ۆەتنام قازاقستاننىڭ قاي سالالارىنا قىزىعىپ وتىر

استانا. قازاقپارات - «Kazakh Invest» ۇ ك ا ق ءتوراعاسىنىڭ ورىنباسارى ماديار سۇلتانبەك قازاقستان مەن ۆەتنام اراسىندا قانداي كەلىسىمشارتتار ورناعانىن، ۆەتنام كاسىپكەرلەرىن قاي سالالار قىزىقتىراتىنىن ايتىپ بەردى.

− بۇگىنگى فورۋم بىرنەشە ايعا سوزىلعان كەلىسسوزدەردىڭ ناتيجەسى. بۇل كەلىسسوزدەر ۆەتنام بيزنەس قاۋىمداستىعى مەن قازاقستاندىق كاسىپكەرلەردىڭ، ۇلتتىق كومپانيالار مەن مەملەكەتتىك ورگانداردىڭ قاتىسۋىمەن ءوتتى. سونداي-اق، بۇگىنگى فورۋم تولىعىمەن ۆەتنامدىق تاراپ ەسەبىنەن ۇيىمداستىرىلدى. بۇل دا ۆەتنام بيزنەسىنىڭ قازاقستانمەن ىنتىماقتاستىققا زور قىزىعۋشىلىعىن كورسەتەدى، بۇگىن ۆەتنامنىڭ 20 دان استام ءىرى كومپانياسى ارنايى كەلدى، − دەدى م. سۇلتانبەك تىلشىلەرگە بەرگەن سۇحباتىندا.

ونىڭ ايتۋىنشا، ۆەتنام قازاقستان ءۇشىن ينۆەستيتسيا تارتۋ مەن ىنتىماقتاستىق ورناتۋدىڭ وتە قىزىقتى ۇلگىسى بولىپ وتىر.

− ەل اۋماعى سالىستىرمالى تۇردە شاعىن بولعانىمەن، ۆەتنامنىڭ الەم ەلدەرىمەن ساۋدا اينالىمى وتە جوعارى، ءجىو كولەمى دە وراسان. ولار كورشىلەس ەلدەرمەن، اسىرەسە قىتايمەن ءتيىمدى قارىم- قاتىناس ورناتا العان. قىتايدىڭ كوپتەگەن كومپانيالارى وندىرىستەرىن ۆەتنام اۋماعىندا اشقان. سونىڭ ارقاسىندا ۆەتنامنىڭ جىلدىق ساۋدا اينالىمى جۇزدەگەن ميلليارد دوللاردى قۇرايدى. دەمەك ۆەتنامنان ۇيرەنەتىنىمىز كوپ، − دەدى سپيكەر.

قازىرگى تاڭدا ەكى ەل اراسىنداعى ينۆەستيتسيالىق ىنتىماقتاستىق اياسىندا 3 ينۆەستيتسيالىق جوبا جۇزەگە اسىرىلىپ جاتىر. ولاردىڭ ءبىرى - ۆەتنامدىق SOVICO Group كومپانياسىنىڭ Qazaq Air اۋە كومپانياسىنىڭ اكتسيالارىن ساتىپ الۋى. بۇل جوبا ءىس جۇزىندە اياقتالۋعا جاقىن.

وعان قوسا، الماتى وبلىسىنداعى تۋريزم سالاسىنا قاتىستى جوبا جانە Mareven Food كومپانياسىمەن بىرلەسكەن تاماق ونەركاسىبى سالاسىنداعى جوبا بار.

سونىمەن بىرگە، ۆەتنامنىڭ مۇناي- گاز سەكتورىندا جۇمىس ىستەيتىن كومپانيالارى ۇلكەن قىزىعۋشىلىق تانىتىپ وتىر. ولار «قازمۇنايگاز» ۇلتتىق كومپانياسىمەن ىنتىماقتاستىق ورناتۋعا مۇددەلى.

− وزدەرىڭىز بىلەسىزدەر، قازاقستان سۋارمالى جانە ەگىستىك جەرلەردىڭ كولەمى بويىنشا الەمدە التىنشى ورىندا تۇر. بۇل شىن مانىندە، وتە ۇلكەن ارتىقشىلىق. قازاقستان توپىراعىنىڭ قۇرامىندا حيميالىق زاتتاردىڭ از بولۋىمەن ەرەكشەلەنەدى، ياعني جەرىمىز ەكولوگيالىق تۇرعىدا تازا. سوندىقتان ءبىزدىڭ ەلدە وندىرىلەتىن ازىق- تۇلىك ونىمدەرى دە ەكولوگيالىق تازا ءونىم رەتىندە تانىلۋى مۇمكىن. ال بۇل قازىرگى نارىقتا جوعارى باعالانادى جانە ءبىز مۇنداي ءونىم ءۇشىن قوسىمشا باعا سۇراي الامىز. تۇتىنۋشىلار مۇنداي ساپا ءۇشىن تولەۋگە دايىن، − دەدى ماديار سۇلتانبەك.

ايتا كەتەيىك، قازاقستان مەن ۆەتنام اراسىنداعى تاۋار اينالىمى 860 ميلليون دوللارعا جەتتى.

بۇعان دەيىن ۆەتنامدىق ينۆەستوردىڭ Qazaq Air اۋە كومپانياسىنىڭ اتاۋىن وزگەرتكەنى حابارلانعان ەدى. ەندى Qazaq Air VietJet Kazakhstan اتۋىمەن جۇمىس ىستەمەك.

سونداي-اق، ق ر پرەمەر-ءمينيسترىنىڭ ورىنباسارى ەرمەك كوشەربايەۆ قازاقستان مەن ۆەتنام ءىنتىمقتاستىعىنىڭ ۇش پەرسپەكتيۆالىق باعىتىن ايتتى.