تەك انشىلەرگە ەمەس: «ءشامشى قالداياقوۆ» مەدالى كىمدەرگە بەرىلەدى؟
استانا. KAZINFORM - قۇرىلتايدا «قازاقستان رەسپۋبليكاسىنىڭ مەملەكەتتىك ناگرادالارى تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى زاڭ جوباسى قارالدى. الەۋمەتتىك-مادەني دامۋ كوميتەتىنىڭ مۇشەسى ەكاتەرينا سمولياكوۆا قوسىمشا بايانداما جاساپ، قۇجات اياسىندا «ءشامشى قالداياقوۆ» مەدالى مەن «قازاقستاننىڭ ەڭبەك سىڭىرگەن سۋرەتشىسى» قۇرمەتتى اتاعىن ەنگىزۋدى ۇسىندى.
وسىدان كەيىن دەپۋتات گۇلىسحان ناحبايەۆا مەدالدى تاعايىنداۋ تالاپتارىنا قاتىستى مادەنيەت جانە اقپارات ءبىرىنشى ۆيتسە- ءمينيسترى قانات ىسقاقوۆقا ساۋال جولدادى.
دەپۋتاتتىڭ ايتۋىنشا، ءشامشى قالداياقوۆتىڭ ەسىمى حالىققا سۇيىكتى اندەرىمەن تىعىز بايلانىستى. سوندىقتان ول ماراپاتتا ءان اۆتورلارىنا باسىمدىق بەرىلە مە، الدە مۋزىكالىق پەداگوگيكا مەن جاس تالانتتاردى تاربيەلەۋگە ۇلەس قوسقان ماماندار دا ۇمىتكەر بولا الا ما دەپ سۇرادى. قانات ىسقاقوۆتىڭ ايتۋىنشا، مەدالدىڭ قامتۋ اياسى كەڭ بولادى.
بۇل تەك ەسترادالىق نەمەسە ءداستۇرلى ءان ورىنداۋشىلارعا عانا بەرىلمەيدى. كومپوزيتورلار، ديريجەرلەر، ءان اۆتورلارى، سونداي-اق مۋزىكا ونەرىنە ۇلەس قوسقان ۇستازدار مەن دارىندى ورىنداۋشىلار دا ماراپاتقا ۇمىتكەر بولا الادى، - دەدى ۆيتسە-مينيستر.
ونىڭ سوزىنشە، مەدالدى تاعايىنداۋ كەزىندە ازاماتتاردىڭ ونەرگە قوسقان ۇلەسى مەن شىعارماشىلىق جەتىستىكتەرى ەسكەرىلەدى.
زاڭ جوباسىندا وتاندىق مۋزىكا ونەرى مەن ءان شىعارماشىلىعىن دامىتۋعا ەرەكشە ەڭبەك سىڭىرگەن ازاماتتاردى «ءشامشى قالداياقوۆ» مەدالىمەن ماراپاتتاۋ ۇسىنىلعان. ال «قازاقستاننىڭ ەڭبەك سىڭىرگەن سۋرەتشىسى» قۇرمەتتى اتاعىن بەينەلەۋ ونەرىندە جوعارى كاسىبي شەبەرلىك تانىتىپ، وتاندىق كوركەم مادەنيەتتى دامىتۋعا ۇلەس قوسقان قايراتكەرلەرگە بەرۋ كوزدەلگەن.
قۇرىلتاي دەپۋتاتتارى زاڭ جوباسىن ءبىرىنشى وقىلىمدا ماقۇلدادى.
