تۋعانىنا 100 جىل: ەلورداداعى مەكتەپكە راقىمجان قوشقاربايەۆتىڭ اتى بەرىلدى
استانا. KAZINFORM - رەيحستاگقا جەڭىس تۋىن تىككەن راقىمجان قوشقاربايەۆتىڭ تۋعانىنا بيىل 100 جىل. جەڭىس كۇنى قارساڭىندا داڭقتى ەردىڭ ەسىمى ەلورداداعى №44 مەكتەپكە بەرىلدى، - دەپ حابارلايدى 24kz ارناسى.
مەكتەپتە مەموريالدى ەسكەرتكىش تاقتا مەن اسكەري سىنىپ اشىلدى. ەرلىگى بارشاعا ايان قاھارماننىڭ ەسىمى وسىلاي ۇلىقتالدى.
"وتان ءۇشىن وتقا ءتۇس، كۇيمەيسىڭ» دەگەن قازاقتا ماقال بار. سول سياقتى ءبىزدىڭ ميسسيامىز - وسكەلەڭ ۇرپاقتارىمىزدى پاتريوتتىق تاربيەگە باۋلۋ"، - دەدى راقىمجان قوشقاربايەۆ اتىنداعى №44 مەكتەپ ديرەكتورى ءلاززات قۇلتايەۆا.
سالتاناتتى ءىس- شاراعا باتىردىڭ تۋىستارى دا قاتىستى. ولار بۇل ءساتتى كوپ كۇتكەنىن ايتادى. ايبىندى ەردىڭ كوزى تىرىسىندە سىي- قۇرمەت بىلاي تۇرسىن، ەرلىگى ەسكەرىلمەگەندىگى دە ايتىلىپ قالدى.
"تۋدى تىككەندە قاھارمان اتىن بەردى عوي. باتىرلىقتى بەرگەن جوق. بەرمەگەنى - اكەسى قوشقاربايدى كۋلاك دەپ، ۆراگ نارودا دەپ، اتامىزدىڭ جەرىن الىپ قويعان دا، كارى كىسى بولعان. جابۋعا جاراماعان. ەندى بىرەۋدى جابۋ كەرەك قوي. اتاسى قوشقاربايدى الىپ كەتكەن"، - دەدى قوشقاربايەۆتىڭ كەلىنى قالام تەمىروۆا.
راقىمجان قوشقاربايەۆ كوزى تىرىسىندە ءوزى جايىندا ايتىپ، جاريا قىلماعان. سودان تاريح بارىنشا بۇرمالانىپ، ەرلىگى ەسكەرىلمەي كەلدى. ول ومىردەن وتكەننەن كەيىن اراعا تەك 11 جىل سالىپ، باتىرعا "حالىق قاھارمانى" اتاعى بەرىلدى.
"ءومىرى ايتپايتىن. سوعىس تۋرالى ءسوزدى ءبولىپ جىبەرەتىن. سوعىس تۋرالى سەندەر ايتپاڭدارشى، كورمەڭدەرشى. سەندەر بىلمەي- اق قويىڭدارشى دەپ. مەن ءوزىمنىڭ پاتريوتتىق بورىشىمدى ورىندادىم. ماعان بۇيرىق بەردى. مەن بۇيرىقتى ورىندادىم دەيتىن"، - دەدى قوشقاربايەۆتىڭ نەمەرە قارىنداسى مارجان نۇرماعانبەتوۆا.
بيىل ەل بويىنشا راحىمجان قوشقاربايەۆتىڭ 100 جىلدىق مەرەيتويى اتاپ وتىلەدى. وسىعان وراي، سوعىس ارداگەرىنىڭ ومىرىنەن سىر شەرتەتىن كورمەلەر اشىلادى. ال جاقىندا اقمولا وبلىسى تايتوبە اۋىلىندا باتىردىڭ ءبيۋستىن ورناتۋ جوسپاردا بار. بۇعان دەيىن مەملەكەت باسشىسى قاسىم- جومارت توقايەۆ كورنەكتى تاريحي تۇلعالاردى قۇرمەتتەۋ ماڭىزدى ەكەنىن ايتقان بولاتىن.
"ايبىن وردەنى كادىمگى اسكەري ەرلىگى ءۇشىن بەرىلەتىن وردەن. ونىڭ ۇلكەن سيمۆولدىق ءمانى بار دەپ ايتۋعا بولادى. ءبىز ءوزىمىزدىڭ تاريحي قازاقستاننىڭ مۇراگەرى رەتىندە ءبىزدىڭ باتىرلارىمىزدىڭ مۇراگەرى دەپ كورسەتىپ جاتىرمىز"، - دەدى ءماجىلىس دەپۋتاتى ەركىن ءابىل.
سىن ساعاتتا ەلىن قورعاعان ارداگەرلەرىمىزدى قۇرمەتتەۋ - پارىز. ال بۇگىندە باتىردىڭ ەرلىگى ەسكەرۋسىز قالمادى. Ⅲ دارەجەلى ايبىن وردەنى ەندى راقىمجان قوشقاربايەۆ ەسىمىمەن اتالاتىن بولدى.
