تبيليسيدە پارلامەنت عيماراتى ماڭىنداعى شەرۋلەردە پوليتسيانىڭ 32 قىزمەتكەرى جاراقات الدى
استانا. KAZINFORM - گرۋزيا استاناسى تبيليسيدە پوليتسيا مەن نارازىلىق بىلدىرۋشىلەر اراسىندا قاقتىعىس بولىپ، 40-تان استام ادام ۇستالدى. ونىڭ اراسىندا زارداپ شەككەندەر دە بار، دەپ حابارلايدى Kazinform مەنشىكتى ءتىلشىسى.
تبيليسيدەگى ستيحيالى شەرۋ پرەمەر-مينيستر يراكلي كوباحيدزەنىڭ بەيسەنبى كۇنى بيلىكتەگى «گرۋزين ارمانى - دەموكراتيالىق گرۋزيا» پارتياسى ەۋرووداققا كىرۋ تۋرالى كەلىسسوزدەر ماسەلەسىن 2028 -جىلدىڭ سوڭىنا دەيىن كۇن تارتىبىنە قوسپاۋ جانە قاۋىمداستىق تاراپىنان بيۋدجەتتىك گرانتتاردان باس تارتۋ تۋرالى شەشىم قابىلداعانىن مالىمدەگەننەن كەيىن باستالدى.
گرۋزيانىڭ ىشكى ىستەر مينيسترلىگى قوعامدىق قاۋىپسىزدىككە قاۋىپ ءتونىپ تۇرعانىن العا تارتىپ، شەرۋشىلەردى تاراپ كەتۋگە بىرنەشە رەت شاقىرعان. الايدا شيەلەنىس ءبىر تۇندە كۇشەيىپ، شەرۋشىلەر مەن پوليتسيا اراسىندا قاقتىعىس باستالدى.
ىشكى ىستەر مينيسترلىگىنىڭ حابارلاۋىنشا، شەرۋشىلەر پوليتسياعا شىنى بوتەلكەلەر، تاستار، مەتال جانە پيروتەحنيكالىق زاتتار لاقتىرىپ، ينفراقۇرىلىمعا، جول توسەمىنە جانە بەينەباقىلاۋ كامەرالارىنا زاقىم كەلتىرگەن. جەكەلەگەن نىساندار دا ورتەنىپ، بارريكادالار ورناتىلدى، ال تبيليسي قالالىق اكىمشىلىگى مەن جەكە تۇلعالاردىڭ مۇلكىنە زيان كەلتىرىلدى.
«ميتينگكە قاتىسۋشىلاردىڭ زاڭسىز جانە زورلىق-زومبىلىق ارەكەتتەرى سالدارىنان ءى ءى م-نىڭ 32 قىزمەتكەرى زارداپ شەكتى. ولاردىڭ كەيبىرى باسى، كوزى، دەنەسى اۋىر جاراقات العان. 13 قىزمەتكەرگە وتا جاسالدى. زارداپ شەككەندەردىڭ ءبىرى ءالى دە مەديتسينالىق مەكەمەدە جاتىر»، - دەلىنگەن ۆەدومستۆو حابارلاماسىندا.
گرۋزيانىڭ ءى ءى م ارنايى قۇرالداردى قولدانۋ تۋرالى ەسكەرتىپ، ميتينگ «جيىندار مەن شەرۋلەر تۋرالى زاڭنىڭ شەڭبەرىنەن شىعىپ كەتتى» دەپ مالىمدەدى. قاۋىپسىزدىك كۇشتەرى تبيليسي ورتالىعىنداعى رۋستاۆەلي داڭعىلىندا جينالعان شەرۋشىلەرگە قارسى سۋ اتقىشتار مەن كوزدەن جاس اعىزاتىن گاز قولداندى.
29-قاراشا كۇنى تاڭەرتەڭ ۆەدومستۆو دەمونسترانتتار تاراتىلىپ، 43 ادامنىڭ ۇستالعانى تۋرالى حابارلادى. ميتينگىدە تىركەلگەن زاڭ بۇزۋشىلىقتار بويىنشا - مۇلىكتى ءبۇلدىرۋ نەمەسە جويۋ، پوليتسيا قىزمەتكەرىنە شابۋىل جاساۋ باپتارى بويىنشا قىلمىستىق ىستەر قوزعالدى.
نارازىلىقتارعا جاۋاپ رەتىندە گرۋزيا پارلامەنتىنىڭ باسشىلىعى قاۋىپسىزدىكتىڭ قىزىل دەڭگەيىن جاريالادى. بۇل شەشىم ە و-عا كىرۋ جونىندەگى كەلىسسوزدەردىڭ توقتاتىلۋىنا بايلانىستى قابىلداندى.
«قىزىل دەڭگەي كەزىندە گرۋزيا پارلامەنتىنە قاۋىپ ەرەكشەلىكتەرىن ەسكەرە وتىرىپ، پارلامەنت اپپاراتىنىڭ باسشىسى بەلگىلەگەن ادامداردان باسقا ەشكىم كىرگىزىلمەيدى»، - دەپ حابارلادى زاڭ شىعارۋشى ورگاننىڭ باسپا ءسوز قىزمەتى.
شەرۋشىلەرگە گرۋزيا پرەزيدەنتى سالومە زۋرابيشۆيلي دە قوسىلدى. ول بيلىكتى پارلامەنت سايلاۋىن قايتا وتكىزۋگە شاقىردى.
بۇرىن حابارلانعانداي، بيلىك پارتياسى ەل پرەزيدەنتتىگىنە بۇرىنعى فۋتبولشى ميحايل كاۆەلاشۆيليدى ۇسىندى. گرۋزيا وپپوزيتسياسى 26-قازانداعى سايلاۋدان كەيىن نارازىلىق شەرۋلەرىن تۇراقتى تۇردە وتكىزۋگە ۋادە بەردى.
ەسكە سالساق، گرۋزيا پارلامەنتى جالپى وتىرىستا پرەزيدەنت سايلاۋىنىڭ مەرزىمىن بەلگىلەدى.
داۋىس بەرۋگە پارلامەنتتىڭ 85 دەپۋتاتى تىركەلدى. 80 دەپۋتات سايلاۋدى 14-جەلتوقساندا وتكىزۋدى قولداپ، بىردە-ءبىرى قارسىلىق بىلدىرمەدى.
اۆتور
زارينا تۋعانبايەۆا
