تەلەفونداعى اقشاڭىزدى الاياقتاردان قالاي قورعاۋعا بولادى

تەلەفون جوعالسا، قوسىمشاعا بوگدە ادام كىرسە نەمەسە الاياقتارعا بانك دەرەكتەرىن بەرىپ قويساڭىز، اقشاڭىزدان ايىرىلىپ قالۋىڭىز مۇمكىن.

دەگەنمەن قاراجاتىڭىزدى قورعاۋ ءۇشىن كۇردەلى شارالاردىڭ قاجەتى جوق. كوپتەگەن قاۋىپسىزدىك باپتاۋلارىن ءبىر رەت قوسىپ قويساڭىز، ولار كۇن سايىن اۆتوماتتى تۇردە جۇمىس ىستەيدى.

رەسمي قوسىمشا ەكەنىنە كوز جەتكىزىڭىز

بانك قوسىمشاسىن كەز كەلگەن سايتتان نەمەسە مەسسەندجەردەگى سىلتەمەدەن جۇكتەمەڭىز. الاياقتار تانىمال بانكتەردىڭ قوسىمشالارىنا ۇقساس جالعان باعدارلامالار جاساپ، ادامداردىڭ لوگينى، قۇپيا ءسوزى مەن بانك كارتاسىنىڭ دەرەكتەرىن ۇرلاۋى مۇمكىن.

قوسىمشانى بانكتىڭ رەسمي سايتىنداعى سىلتەمە ارقىلى نەمەسە سمارتفوننىڭ رەسمي قوسىمشالار دۇكەنىنەن جۇكتەگەن دۇرىس.

ەگەر SMS نەمەسە WhatsApp ارقىلى «بانك قوسىمشاسىن جاڭارتىڭىز» دەگەن سىلتەمە كەلسە، ونى بىردەن اشپاڭىز. اقپاراتتى بانكتىڭ رەسمي قوسىمشاسى نەمەسە كولل-ورتالىعى ارقىلى تەكسەرىڭىز.

وڭاي پارول قويماڭىز

«1234»، «0000»، «1111» سياقتى كودتاردى قولدانباڭىز. سونداي-اق بانك قوسىمشاسىنىڭ قۇپيا كودىن تەلەفوننىڭ ەكران قۇلپىن اشاتىن كودپەن بىردەي ەتپەگەن دۇرىس.

ەگەر بانك قوسىمشاسىندا مۇمكىندىك بولسا، Face ID نەمەسە ساۋساق ءىزى ارقىلى كىرۋدى قوسىڭىز. بۇل قوسىمشا قورعانىس بەرەدى ءارى ءار كىرگەن سايىن پارول تەرۋدىڭ قاجەتى بولمايدى.

ۇلكەن اۋدارىمدارعا قوسىمشا راستاۋ قوسىڭىز

كەيبىر بانكتەر ءىرى سوماداعى اقشا اۋدارىمدارىنا قوسىمشا راستاۋ قويۋعا مۇمكىندىك بەرەدى.

مىسالى، بەلگىلى ءبىر سومادان اساتىن اۋدارىم كەزىندە قوسىمشا تەكسەرۋ سۇرالادى. كەي جاعدايدا سەنىمدى ادامىڭىزدىڭ راستاۋىن تالاپ ەتۋ فۋنكسياسى دا بار.

ەگەر مۇنداي مۇمكىندىك بانك قوسىمشاسىندا بولسا، ونى پايدالانعان ءجون. اسىرەسە شوتتا قوماقتى قاراجات ساقتايتىن ادامدار ءۇشىن بۇل قوسىمشا قورعانىس بولا الادى.

بانك قىزمەتكەرى ەشقاشان SMS- كودتى سۇرامايدى

بۇل - ەڭ ماڭىزدى ەرەجەلەردىڭ ءبىرى.

تەلەفون ارقىلى ءوزىن بانك قىزمەتكەرى رەتىندە تانىستىرعان ادام:

SMS ارقىلى كەلگەن كودتى؛

كارتانىڭ PIN- كودىن؛

بانك قوسىمشاسىنا كىرۋگە ارنالعان پارولدى؛

كارتا ءنومىرى مەن CVV كودىن

سۇراماۋى كەرەك.

«شوتىڭىزدان كۇدىكتى اقشا اۋدارىلىپ جاتىر»، «كارتاڭىزدى بۇعاتتاۋىمىز كەرەك» نەمەسە «قاۋىپسىز شوتقا اقشا اۋدارىڭىز» دەگەن سوزدەر الاياقتاردىڭ جيى قولداناتىن تاسىلدەرىنىڭ ءبىرى.

