شەتەلدىك ب ا ق- تاعى قازاقستان: قىتايعا تەمىرجول، توقايەۆتان «دوستىق» وردەنى، تۇركيامەن اسكەري ىنتىماقتاستىق

وسى اپتادا شەتەلدىك بىرنەشە باسىلىم Kazinform حالىقارالىق اقپارات اگەنتتىگىنە سىلتەمە جاساپ، قازاقستانعا قاتىستى جاڭالىقتاردى جاريالادى.

ونىڭ ىشىندە قازاقستاننىڭ قىتايعا قاراي سالاتىن تەمىرجولى، تۇركيامەن اسكەري ىنتىماقتاستىعى تۋرالى جازدى. بۇدان بولەك الەمدىك ب ا ق شەتەلدىك ينۆەستورلارعا اۋەجايدى سەنىمگەرلىك باسقارۋعا بەرۋ، وزبەكستانمەن جاسىل ەلەكتر ەنەرگياسىن ەكسپورتتاۋ تۋرالى كەلىسىمگە كەلگەنىن حابارلادى.

تولىعىراق Kazinform ساراپشىسىنىڭ شولۋىنان وقىڭىز.

قازاقستان قىتايعا اپاراتىن تەمىرجول سالادى

wam.ae باسىلىمى Kazinform-عا سىلتەمە جاساپ، اباي وبلىسىندا سالىناتىن جاڭا تەمىرجول جەلىسى تۋرالى حابارلادى.

قازاقستاننىڭ اباي وبلىسى قىتايمەن شەكاراداعى ءۇشىنشى تەمىرجول وتكىزۋ بەكەتىنە اپاراتىن «باقتى-اياگوز» باعىتى بويىنشا ۇزىندىعى 272 شاقىرىم بولاتىن جاڭا تەمىرجول جەلىسىنىڭ قۇرىلىسىن باستادى. بۇل تۋرالى Kazinform حابارلادى... جوبا ترانزيت-كولىك الەۋەتىن ارتتىرۋعا ارنالعان. قايتا قۇرىلىمداۋ اياسىندا قىتايمەن شەكارادا ءۇشىنشى وتكىزۋ پۋنكتى - باقتى-شاۋەشەك اشىلادى، - دەپ جازدى امىرلىكتەردەگى باسىلىم.

سونداي-اق، اقپارات اگەنتتىگى «باقتى-اياگوز» تەمىرجول جەلىسى قازاقستان مەن قىتاي اراسىنداعى ترانزيتتىك وتكىزۋ قابىلەتىن 28 ميلليون توننادان 48 ميلليون تونناعا دەيىن ارتتىرۋعا، وڭتۇستىكتەگى وتكىزۋ بەكەتتەرىندەگى كەپتەلىستى جويۋعا جانە قوسىمشا ترانزيت كولەمىن تارتۋعا مۇمكىندىك بەرەدى. تەمىرجول 2027-جىلى پايدالانۋعا بەرىلەدى دەپ جوسپارلانعان.

ايتا كەتەيىك، اباي وبلىسىندا مەملەكەتتىك-جەكەشەلىك ارىپتەستىك قاعيداتتارى بويىنشا جەكە ينۆەستوردىڭ قاتىسۋىمەن ءىرى جوبا جۇزەگە اسىرىلادى دەپ كۇتىلۋدە. تەمىرجول قۇرىلىسى بارىسىندا 11 ۆوكزال، 47 كوپىر، 23 تەمىرجول جانە سەگىز اۆتوموبيل وتكەلى، بەس جاياۋ جۇرگىنشىلەر كوپىرى سالىنادى.

قازاقستان شەتەلدىك ينۆەستورلارمەن اۋەجايدى سەنىمگەرلىك باسقارۋ جايلى كەلىسسوز جۇرگىزىپ جاتىر

قازاقستاننىڭ اقتوبە، تۇركىستان جانە قىزىلوردا اۋەجايلارىن سەنىمگەرلىك باسقارۋعا بەرۋ بويىنشا الەمنىڭ ءىرى ينۆەستورلارىمەن كەلىسسوزدەر جۇرگىزىلىپ جاتىر. بۇل تۋرالى Interfax ق ر كولىك ءمينيسترى مارات قارابايەۆقا سىلتەمە جاساپ حابارلادى.

