تەلەۆيزيا - ءومىرىمنىڭ ءبىر بولىگى: دينا ايماعامبەتوۆا Jibek Joly جانە Silk Way تەلەارنالارىنىڭ ەفيرلىك قىزمەتى تۋرالى
استانا. KAZINFORM -تەلەۆيزيا - ەكرانداعى جارقىن كورىنىس قانا ەمەس، سونىمەن قاتار كادر سىرتىندا اتقارىلاتىن وراسان زور ەڭبەك. كورەرمەندەر سۇيىكتى باعدارلامالارى مەن جاڭالىقتارىن تاماشالاپ جاتقاندا، ونداعان مامان ەفيردىڭ ۇزدىكسىز بەرىلۋىن قامتاماسىز ەتەدى. بۇل جۇمىستا ءاربىر سەكۋندتىڭ ماڭىزى زور.
Jibek Joly / Silk Way تەلەارنالارىنىڭ ەفيرلىك قامتاماسىز ەتۋ قىزمەتىنىڭ جەتەكشىسى دينا ايماعامبەتوۆا Kazinform اگەنتتىگىنىڭ تىلشىسىنە بەرگەن سۇحباتىندا ماماندىعىنىڭ ەرەكشەلىگى، ەفيرگە دەگەن جاۋاپكەرشىلىك، كوماندالىق جۇمىس جانە بالا كۇنگى ارمانىنىڭ ومىرلىك ىسىنە اينالعانى تۋرالى اڭگىمەلەدى.
- كاسىبي جولىڭىز قالاي باستالدى؟ نەلىكتەن ءدال وسى سالانى تاڭدادىڭىز؟
- تەليەۆيدەنيە سالاسىنا ورىمدەي جاس كەزىمدە اسسيستەنت بولىپ كەلدىم. وتكەنگە كوز سالسام، ءبارى كەشە عانا باستالعانداي كورىنەدى. ول كەزدە مەنى الدا قانداي جول كۇتىپ تۇرعانىنان، قانشاما نارسەنى ۇيرەنىپ، قانداي تاجىريبە جينايتىنىمنان جانە نەندەي جايتتاردى باستان وتكەرەتىنىمنەن ءالى دە بەيحابار ەدىم. ۋاقىت وتە كەلە، تەلەۆيزيانىڭ جاي عانا جۇمىس ەمەس، وزىندىك ءومىر ىرعاعى، ەموتسياسى، جاۋاپكەرشىلىگى جانە، ارينە، ادامدارى بار ەرەكشە الەم ەكەنىن ءتۇسىندىم. بۇل سالا ادامدى وزىنە قاتتى باۋراپ الادى! مۇندا ءبىر-بىرىنە ۇقسايتىن كۇندەر وتە سيرەك. ۇنەمى ۇيرەنەسىڭ، داميسىڭ، جاڭا مىندەتتەر جۇكتەلەدى جانە كاسىبىڭمەن بىرگە وسەسىڭ.
- بۇگىندە ءسىز Jibek Joly / Silk Way تەلەارنالارىنىڭ ەفيرلىك قامتاماسىز ەتۋ قىزمەتىن باسقاراسىز. بۇل قىزمەتتىڭ ەرەكشەلىگى نەدە؟
- ءبىز ەفيردىڭ ساپالى ءارى ۋاقىتىلى بەرىلۋىنە جاۋاپتىمىز. ەڭ دۇرىسى، كورەرمەن وسى ۇدەرىستىڭ ارتىندا قانشاما جۇمىس تۇرعانىن بايقاماۋى كەرەك.
