تەك قولما-قول تولەم: ساۋداگەرلەردىڭ مۇنداي تالابى زاڭدى ما
ماڭعىستاۋ وبلىستىق مەملەكەتتىك كىرىستەر دەپارتامەنتى ەگەر كاسىپكەرلەر كارتامەن تولەم جاساۋدان باس تارتاتىن بولسا نە ىستەۋ كەرەگىن ءتۇسىندىردى، دەپ حابارلايدى Kazinform.
«جەكە كاسىپكەرلەر كارتامەن تولەمدى قابىلداۋدان باس تارتىپ، كورسەتىلگەن قىزمەتكە، تاۋارعا قولما-قول اقشانى تالاپ ەتەتىن جاعدايلار كەزدەسەدى. كارتامەن تولەم قابىلداۋدان باس تارتۋ زاڭسىز. سەبەبى قازاقستان رەسپۋبليكاسىنىڭ «تولەم مەن تولەم جۇيەلەرى تۋرالى» زاڭ نورمالارىندا ءتۇرلى تولەم تاسىلدەرى - بانك كارتاسى، QR نەمەسە قولما-قول اقشا قاراستىرىلعان (25-باپ). كاسىپكەرلەردىڭ تولەم كارتالارى ارقىلى تولەم قابىلداۋدان باس تارتقانى ءۇشىن اكىمشىلىك جاۋاپكەرشىلىك بار: بىرىنشىسىندە ءجاي ەسكەرتۋ بولسا، قايتا ەرەجە بۇزعاندا 147680 تەڭگە (40 م ر پ) كولەمىندە ايىپپۇل سالىنادى (ق ر اكىمشىلىك قۇقىقبۇزۋشىلىق تۋرالى كودەكستىڭ 194-بابى)»، - دەپ ءتۇسىندىردى دەپارتامەنت وكىلدەرى.
ۆەدومستۆونىڭ ايتۋىنشا، كارتامەن تولەم قابىلداۋدان باس تارتۋ جاعدايلارى تۋرالى مەملەكەتتىك كىرىستەر ورگاندارىنا حابارلاۋ قاجەت (eOtinish ارقىلى راستايتىن قۇجاتتاردى جۇكتەي وتىرىپ نەمەسە Wipon Cashback تەگىن قوسىمشاسى ارقىلى ارىزدانۋعا بولادى).
تاۋارلاردى ساتقاندا نەمەسە قىزمەت كورسەتكەندە كاسىپكەرلەر ساتىپ الۋشىعا فيسكال چەك بەرۋى قاجەت. چەك بەرۋدەن باس تارتقاندار اكىمشىلىك جاۋاپقا تارتىلادى.
