تەلەفون ارقىلى تابىس تابۋ: كاسىپكەرلەر ۇلتتىق ونىمدەرىن قالاي ساتىپ ءجۇر

الەۋمەتتىك جەلى جاڭا مۇمكىندىك اشتى

بۇرىن قازاقى ويۋ-ورنەك كوبىنە مەرەكەلىك كيىمدەرمەن بايلانىستى قابىلدانسا، قازىر تاۋار شىعارۋشىلار كۇندەلىكتى قولدانىلاتىن زاتتارعا دا ەنگىزىپ جاتىر. دەگەنمەن ونىمگە ۇلتتىق ورنەك ءتۇسىرۋ تۇتىنۋشىنىڭ قىزىعۋشىلىعىن تۋدىرۋعا جەتكىلىكسىز. ونىڭ ەرەكشەلىگىن، ساپاسىن جانە كۇندەلىكتى ومىردە قالاي قولدانۋعا بولاتىنىن كورسەتۋ دە ماڭىزدى. وسى تۇستا الەۋمەتتىك جەلىلەر كاسىپكەرلەرگە ءوز ونىمدەرىن جان- جاقتى تانىستىرىپ، ساتىپ الۋشىلارمەن تىكەلەي بايلانىس ورناتۋعا مۇمكىندىك بەرىپ وتىر. ءارى بۇعان قولدا قاراپايىم سمارتفون مەن ينتەرنەت بولۋى جەتكىلىكتى.

قازىرگى تاڭدا وتاندىق كاسىپكەرلەردىڭ الەۋمەتتىك جەلىدەگى بەلسەندىلىگى ارتىپ كەلە جاتقانىن زەرتتەۋ ناتيجەلەرى دە كورسەتەدى. TikTok كومپانياسى مەن «اتامەكەن» ۇلتتىق كاسىپكەرلەر پالاتاسى بىرلەسىپ، پلاتفورمانىڭ قازاقستانداعى شاعىن جانە ورتا بيزنەسكە ىقپالىن زەرتتەگەن. TikTok كومپانياسىنىڭ ورتالىق ازيا جانە شىعىس ەۋروپاداعى بيزنەستى دامىتۋ دەپارتامەنتىنىڭ باسشىسى يۋليا كۋشنيردىڭ ايتۋىنشا، كاسىپكەرلەر بۇل جەلىنى جاڭا تۇتىنۋشىلار تابۋ جانە ونىمدەرىن كەڭىنەن تانىستىرۋ ءۇشىن بۇرىنعىدان جيىرەك پايدالانا باستاعان.

- ءاربىر بيزنەستىڭ ارتىندا ءوز تاريحى بار. بۇگىندە TikTok قازاقستاندىق كاسىپكەرلەرگە جاڭا كليەنتتەر تابۋعا، جاڭا نارىقتارعا شىعۋعا جانە ءوز يدەيالارىن تابىستى كاسىپكە اينالدىرۋعا كومەكتەسەدى. زەرتتەۋ ناتيجەلەرى پلاتفورمانى تۇراقتى پايدالانۋ مەن كاسىپورىن ءتۇسىمى اراسىندا بايلانىس بار ەكەنىن كورسەتتى، - دەيدى ول.

ماسەلەن، 2026-جىلعى قىركۇيەك-قازان ايلارىندا قازاقستاننىڭ 20 وڭىرىندەگى 206 ميكرو، شاعىن جانە ورتا كاسىپكەرلىك سۋبەكتىسى اراسىندا جۇرگىزىلگەن ساۋالناماعا قاتىسقانداردىڭ 73,3 پايىزى TikTok ءوز ونىمدەرىن باسەكەلەستەردەن ەرەكشەلەندىرىپ كورسەتۋگە كومەكتەسەتىنىن ايتقان. ال 83,5 پايىزى پلاتفورمانىڭ تۇتىنۋشىلارمەن جاقسى بايلانىس ورناتۋعا مۇمكىندىك بەرگەنىن اتاپ وتكەن.