ەلىمىزدىڭ اۋەجايلارىندا مۋلتيمودالدى ورتالىقتاردى قۇرۋ بويىنشا قاجەتتى تاجىريبەسى مەن كاپيتالى بار جەكە ينۆەستورلاردى بەلسەندى تۇردە تارتىپ جاتىرمىز. قازىرگى تالقىلاۋلار اقتوبە، تۇركىستان جانە قىزىلوردا اۋەجايلارىن باسقارۋدى تاجىريبەلى الەمدىك ينۆەستورلارعا تاپسىرۋعا باعىتتالعان، - دەپ كەلتىردى ءمينيستردىڭ ءسوزىن باسىلىم.

ب ا ق- تىڭ مالىمەتىنشە، استانا، الماتى جانە شىمكەنت قالالارىنىڭ اۋەجايىندا جەكە ينۆەستورلاردى تارتۋ جۇمىستارى اياسىندا ۇشۋ-قونۋ جولاقتارىن، جانار-جاعارماي قۇيۋ كەشەندەرىن قايتا جاڭارتۋ، سونداي-اق جولاۋشىلار جانە جۇك تەرمينالدارىن كەڭەيتۋ جۇمىستارى كەزەڭ-كەزەڭىمەن جۇرگىزىلىپ جاتىر.

قازاقستان مەن وزبەكستان جاسىل ەلەكتر ەنەرگياسىن ەكسپورتتاۋ تۋرالى كەلىسىمگە كەلدى

قازاقستان مەن وزبەكستان جاسىل ەلەكتر قۋاتىن ازەربايجان ارقىلى ەۋروپاعا ەكسپورتتاۋ تۋرالى كەلىسىمگە كەلدى، دەپ حابارلايدى Azernews ازەربايجاننىڭ ەنەرگەتيكا ءمينيسترى پارۆيز شاحبازوۆتىڭ ازەربايجان-تۇرىك ينۆەستيتسيالىق فورۋمىنداعى سوزىنە سىلتەمە جاساپ.

ازەربايجان ءمينيسترى ناحچىۆان ارقىلى تۇركياعا باراتىن ەنەرگەتيكالىق ءدالىز بويىنشا ەكى ەلدىڭ كەڭەيتىلگەن جۇمىس توبى قۇرىلاتىنىن مالىمدەدى.

شاحبازوۆ الداعى ۋاقىتتا ازەربايجان ءتۇرلى باعىت بويىنشا 5000 مۆتقا دەيىن جاسىل ەنەرگيانى ەكسپورتتاۋدى جوسپارلاپ وتىرعانىن، ونىڭ ىشىندە 1000 مۆت ناحچىۆان اۆتونوميالىق رەسپۋبليكاسى ارقىلى ەكسپورتتاۋدى جوسپارلاپ وتىرعانىن ەسكە سالدى، - دەپ جازدى ازەربايجاندىق باسىلىم.

قىتاي قازاقستاننىڭ كاسپي پورتتارىنداعى ينفراقۇرىلىمدى زەرتتەپ جاتىر

Eurasianet باسىلىمى ەلىمىزدىڭ كولىك مينيسترلىگىنە سىلتەمە جاساپ قىتايلىق Shipbuilding Industry Corp. كومپانياسى قازاقستاننىڭ اقتاۋ جانە قۇرىق پورتىندا كونتەينەرلىك قوندىرعىلار سالۋ مۇمكىندىگىن زەرتتەپ جاتقانىن حابارلادى.

مينيسترلىك مالىمدەمەسىندە China Railways Group Ltd. قولدانىستاعى باعىتتاردى مودەرنيزاتسيالاۋ جانە جاڭا تەمىرجول جەلىلەرىن سالۋ جوبالارىنا قىزىعۋشىلىق تانىتقانى ايتىلعان. تالقىلاۋدان كەيىن ازىرگە ناقتى مامىلەلەرگە قول قويىلعان جوق، - دەپ جازدى باسىلىم.

