فۋتبولدان قازاقستان قۇراماسىنىڭ باس باپكەرى قىزمەتىنەن كەتەدى
استانا. KAZINFORM - قازاقستان فۋتبول فەدەراتسياسىنىڭ (ق ف ف) باس حاتشىسى سكوتت مانن ۇلتتىق قۇرامانىڭ باس باپكەرى دجون ۆان ’ت شكيپپەن كەلىسىمشارت مەرزىمى ۇزارمايتىنىن مالىمدەدى.
17-قاراشادا سكوتت مانن ۇلتتار ليگاسىنىڭ قورىتىندىسى جايلى باسپا ءسوز ءماسليحاتىن وتكىزدى.
«كەلىسىمشارت وسى اپتانىڭ سوڭىندا اياقتالادى. ءبىز دە، ول دا ونى ۇزارتۋعا نيەتتى ەمەسپىز. ەندى ءبىزدى ەۋروپا چەمپيوناتىنا شىعارا الاتىن، ۇزاق مەرزىمگە جۇمىس ىستەيتىن باس باپكەردى ىزدەۋگە كىرىسەمىز»، - دەدى سكوتت مانن.
باس حاتشى نيدەرلاندىلىق ماماننىڭ جالاقىسى قۇرامانىڭ بۇرىنعى باپكەرى تالعات بايسۋفينوۆتىكىمەن بىردەي بولعانىن دا اتاپ ءوتتى.
«دجون وسىندا كەلىپ، تالعاتپەن بىردەي جالاقى الۋعا كەلىستى»، - دەدى ول.
بۇعان دەيىن سلوۆاكيا قۇراماسىنا قارسى سوڭعى ماتچتان كەيىنگى باسپا ءسوز ءماسليحاتىندا ۆان ’ت شكيپ ۇلتتىق قۇراماداعى جۇمىسىن اياقتاۋ جوسپارى تۋرالى سۇراققا جاۋاپ بەرگەن ەدى.
«مەن قازاقستاندا تامىز ايىنان بەرى جۇمىس ىستەپ كەلەمىن. مىندەتىم ۇلتتار ليگاسىندا كوماندانى باستاپ شىعۋ بولاتىن. قازىر ءبىز ءدال وسى كەزەڭگە كەلىپ وتىرمىز»، - دەدى باپكەر.
نيدەرلاندىلىق مامان قازاقستان قۇراماسىن 2026-جىلعى 7-تامىزدا قابىلداپ الدى. ونىڭ جەتەكشىلىگىمەن كوماندا ۇلتتار ليگاسىندا التى ماتچ وتكىزىپ، بىردە-ءبىر رەت جەڭىسكە جەتە المادى. قازاقستان مولدوۆادان ەكى رەت ۇتىلىپ، فارەر ارالدارىمەن ەكى كەزدەسۋدە دە تەڭ ءتۇستى. سونداي-اق سلوۆاكيادان سىرت الاڭدا جەڭىلىپ، ءوز الاڭىندا تەڭ وينادى.
تۋرنير بارىسىندا باس باپكەر توپتا ءبىرىنشى ورىن الۋدى ماقسات ەتكەنىن ايتقان بولاتىن.
ۆان ’ت شكيپ كەلگەنگە دەيىن دە ۇلتتىق قۇراما قاتارىنان بەس رەسمي ماتچتا جەڭىسكە جەتە الماعان. كوماندا رەسمي كەزدەسۋلەردەگى سوڭعى جەڭىسىنە 2025-جىلعى 10-قازاندا قول جەتكىزدى. سول كۇنى قازاقستان 2026-جىلعى الەم چەمپيوناتىنىڭ ىرىكتەۋ كەزەڭىندە ءوز الاڭىندا ليحتەنشتەيندى 4:0 ەسەبىمەن ۇتقان.
بۇدان بولەك، 2026-جىلعى ناۋرىزدا وتكەن FIFA Series جولداستىق تۋرنيرىندە قازاقستان قۇراماسى كومور ارالدارى مەن ناميبيا كوماندالارىن جەڭدى. ول كەزدە قۇرامانى تالعات بايسۋفينوۆ جاتتىقتىرعان ەدى.