«جەلىدەگى كونتەنتتىڭ ءۇش نەگىزگى باعىتى بار»

شىمكەنتتىك كاسىپكەر نۇرباقىت بايتان دا وسى جەلىنىڭ مۇمكىندىكتەرىن پايدالانىپ ءجۇر. ونىڭ وتباسى قازاقتىڭ ءداستۇرلى كيىم ۇلگىلەرىن قازىرگى تالعامعا بەيىمدەپ، ۇلتتىق ناقىشتى كۇندەلىكتى سانمەن ۇشتاستىرۋدى قولعا العان. كاسىپكەردىڭ سوزىنشە، باستى ماقسات - دايىن كيىمدى كورسەتىپ قانا قويماي، ونىڭ ەرەكشەلىگىن ءتۇسىندىرۋ جانە ۇلتتىق ۇلگىدەگى كيىمدەردى تەك مەرەكەدە ەمەس، كۇندەلىكتى ومىردە دە كيۋگە بولاتىنىن كورسەتۋ. وسى ماقساتتا ول الەۋمەتتىك جەلىلەردە ونىمدەرىن تانىستىرا باستاعان. كەيىن اۋديتورياسىن كەڭەيتىپ، كوپشىلىكپەن جاقىنىراق بايلانىس ورناتۋ ءۇشىن TikTok-تى دا پايدالانا باستايدى.

- مۇندا قىزىقتى كونتەنت ارقىلى كوپشىلىككە تانىلۋعا مۇمكىندىك بار ەكەنىن بايقادىم. ونىڭ اۋديتورياسى باسقا پلاتفورمالارعا قاراعاندا بىزگە جاقىنىراق بولدى. العاشقى ۆيدەولارىمىز جاقسى قارالىم جيناپ، كورەرمەن تاراپىنان جاقسى پىكىرلەر الا باستادىق. سول كەزدە جەلىنى بيزنەستى دامىتۋعا ءتيىمدى قۇرال ەكەنىن ءتۇسىندىم، - دەيدى كاسىپكەر.

ونىڭ ايتۋىنشا، جەلىدە كورەرمەننىڭ قىزىعۋشىلىعىن تۋدىراتىن كونتەنتتىڭ ءۇش نەگىزگى باعىتى بار. ءبىرىنشىسى - ۇلتتىق كيىمنىڭ تاريحىن تانىستىرۋ. كاسىپكەر بەينەجازبالارىندا قازاقتىڭ ءداستۇرلى كيىم ۇلگىلەرى، ويۋ-ورنەكتەردىڭ شىعۋ تاريحى مەن ماعىناسى تۋرالى اڭگىمەلەيدى.

- ءبىز كيىمدى جاي عانا كورسەتۋمەن شەكتەلمەيمىز. ونىڭ تاريحىن، قازاق حالقى ويلاپ تاپقان كيىم ۇلگىلەرىنىڭ ەرەكشەلىگىن، ويۋ-ورنەكتەردىڭ قانداي ماعىنا بەرەتىنىن تۇسىندىرۋگە تىرىسامىز. ءبىزدىڭ ماقساتىمىز - ادەمى كيىمدى تانىستىرۋ عانا ەمەس، زاماناۋي ءساننىڭ قازاق مادەنيەتىمەن ۇيلەسە الاتىنىن كورسەتۋ، - دەيدى.

ەكىنشى باعىت - ءارتۇرلى جاعدايعا ارنالعان دايىن كيىم ۇلگىلەرىن ۇسىنۋ. كاسىپكەردىڭ سوزىنشە، ولار تويعا، ۇيلەنۋ تويىنا، ۋنيۆەرسيتەتكە، جۇمىسقا جانە كۇندەلىكتى ومىرگە ارنالعان كيىم ۇلگىلەرىن كورسەتەدى. وسىلايشا كورەرمەنگە ۇلتتىق ناقىشتاعى كيىمدەردى قالاي ۇيلەستىرۋگە بولاتىنىن ءتۇسىندىرىپ، دايىن شەشىم ۇسىنادى.

- مۇنداي كونتەنت ادامنىڭ ۋاقىتىن ۇنەمدەيدى. ول قانداي كيىمدى نەمەن ۇيلەستىرۋ كەرەگىن ءوزى ويلاستىرىپ وتىرمايدى، ءبىز وعان دايىن ۇلگىلەردى ۇسىنامىز، - دەپ ءتۇسىندىردى كاسىپكەر.

ال ءۇشىنشى باعىت - تىكەلەي ەفيرلەر. سوڭعى ۋاقىتتا وسى فورماتتى بەلسەندى پايدالانا باستاعان. ەفير كەزىندە كورەرمەن كيىمگە قاتىستى سۇراقتارىن قويىپ، قاجەتتى مالىمەتتى سول بويدا الا الادى.