قازاقستان مەن تۇركيا اسكەري ىنتىماقتاستىقتى كەڭەيتۋدە سەنىمدى تۇردە العا جىلجىپ كەلەدى

jamestown باسىلىمى Kazinform عا سىلتەمە جاساپ، ق ر قورعانىس مينيسترلىگى تۇرىكتىڭ ۇشقىشسىز باسقارىلاتىن ۇشاقتارىن شىعارۋ ءۇشىن وتاندىق كومپانيانى تاڭداۋ پروتسەسى ءجۇرىپ جاتقانىن حابارلادى. وسىلايشا، بۇل مالىمدەمە تۇركيانىڭ Anka ۇشقىشسىز ۇشاتىن اپپاراتتارىن (ۇ ۇ ا) قازاقستاندا ءوندىرۋ 2024-جىلى باستالادى دەگەن بۇرىن جاريالانعان حاباردى راستاپ وتىر.

استانا مەن انكارا 2022-جىلدىڭ مامىرىندا بۇل درونداردى بىرلەسىپ شىعارۋ تۋرالى كەلىسىمگە كەلگەن. سول كەزدە قازاقستان ماشينا جاساۋ جانە تۇرىك اەروعارىش ونەركاسىبى اسكەري-تەحنيكالىق سالاداعى ىنتىماقتاستىق تۋرالى ءوزارا تۇسىنىستىك مەموراندۋمىنا قول قويىپ، قازاقستاندا درون قۇراستىرۋ جانە تەحنيكالىق قىزمەت كورسەتۋ جەلىسىن سالۋ جوسپارىن جاريالادى. كەلىسىمنىڭ ارقاسىندا قازاقستان تۇرىك جاۋىنگەرلىك ۇشقىشسىز ۇشاقتارىن شىعاراتىن العاشقى شەتەل مەملەكەتى بولماق، - دەپ جازدى باسىلىم.

قازاقستان پرەزيدەنتى با ءا ەلشىسىنە «دوستىق» وردەنىن تابىس ەتتى

قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ بىرىككەن اراب امىرلىكتەرىنىڭ قازاقستانداعى ەلشىسى دوكتور مۇحاممەد سايد مۇحاممەد ءال-الاريكيدىڭ ەكىجاقتى قارىم-قاتىناستار مەن ىنتىماقتاستىق بايلانىستارىن نىعايتۋداعى كۇش-جىگەرىن جوعارى باعالاي وتىرىپ، ەكىنشى دارەجەلى «دوستىق» وردەنىن تابىس ەتتى. بۇل تۋرالى wam باسىلىمى جازدى.

قازاقستاننىڭ ەلورداسى استاناداعى پرەزيدەنت سارايىندا وتكەن كەزدەسۋدە قاسىم- جومارت توقايەۆ ءباا مەن قازاقستاندى بايلانىستىراتىن ديپلوماتيالىق جانە بەرىك قارىم-قاتىناستاردى، ب ا ءا حالىقارالىق دەڭگەيدەگى ۇستانىمىن جوعارى باعالايتىنىن ءمالىم ەتتى، - دەپ جازدى باسىلىم.

سونداي-اق، باسىلىمنىڭ مالىمەتىنشە، ەلشى ءال-الاريكي مارتەبەلى ماراپاتتى تاپسىرعانى ءۇشىن پرەزيدەنت توقايەۆقا العىس ءبىلدىردى. ول قازاقستان رەسپۋبليكاسىنا گۇلدەنىپ، وركەندەي بەرۋىن تىلەدى جانە ەكى ەلدىڭ ءوزارا مۇددەسىنە ساي كەلەتىن ءتۇرلى سالاداعى ەكىجاقتى بايلانىستاردى نىعايتۋعا جانە دامىتۋعا باعىتتالعان ب ا ءا مەن قازاقستان باسشىلىعىنىڭ كۇش-جىگەرىنە ريزاشىلىعىن ءبىلدىردى.