بانك قىزمەتكەرىمىن دەگەن ادام قوڭىراۋ شالسا دا، اسىقپاڭىز. قوڭىراۋدى توقتاتىپ، بانكتىڭ رەسمي نومىرىنە ءوزىڭىز حابارلاسىڭىز.

قوعامدىق Wi-Fi ارقىلى بانككە كىرمەگەن دۇرىس

كافەدە، ساۋدا ورتالىعىندا نەمەسە اۋەجايدا تەگىن Wi-Fi پايدالانۋ ىڭعايلى. ءبىراق مۇنداي جەلىلەردىڭ بارلىعى بىردەي قاۋىپسىز ەمەس.

سوندىقتان بانك قوسىمشاسىن پايدالانىپ، اقشا اۋدارۋ نەمەسە تولەم جاساۋ قاجەت بولسا، موبيلدى ينتەرنەتتى نەمەسە ءوزىڭىز سەنەتىن Wi-Fi جەلىسىن قولدانعان دۇرىس.

اۋدارىمدارعا كۇندەلىكتى ليميت قويىڭىز

بانك قوسىمشاسىنىڭ باپتاۋلارىنان تاۋلىگىنە اۋدارۋعا بولاتىن اقشا كولەمىن شەكتەۋگە بولادى.

مىسالى، كۇندەلىكتى قاجەتتىلىگىڭىز 100 مىڭ تەڭگەدەن اسپاسا، بۇدان الدەقايدا جوعارى ليميت قويۋدىڭ قاجەتى جوق.

بۇل تولىق قاۋىپسىزدىك كەپىلى ەمەس، ءبىراق الاياقتار قوسىمشاعا كىرىپ كەتكەن جاعدايدا ىقتيمال شىعىندى ازايتۋعا كومەكتەسەدى.

بارلىق وپەراتسيا تۋرالى حابارلامانى قوسىڭىز

كارتاڭىزدان اقشا شەشىلسە نەمەسە تولەم جاسالسا، تەلەفونعا بىردەن حابارلاما كەلگەنى دۇرىس.

مىسالى، ءسىز دۇكەننەن ەشتەڭە ساتىپ الماعان بولساڭىز دا، كارتادان اقشا الىنعانى تۋرالى حابارلاما كەلدى دەلىك. مۇنداي جاعدايدا ماسەلەنى بىردەن بايقاپ، كارتانى بۇعاتتاۋعا نەمەسە بانككە حابارلاسۋعا بولادى.

سوندىقتان «حابارلامالار كوپ كەلەدى» دەپ بۇل فۋنكسيانى ءوشىرىپ تاستاماعان ءجون.

كارتانى قالاي بۇعاتتاۋعا بولادى؟

كارتا جوعالعاندا نەمەسە كۇدىكتى وپەراتسيا بايقالعاندا ۋاقىت جوعالتپاۋ ماڭىزدى.

سوندىقتان قازىردەن باستاپ بانك قوسىمشاسىن اشىپ، «كارتانى بۇعاتتاۋ» فۋنكسياسىنىڭ قاي جەردە ورنالاسقانىن قاراپ قويىڭىز.

قاجەت بولعان جاعدايدا بىرنەشە سەكۋندتىڭ ءوزى ماڭىزدى بولۋى مۇمكىن.

ونلاين ساتىپ الۋعا بولەك كارتا اشىڭىز

ينتەرنەتتەن جيى زات ساتىپ الساڭىز، نەگىزگى كارتاڭىزدىڭ ورنىنا ۆيرتۋالدى كارتانى پايدالانۋعا بولادى.

مىسالى، وعان تەك ساتىپ الۋعا قاجەت سومانى سالىپ قوياسىز. ەگەر ۆيرتۋالدى كارتانىڭ دەرەكتەرى بوتەن ادامنىڭ قولىنا تۇسسە، نەگىزگى شوتىڭىزداعى قاراجاتقا قاۋىپ ازايادى.

بۇل اسىرەسە بۇرىن قولدانباعان نەمەسە سەنىمدىلىگىنە كۇمانىڭىز بار سايتتاردا تولەم جاساعاندا پايدالى.

كەز كەلگەن قوسىمشانى ورناتا بەرمەڭىز

بانك قوسىمشاسىنداعى قاۋىپسىزدىك قانشا مىقتى بولعانىمەن، تەلەفوننىڭ ءوزى قورعالماسا، قاۋىپ ساقتالادى.

بەلگىسىز سايتتاردان فايل جۇكتەمەڭىز، كۇماندى قوسىمشالاردى ورناتپاڭىز جانە مەسسەندجەر ارقىلى كەلگەن بەيتانىس فايلدارعا اباي بولىڭىز.

تەلەفونداعى وپەراتسيالىق جۇيە مەن بانك قوسىمشالارىن دا ۋاقىتىندا جاڭارتىپ وتىرىڭىز.

el.kz