- كيىمدى ەگجەي-تەگجەيلى كورسەتىپ، ساۋالدارىنا جاۋاپ بەرەمىز. ول ءۇشىن ادامنىڭ مىندەتتى تۇردە دۇكەنگە كەلۋى قاجەت ەمەس. الەمنىڭ كەز كەلگەن جەرىنەن بايلانىسىپ، وزىنە كەرەكتى اقپاراتتى بىلە الادى، - دەيدى نۇرباقىت بايتان.

كاسىپكەردىڭ الەۋمەتتىك جەلىدەگى جۇمىسى ناقتى ناتيجەسىن دە بەرگەن. يۋليا كۋشنيردىڭ مالىمەتىنشە، نۇرباقىت بايتاننىڭ كاسىبىنە تيەسىلى پاراقشاعا ءبىر جىل ىشىندە 15 مىڭ جاڭا جازىلۋشى قوسىلعان. وسى كەزەڭدە ساتىلىم شامامەن 20 پايىزعا وسكەن. ال ءبىر ساعاتتىق تىكەلەي ەفير كەزىندە ورتا ەسەپپەن 15-20 ءوتىنىش ءتۇسىپ، اراسىنان 3-6 تۇتىنۋشى تاپسىرىس بەرەدى.

«جاستار اراسىندا تانىمالدىعىمىز ارتقانىن انىق بايقادىق»

ۇلتتىق ناقىشتاعى كۇندەلىكتى بۇيىمدار ۇسىناتىن تاعى ءبىر كاسىپكەر 2021-جىلى شاعىن عانا كەڭسەدە جۇمىسىن باستاعان. العاشىندا تەلەفون قاپتارىن ساتۋمەن اينالىسقان كومپانيا بۇگىندە تەرموس، سومكە جانە وزگە دە بۇيىمدار شىعارادى. بەس جىل ىشىندە ساۋدا ورىندارىنىڭ سانى ونعا جەتىپ، الماتى، استانا، شىمكەنت، اتىراۋ جانە اقتاۋ قالالارىندا دۇكەندەرى اشىلعان. ونىمدەرىن شەتەلگە دە جەتكىزەدى.

كاسىپورىننىڭ ماركەتولوگى دايانا سەيدالحاننىڭ ايتۋىنشا، 2023-جىلى كومپانيا الەۋمەتتىك جەلىدەگى جۇمىسىن كۇشەيتىپ، ارنايى كوماندا قۇرعان. بۇعان دەيىن ساتىپ الۋشىلارىنىڭ باسىم بولىگى 25-30 جاس ارالىعىنداعى ازاماتتار بولسا، ەندىگى ماقسات - جاستاردى كوبىرەك تارتۋ.

- العاشىندا TikTok ءۇشىن ارنايى كوماندا جۇمىس ىستەدى. بەينەجازبالارىمىز جاقسى قارالىم جيناپ، جاستار اراسىندا تانىلا باستادىق. قازىر ءارتۇرلى جەلىگە دايىنداعان كونتەنتىمىزدى وسى پلاتفورمادا دا جاريالايمىز. بۇدان بولەك، مەنەدجەرلەرىمىز كۇن سايىن تىكەلەي ەفيرگە شىعىپ، تاۋارلاردى كورسەتەدى، ەرەكشەلىكتەرىن ءتۇسىندىرىپ، باعاسىن ايتادى. وسى ءتاسىل ارقىلى ساتىلىمدى ارتتىرۋعا تىرىسىپ جاتىرمىز، - دەيدى ول.

ماركەتولوگتىڭ سوزىنشە، كەيبىر بەينەجازبالار كوپشىلىككە كەڭىنەن تاراپ، برەندتىڭ تانىلۋىنا ىقپال ەتكەن. ونلاين ساتىلىم دا وسكەن. دەگەنمەن كومپانيا ءار الەۋمەتتىك جەلىدەن تۇسكەن تاپسىرىستى جەكە ەسەپتەمەيدى، سوندىقتان دا ءوسىمنىڭ قانشاسى ناقتى ءبىر پلاتفورمانىڭ ۇلەسىنە تيەسىلى ەكەنىن ايتۋ قيىن.

- ءبىز ونلاين ساتىلىمنىڭ جالپى كورسەتكىشتەرىن ەسەپتەيمىز. ءبىراق جاستار اراسىندا تانىمالدىعىمىز ارتقانىن انىق بايقادىق، - دەيدى ول.

