ۆەتنام قازاقستان ينۆەستورلارىنىڭ تابىستى قىزمەتى ءۇشىن بار جاعداي جاساۋعا دايىن - تو لام

استانا. قازاقپارات - 2030-جىلعا دەيىن قازاقستان مەن ۆەتنامنىڭ تاۋار اينالىمىن 5 ميلليارد دوللارعا جەتكىزۋ ءۇشىن 3 نەگىزگى باعىت بويىنشا بايلانىس نىعايتىلادى. بۇل تۋرالى ەلىمىزگە مەملەكەتتىك ساپارمەن كەلگەن ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى تو لام ايتىپ بەردى.

- 1992-جىلى ۆەتنام مەن قازاقستان اراسىندا ديپلوماتيالىق قاتىناستار ورناعان ساتتەن باستاپ ساياسات، ديپلوماتيا، مادەنيەت، قوعام، عىلىم مەن تەحنيكا سالالارىندا ەلەۋلى تابىستارعا قول جەتكىزدىك. ەكىجاقتى جانە كوپجاقتى قاتىناستار قارقىندى دامىپ كەلەدى. الايدا ءبىزدىڭ ەلدەر اراسىنداعى ەكونوميكالىق، ساۋدا جانە يننوۆاتسيالىق ىنتىماقتاستىق ءالى دە بولسا تومەن دەڭگەيدە جانە قوس تاراپتىڭ الەۋەتى مەن قاجەتتىلىكتەرىنە ساي كەلمەي وتىر. وتكەن جىلى ەكىجاقتى تاۋار اينالىمى شامامەن 1 ميلليارد دوللاردى قۇرادى، ال جالپى ينۆەستيتسيا كولەمى نەبارى 5 ميلليون دوللار شاماسىندا عانا بولعان، - دەدى تو لام ەلوردادا وتكەن قازاقستان-ۆەتنام ىسكەرلىك دوڭگەلەك ۇستەلىندە.

ونىڭ ايتۋىنشا، ۆەتنام مەن قازاقستاندا ينۆەستيتسيالىق جانە ساۋدا ىنتىماقتاستىعىن كەڭەيتۋگە قولايلى مۇمكىندىك كوپ. بىرىنشىدەن، ەكىجاقتى قاتىناستار نىعايا تۇسۋدە، اسىرەسە 2023-جىلدىڭ تامىزىندا قازاقستان پرەزيدەنتىنىڭ ۆەتنامعا رەسمي ساپارى مەن بۇگىنگى كەزدەسۋدەن كەيىن ىلگەرىلەۋ بار.

- ەكىنشىدەن، ەكى تاراپتىڭ دا ەكونوميكاسى اشىق، ەكسپورت ماڭىزدى ءرول اتقارادى جانە حالىقارالىق ساۋدا پرينتسيپتەرىنە بەيىمدەلە الادى. ۇشىنشىدەن، ەكى ەل دە ۆەتنام مەن ەاەو اراسىنداعى ەركىن ساۋدا كەلىسىمىنە قاتىسادى، بۇل ساۋدا-ەكونوميكالىق بايلانىستى تەرەڭدەتۋگە جانە تاۋار اينالىمىن ارتتىرۋعا قولايلى جاعداي جاسايدى. تورتىنشىدەن، ەكى تاراپ 2023-2025 -جىلدارعا ارنالعان ساۋدا-ەكونوميكالىق ىنتىماقتاستىقتى جەدەلدەتۋگە باعىتتالعان بىرلەسكەن ءىس-شارالار جوسپارىنا قول قويدى. بەسىنشىدەن، ۆەتنامنىڭ ءىرى اۋە كومپانيالارى، سونىڭ ىشىندە Vietjet ۆەتنام مەن قازاقستان اراسىندا تىكەلەي رەيستەر اشتى، بۇل ءبىزدىڭ ەلدەر اراسىنداعى ينۆەستيتسيالىق، ساۋدا جانە تۋريستىك قىزمەتتى ەداۋىر جەڭىلدەتەدى، - دەدى ول.