ول تەلەديداردى قوسقاندا، ساپالى ءارى ۇزدىكسىز كورسەتىلىمدى كورۋى ءتيىس. جۇمىس ءدال وسىلاي ۇيىمداستىرىلۋى كەرەك. الايدا مۇنداي ناتيجەگە قول جەتكىزۋ ءۇشىن ۇلكەن كوماندالىق جۇمىس، تۇراقتى باقىلاۋ، دالدىك، ءتارتىپ جانە كەز كەلگەن جاعدايعا جەدەل ارەكەت ەتۋگە دايىن بولۋ قاجەت. ەفيردە ۇساق- تۇيەك دەگەن بولمايدى. كەز كەلگەن قاتەلىك، ماتەريالدىڭ ۋاقىتىندا بەرىلمەۋى نەمەسە تەحنيكالىق اقاۋ بۇكىل حابار تاراتۋ ۇدەرىسىنە اسەر ەتۋى مۇمكىن. ال باعدارلاماداعى ءار وزگەرىس، ادەتتە، ەڭ الدىمەن ەفيرلىك قىزمەتتىڭ جۇمىسىنا ىقپال ەتەدى. ءبىز ءۇشىن ءۇش سەكۋندتىڭ ءوزى شەكسىزدىك سياقتى. وسىنداي قىزمەتتى جۇرگىزگەندە، جۇمىستىڭ قىر سىرىن ءوزىڭنىڭ ءبىلۋىڭ عانا ەمەس، كوماندانى ۇيىمداستىرا الۋ، جاۋاپكەرشىلىكتى ءبولىسۋ جانە ارىپتەستەرىڭە سەنۋ دە ماڭىزدى. ءبىز ءاردايىم دايىن وتىرۋىمىز كەرەك، ويتكەنى تەلەۆيزيا تاۋلىك بويى حابار تاراتادى. ەفير كۇتپەيدى، سوندىقتان «مۇنى ەرتەڭ شەشەيىك» دەۋگە مۇمكىندىك جوق.
ءبىزدىڭ قىزمەتتە 40 تان استام ادام جۇمىس ىستەيدى. سوندىقتان جۇمىستى ناقتى ۇيىمداستىرۋ مەن ءوزارا تۇسىنىستىك ايرىقشا ماڭىزدى. مەنىڭ ويىمشا، باسشىلىق ەتۋ دەگەنىمىز - تەك تاپسىرما بەرىپ، ناتيجە تالاپ ەتۋ ەمەس، قىزمەتكەرلەردى تىڭداي ءبىلۋ، ولاردى ءتۇسىنۋ جانە قيىن ساتتەردە قولداۋ كورسەتۋ.
- كوپ جۇمىس كادر سىرتىندا اتقارىلاتىنىن اتاپ ءوتتىڭىز. تولىعىراق ايتساڭىز…
- جۇمىستىڭ نەگىزگى بولىگى كادر سىرتىندا ىستەلەتىنى راس. بىرنەشە ساعاتقا سوزىلاتىن دايىندىق، ماتەريالداردى تەكسەرۋ، كەلىسۋ، ەفير كەستەسىن باقىلاۋ جانە ءتۇرلى جۇمىس ماسەلەلەرىن شەشۋ ءتارىزدى شارۋالاردى ايتۋعا بولادى. كەيدە ساناۋلى مينۋتتىڭ ىشىندە بۇكىل جوسپاردى وزگەرتىپ، شەشىم تاۋىپ، كورەرمەن ەشتەڭەنى بايقامايتىنداي جاعداي جاساۋعا تۋرا كەلەدى. بىردە ءبارى جوسپار بويىنشا تىنىش ءوتىپ جاتادى دا، كەنەت «شۇعىل تۇردە تىكەلەي ەفيرگە شىعامىز!» دەگەن تاپسىرما تۇسەدى. مۇندايدا دەرەۋ ارەكەت ەتىپ، ەفيردەن ورىن بوساتىپ، ترانسلياتسيانى جەدەل قوسۋ كەرەك. ترانسلياتسيا اياقتالعان سوڭ، كورەرمەن ءوزى كۇتكەن باعدارلامانى كورۋى ءۇشىن جوسپارلانعان كەستەگە ءدال سولاي شاپشاڭ ورالۋ قاجەت. ەكراننىڭ ار جاعىندا سونداي ابىگەر بولسا دا، ونى، البەتتە، كورەرمەنگە ەش بايقاتپاۋ ماڭىزدى، ياعني باعدارلاما ءمىنسىز كورسەتىلۋى ءتيىس. ءبىزدىڭ تەلەارنالار پرەزيدەنتتىڭ تەلەراديوكەشەنى قۇرامىنا كىرەتىندىكتەن، ەفيرگە قويىلاتىن تالاپتار ەرەكشە. قىسقاسى، قاتەلەسۋگە قۇقىعىمىز جوق! ءەفيردىڭ تۇراقتى ءارى ۇزدىكسىز بەرىلۋىنىڭ ارتىندا تەك حابار تاراتۋعا تىكەلەي جاۋاپتى ماماندار عانا ەمەس، جۋرناليستەر، رەداكتورلار، رەجيسسەرلەر، وپەراتورلار، تەحنيكالىق ماماندار جانە باسقا دا كوپتەگەن قىزمەتكەر تۇر. ولاردىڭ ەسىمدەرى ەكراننان ۇنەمى اتالا بەرمەيدى، ءبىراق ءارقايسىسى ورتاق ناتيجەگە ءوز ۇلەسىن قوسادى.
