىمشارت جاساسقان. مەنىڭ تۇسىنۋىمشە، ول بورتتارىنىڭ ءبىر بولىگىن قازاقستاندا دامىتقىسى كەلەدى. ول اۋە كومپانياسىن ۇلكەيتپەك. سوندىقتان تاياۋ ۋاقىتتا قازاقستاندا تاعى ءبىر ۇلكەن اۋە كومپانياسى اشىلادى، - دەدى سەرىك جۇمانعارين.
ايتا كەتەيىك، قازىرگى ۋاقىتتا اقوردادا مەملەكەت باسشىسى قاسىم-جومارت توقايەۆ پەن قازاقستانعا مەملەكەتتىك ساپارمەن كەلگەن ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى تو لام اراسىندا جوعارى دەڭگەيدەگى كەلىسسوز ءجۇرىپ جاتىر.
بۇعان دەيىن ۆەتنامدىق ينۆەستور Qazaq Air اۋە كومپانياسىنىڭ اتاۋىن وزگەرتكەنىن جازعان ەدىك.