سونىمەن بىرگە، قازاقستان استانادا حالىقارالىق قارجى ورتالىعىن ءساتتى دامىتىپ كەلەدى، ال ۆەتنام حوشيميندە جانە دانانگتا وسىنداي ورتالىقتار قۇرىپ جاتىر. ۆەتنام بۇل باعىتتا قازاقستاننىڭ تاجىريبەسىن قابىلداۋعا مۇددەلى جانە استانا حالىقارالىق قارجى ورتالىعىمەن كاپيتال نارىعى، يندەكستەر، جاسىل قارجى جانە باسقا دا پەرسپەكتيۆالى باعىتتار بويىنشا ىنتىماقتاستىقتى نىعايتقىسى كەلەدى.

- ۆەتنام قازاقستاننىڭ ورتالىق ازياداعى ءرولىن جوعارى باعالايدى جانە بولاشاقتا ستراتەگيالىق سەرىكتەستىك ورناتىپ، ىنتىماقتاستىقتى دامىتۋعا تالپىنادى. ءبىز 2030-جىلعا دەيىن ەكىجاقتى تاۋار اينالىمىن 5 ميلليارد دوللارعا جەتكىزۋ ءۇشىن 3 نەگىزگى باعىت بويىنشا بايلانىستى نىعايتامىز. سونداي- اق، ەكى ەلدىڭ ىسكەرلىك قاۋىمداستىعىن بار مۇمكىندىكتەردى پايدالانىپ، قوسىلعان قۇنى جوعارى ونىمدەردى جاساۋعا جانە كەڭەيتۋگە، ەكى ەلدى جاھاندىق نارىقپەن بايلانىستىرۋعا شاقىرامىن. بۇگىن ۆەتنامنىڭ كوپتەگەن جەتەكشى كومپانيالارى قاتىسىپ وتىر، ولارمەن قازاقستان مۇناي مەن گاز، ەنەرگەتيكا، اۋىل شارۋاشىلىعى، تۋريزم، توقىما ءوندىرىسى، حيميا ونەركاسىبى سياقتى سالالاردا ىنتىماقتاسا الادى، - دەدى تو نام.

سونداي-اق، ۆەتنام پارتياسىنىڭ حاتشىسى قازاقستاندا وندىرىلەتىن بىلعارى ونىمدەردىڭ الەۋەتى قور ەكەنىن، ال ۆەتنام - اياق كيىم ءوندىرىسى بويىنشا الەمدىك كوشباسشى ەكەنىن باسا ايتتى. سوندىقتان ۆەتنامدىق كومپانيالار بۇل سالاعا ينۆەستيتسيا سالا الادى جانە بۇل تاۋارلار قازاقستان نارىعىندا عانا ەمەس، ورتالىق ازياعا، ءتىپتى باسقا ەلدەر مەن ايماقتارعا دا ەكسپورتتالا الادى.

- قازاقستان اۋماعى جاعىنان الەمدە 9-ورىندا، ۆەتنامنان سەگىز ەسە ۇلكەن، ءبىراق حالقى نەبارى 20 ميلليون. ال ۆەتنام اۋماعى شاعىن بولسا دا، حالقى 100 ميلليوننان اسادى، سوندىقتان بىزدە ەڭبەك كۇشى وتە مول. قازاقستان پايدالى قازبالارعا باي، بۇل ءوزارا ىنتىماقتاستىقتى دامىتۋ ءۇشىن زور مۇمكىندىك بەرەدى. ءبىز ءبىر-بىرىمىزگە قولداۋ كورسەتىپ، بىرگە دامۋىمىز كەرەك. بۇل ەكىجاقتى ىنتىماقتاستىق پەن جالپى وركەندەۋدى ىلگەرىلەتۋ ءۇشىن پىكىر الماسۋعا جاقسى مۇمكىندىك دەپ بىلەمىن. ەكى ەلدىڭ مەملەكەتتىك ورگاندارى مەن مينيسترلىكتەرىنە ينۆەستيتسيالىق جانە ساۋدا-ەكونوميكالىق ىنتىماقتاستىقتى جانداندىرۋ شارالارىن اشىق تالقىلاۋدى ۇسىنامىن. ۆەتنامنىڭ كوممۋنيستىك پارتياسى، ۇلتتىق جينالىسى جانە ۇكىمەتى قازاقستان ينۆەستورلارىنىڭ ۆەتنامداعى تابىستى قىزمەتى ءۇشىن بارىنشا قولايلى جاعداي جاساۋعا دايىن. ءبىز سىزدەردىڭ تابىستارىڭىزدى ءوز جەتىستىگىمىز جانە ماقتانىشىمىز دەپ بىلەمىز، − دەدى ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى.