تەحاستاعى سۋ تاسقىنى: قازا تاپقاندار سانى 100 دەن استى، 28 بالا بار
استانا. KAZINFORM - ا ق ش- تىڭ تەحاس شتاتىنداعى كۇشتى سۋ تاسقىنى سالدارىنان، سوڭعى مالىمەتتەر بويىنشا، 104 ادام قازا تاپتى، ونىڭ ىشىندە 28 بالا بار. اپاتتان كەيىن ءتورت كۇن وتسە دە، 24 ادام ءالى دە حابار-وشارسىز كەتكەندەر قاتارىندا، دەپ جازدى BBC.
جەرگىلىكتى بيلىكتىڭ مالىمەتىنشە، ەڭ كوپ زارداپ شەككەن كەرر وكرۋگىندە دۇيسەنبى كەشىنە قاراي 84 ادامنىڭ قازا تاپقانى راستالدى، تاعى 11 ادام ءىز-ءتۇزسىز جوعالعاندار قاتارىندا.
تريەۆيس، بەرنەت، ۋيليامسون، كەندالل جانە توم گرين اتتى بەس وزگە وكرۋگتە 20 ادامنىڭ قازا تاپقانى راستالدى، تاعى 13 ادام حابارسىز كەتكەن.
ا ق ش- تىڭ ۇلتتىق مەتەورولوگيالىق قىزمەتىنىڭ دەرەكتەرىنە سايكەس، 4-شىلدەگە قاراعان ءتۇنى كەرر وكرۋگىنىڭ ءبىر بولىگىندە ءۇش-تەن التى ساعات ارالىعىندا 125 تەن 250 م م- گە دەيىن جاۋىن- شاشىن تۇسكەن. بۇل وڭىردە شىلدە ايىندا ادەتتە 50 م م شاماسىندا عانا جاۋىن تۇسەدى. دەمەك، كەيبىر ايماقتارعا بىرنەشە ساعات ىشىندە ايلىق نورمادان ءتورت- بەس ەسە كوپ جاۋىن جاۋعان.
دونالد ترامپ تەحاس شتاتىندا توتەنشە جاعداي رەجيمىن ەنگىزدى.
ەسكە سالساق، تەحاستا نوسەر جاڭبىردان كەيىن سۋ تاسقىنى بولىپ، قۇتقارۋشىلار ءالى كۇنگە دەيىن وزەن جاعالاۋلارىن تەكسەرىپ، جوعالعانداردى ىزدەۋ ءۇشىن ۇيىندىلەردى قوپاردى.
قازاقستان پرەزيدەنتى قاسىم-جومارت توقايەۆ دونالد ترامپقا تەحاس شتاتىنداعى الاپات سۋ تاسقىنى سالدارىنان كوپتەگەن ادامنىڭ، سونىڭ ىشىندە بالالاردىڭ قازا تاپقانىنا بايلانىستى كوڭىل ايتۋ جەدەلحاتىن جولدادى.