كوپشىلىككە تانىلعان سايىن ءونىم باعاسىنا قاتىستى سىن دا ايتىلا باستاعان. دايانا سەيدالحاننىڭ سوزىنشە، كەيبىر قولدانۋشىلار جەرگىلىكتى تاۋاردى قولداعىسى كەلگەنىمەن، قىمبات ەكەنىن العا تارتادى. كومپانيا بۇل پىكىرلەردى ەسكەرىپ، باعانى ازىرگە وسىرمەۋگە تىرىسىپ وتىر.

- ءبىز ساتىپ الۋشىلاردىڭ پىكىرىن تۇسىنەمىز. ءبىراق ءونىم شىعارۋ ارزان ەمەس. ونىڭ ۇستىنە ساپادان ۇنەمدەگىمىز كەلمەيدى. بۇيىمدارىمىزعا تابيعي بىلعارى، كەراميكا سياقتى ماتەريالدار قولدانامىز. باعانى ءوزىمىز دە تومەندەتكىمىز كەلەدى، ءبىراق وعان اسەر ەتەتىن بىرنەشە جاعداي بار، - دەيدى ماركەتولوگ.

دايانا سەيدالحان الەۋمەتتىك جەلىدەگى جۇمىس تاسىلدەرىن ۇنەمى جەتىلدىرىپ وتىرۋ ماڭىزدى ەكەنىن ايتادى. سوندىقتان كومپانيا وكىلدەرى TikTok ۇيىمداستىرعان كەزدەسۋگە قاتىسىپ، كورەرمەنگە قىزىقتى جاڭا فورماتتارمەن تانىسۋدى كوزدەگەن.

- قازىر قانداي كونتەنت ءوتىمدى ەكەنىن، قانداي جاڭا قۇرالداردى پايدالانۋعا بولاتىنىن بىلگىمىز كەلەدى. ءوز جۇمىسىمىزعا دا سىرت كوزبەن قاراپ، دۇرىس باعىتتا كەلە جاتقانىمىزدى باعالاۋ ماڭىزدى. ارينە، بۇل - ونىمدەرىمىزدى جاڭا اۋديتورياعا تانىستىرۋدىڭ تاعى ءبىر مۇمكىندىگى، - دەيدى.

سيفرلىق تەحنولوگيالاردى كاسىپتە كادەگە جاراتۋ قاجەتتىگىن مەملەكەت باسشىسى قاسىم-جومارت توقايەۆ تا ۇنەمى ايتادى. پرەزيدەنت كەشەگى جولداۋىندا دا ينتەرنەت قوعامدىق سانادا تۇتىنۋ مەن كوڭىل كوتەرۋدىڭ عانا ەمەس، جاسامپازدىق پەن ەڭبەكتىڭ ۆيرتۋالدى اۋماعىنا اينالۋى كەرەكتىگىن اتاپ ءوتتى.

- سمارتفوندار ازاماتتارىمىز ءۇشىن ۋاقىتتى زايا وتكىزەتىن قىمبات ويىنشىق ەمەس، ءتيىمدى جۇمىس ىستەۋگە مۇمكىندىك بەرەتىن قۇرالعا اينالۋعا ءتيىس. ۇكىمەت جىل سوڭىنا دەيىن سيفرلىق فورماتتا جۇمىسپەن قامتۋدىڭ جەڭىلدەتىلگەن قۇقىقتىق رەجيمىن قالىپتاستىرادى. حالىقتىق سيفرلىق ەكونوميكا قۇرۋ ءۇشىن ادامداردىڭ مۇمكىندىكتەرى تۇرعىلىقتى جەرىنە تاۋەلدى بولماۋى وتە ماڭىزدى. ازاماتتارىمىز اۋىلدا نەمەسە قالادا تۇرسا دا، سمارتفون ارقىلى زاڭدى تابىس تابۋدى ۇيرەنۋگە ءتيىس، - دەدى.

بۇل پىكىر كاسىپكەرلەردىڭ تاجىريبەسىمەن دە ۇندەسەدى. شاعىن بيزنەستىڭ قوس وكىلى كەلتىرگەن مىسالداردان-اق سمارتفوننىڭ تابىس كولەمىن ۇلعايتۋ باعىتىنداعى پايداسى بايقالادى.