Telegram العاش رەت 540 ميلليون دوللار پايداعا كەنەلدى
استانا. قازاقپارات - 2024-جىلدىڭ قورىتىندىسى بويىنشا Telegram مەسسەندجەرى العاش رەت پايداعا شىقتى - كومپانيا 540 ميلليون دوللار تابىس تاپقان. بۇل تۋرالى Delo.ua سايتى حابارلايدى.
بۇل قارجىلىق جەتىستىككە Telegram فرانسۋز بيلىگى تاراپىنان ونىڭ نەگىزىن قالاۋشىعا باعىتتالعان سوت قىسىمدارى اياسىندا جانە سەرىكتەستىك جوبالار مەن كريپتوەكوجۇيەدەن تۇسكەن تابىستىڭ كۇرت ءوسۋى ناتيجەسىندە قول جەتكىزدى.
Financial Times-تىڭ قولىنا تۇسكەن ىشكى پرەزەنتاتسياعا سايكەس، 2024-جىلى Telegram-نىڭ كىرىسى 1,4 ميلليارد دوللارعا جەتىپ، وتكەن جىلمەن سالىستىرعاندا (343 ميلليون دوللار) ءتورت ەسە ارتقان. ال 2023-جىلى كومپانيا 173 ميلليون دوللار شىعىنعا باتقان بولاتىن.
بۇل قارجىلىق كورسەتكىشتەر ينۆەستورلارعا جاڭا 1,5 ميلليارد دوللار كولەمىندەگى وبليگاتسيالار شىعارۋدىڭ الدىندا تانىستىرىلعان. قارىز ساتۋ ناۋقانى سەيسەنبى كۇنى باستالدى جانە الداعى كۇندەرى اياقتالۋى مۇمكىن.
اقپارات كوزدەرىنىڭ ايتۋىنشا، Telegram تابىسىن نەگىزىنەن تولەم جاساۋعا قابىلەتتى قولدانۋشىلار سانىنىڭ ارتۋى، پرەميۋم جازىلىمدار جانە Ton بلوكچەينى مەن Toncoin كريپتوۆاليۋتاسىمەن بايلانىستى ەكوجۇيەنىڭ دامۋى قامتاماسىز ەتىپ وتىر. پلاتفورما ءۇشىنشى تاراپ ازىرلەۋشىلەرىنە ساۋدا، ويىندار جانە ءتۇرلى قىزمەت سالالارى بويىنشا شاعىن قوسىمشالار جاساۋعا مۇمكىندىك بەرىپ، ودان قوسىمشا تابىس تاۋىپ وتىر.
2024-جىلى كومپانيا تومەندەگىدەي تابىس كوزدەرىنەن قارجى العان:
• جارنامادان - 250 ميلليون دوللار؛
• پرەميۋم جازىلىمداردان - 292 ميلليون دوللار؛
• جالپى تابىستىڭ جارتىسىنا جۋىعى - Ton ەكوجۇيەسى مەن سەرىكتەستىكتەردەن.
Telegram وسى جىلى تابىسىن 2 ميلليارد دوللارعا دەيىن ۇلعايتۋدى، ال پايداسىن 720 ميلليون دوللارعا جەتكىزۋدى جوسپارلاپ وتىر. 2025-جىلعى اقپان ايىنداعى جاعداي بويىنشا مەسسەندجەردىڭ قولما- قول قورى 530 ميلليون دوللاردى قۇراعان (كريپتواكتيۆتەر ەسەپكە الىنباعان).
سونىمەن قاتار كومپانيا IPO (قوعامدىق اكسيالار ساتۋ) مۇمكىندىگىن دە قاراستىرىپ وتىر. الايدا Telegram مەن ونىڭ باسشىلىعىنا قاتىستى فرانسياداعى تەرگەۋ بۇل جوسپارعا كەدەرگى كەلتىرۋى مۇمكىن. فرانتسيا مەن ءباا ازاماتتىعى بار پاۆەل دۋروۆ پلاتفورماداعى كەيبىر كونتەنت -تىيىم سالىنعان ماتەريالدار مەن تەرروريزمگە بايلانىستى اقپارات - ءۇشىن قىسىمعا ۇشىراپ وتىر.
دۋروۆتىڭ ءوزى فرانسۋز بيلىگىنىڭ ارەكەتتەرىنىڭ ساياسي استارى بار ەكەنىن ايتتى. ول فرانسيانىڭ بارلاۋ قىزمەتىن رۋمىنياداعى سايلاۋ الدىندا ساياسي كونتەنتكە اسەر ەتۋگە تىرىستى دەپ ايىپتاپ، اسىرەسە كونسەرۆاتيۆتىك پىكىرلەرگە شەكتەۋ قويۋ تالابىن اتادى.
زاڭدىق تاۋەكەلدەرگە قاراماستان، Telegram جاساندى ينتەللەكت سالاسىنداعى سەرىكتەستىكتەرىن كەڭەيتىپ كەلەدى. كومپانيا يلون ماسكتىڭ xAI ستارتاپىنا تيەسىلى Grok اتتى چات-بوتپەن ينتەگراتسيانى جانە ونى مونەتيزاتسيالاۋ جوسپارلارىن جاريا ەتتى.
قازىرگى تاڭدا Telegram دا اي سايىن 1 ميللياردتان استام بەلسەندى قولدانۋشى بار. مەسسەندجەر نەبارى 60 قىزمەتكەردەن تۇراتىن شاعىن كوماندامەن باسقارىلىپ، مودەراتسيا قىزمەتتەرى كوبىنە اۋتسورسينگ ارقىلى جۇزەگە اسىرىلادى.
ەسكە سالا كەتەيىك، فرانسيا پروكۋراتۋراسى دۋروۆقا ا ق ش- قا بارۋعا رۇقسات بەرمەگەنىن جازعان بولاتىنبىز.
ونىڭ الدىندا دۋروۆ «Telegram ەۋروپالىق وداق زاڭىن بۇزدى دەۋ - ادىلەتسىزدىك» دەپ دابىل قاققان بولاتىن.