تەلەۆيزيا - ءار مامان ماڭىزدى ءرول اتقاراتىن ۇلكەن مەحانيزم. ءبىزدىڭ جۇمىسىمىزدىڭ ەرەكشە قۇندىلىعى دا وسىندا شىعار. كورەرمەن ناتيجەنى كورەدى، ال ءبىز سول ناتيجەنى ۇسىنۋ ءۇشىن قانشاما ەڭبەك، جاۋاپكەرشىلىك پەن كۇش- جىگەر جۇمسالاتىنىن جاقسى بىلەمىز.
-ءسىزدىڭ ماماندىعىڭىزداعى ەڭ قىمبات، ەڭ قۇندى دۇنيە نە؟ وسىنشا جىلدان كەيىن دە، جۇمىسقا دەگەن قىزىعۋشىلىعىڭىزدى ساقتاۋعا قانداي سەبەپتەر بار؟
- تەلەۆيزيادا قىزمەت ەتۋ بالا كەزىمنەن بەرگى ارمانىم بولاتىن. بۇگىندە مەن ءوزىم ارمانداعان ماماندىققا كەلىپ قانا قويماي، وسى سالادا ۇزاق جىل بويى ەڭبەك ەتۋ باقىتىنا يە بولعانىمدى تۇسىنەمىن.
مەن ءۇشىن ەڭ قۇندىسى - ادامدار. اتاپ ايتقاندا، كەزىندە مەنى وسى ۇلكەن تەلەۆيزيا الەمىنە قابىلداپ، ۇيرەتكەن، قولداعان جانە كاسىبي تۇرعىدان وسۋىمە مۇمكىندىك بەرگەن جاندار. ولاردى ءاردايىم ريزاشىلىقپەن ەسكە الامىن. قاي جەردەن باستاعانىمدى جانە وسى جولدا قانشاما جانمەن كەزدەسكەنىمدى ەشقاشان ۇمىتپايمىن.
ءوزارا سەنىم، قولداۋ جانە تاتۋلىق بار ۇجىمدا جۇمىس ىستەۋ باقىتى بۇيىردى. ءبىر ءبىرىمىزدىڭ جەتىستىكتەرىمىزگە قۋانا بىلەتىنىمىزدى جانە جاقسى ناتيجە بۇكىل كوماندانىڭ ەڭبەگى ەكەنىن تۇسىنەتىنىمىزدى جوعارى باعالايمىن.
كاسىبىمە دەگەن سۇيىسپەنشىلىگىم پەن بىرگە جۇمىس ىستەپ، دامىپ، العا ۇمتىلعىم كەلەتىن ارىپتەستەرىم - مەنىڭ ۇزاق جىل بويى وسى ماماندىقتا قالۋىما ىقپال ەتەتىن باستى كۇش. تەلەۆيزيا مەن ءۇشىن جاي عانا جۇمىس ەمەس، بۇل - مەنىڭ وتباسىم، ءومىرىمنىڭ ۇلكەن ءبىر بولىگى.
ايتا كەتەيىك، بۇعان دەيىن Jibek Joly ارناسىنداعى جاڭا جوبا جونىندە جازعانبىز.
اۆتور
الپامىس فايزوللا
