«تازا قازاقستان» - ءبىزدىڭ ءومىر سالتىمىز - پرەزيدەنت
استانا. KAZINFORM - مەملەكەت باسشىسى «تازا قازاقستان» ەكولوگيالىق فەستيۆالىندە ءسوز سويلەدى، دەپ حابارلايدى اقوردانىڭ باسپا ءسوز قىزمەتى.
پرەزيدەنت ءوز سوزىندە بۇگىنگى جيىننىڭ ماڭىزىنا توقتالىپ، «تازالىق» فەستيۆالى وتە تاعىلىمدى ءىس-شارا ەكەنىن ايتتى.
- وسىدان ءبىر جىل بۇرىن ءبارىمىز ءبىر ەل بولىپ «تازا قازاقستان» جوباسىن باستادىق. مەن، ەڭ الدىمەن، وسى جالپىۇلتتىق باستاماعا العاشقى كۇننەن باستاپ بەلسەنە قاتىسىپ جاتقان ءار ازاماتقا شىن جۇرەكتەن ريزاشىلىعىمدى بىلدىرەمىن. اسىرەسە، سولاردىڭ قاتارىندا وزدەرىڭىز سياقتى جالىندى ءارى دارىندى جاستارىمىز وتە كوپ. سىزدەر ەلىمىزدىڭ ءار ايماعىندا ەڭبەك ەتىپ، قوعامدىق جۇمىسقا اتسالىسىپ جۇرسىزدەر. بۇل - ۇلگى بولارلىق ءىس. مەن مەملەكەت باسشىسى رەتىندە سىزدەردى ءاردايىم قولدايمىن! - دەدى قاسىم-جومارت توقايەۆ.
مەملەكەت باسشىسى تازالىقتىڭ ءمانى مەن ماعىناسى جايىنداعى پىكىرىمەن ءبولىسىپ، ويدىڭ دا، بويدىڭ دا، قورشاعان ورتانىڭ دا تازالىعىن ساقتاۋ ءار ادامنىڭ ىشكى مادەنيەتىنىڭ كورسەتكىشى دەپ باعا بەردى. سوندىقتان تازالىق حالقىمىزدىڭ بولمىسىنا سىڭگەن قاسيەت بولۋى قاجەت ەكەنىن ۇنەمى ايتىپ كەلە جاتقانىن ەسكە سالدى.
- تازالىق ءار ادامنان، ءار ۇيدەن، ءاربىر كوشە مەن ءار قالادان باستالۋى كەرەك. ويتكەنى «تازا قازاقستان» ، بۇل - ءبىر كۇندىك ناۋقان ەمەس. بۇل - ءبىزدىڭ ءومىر سالتىمىز. «جاس كەلسە - ىسكە» دەپ حالقىمىز بەكەر ايتپاعان. بارشاڭىزدى تابيعاتتى قورعاۋ يدەياسى بىرىكتىرىپ وتىر. سىزدەر ءبارىڭىز بىرگە ىستەپ جاتقان جۇمىستىڭ ارقاسىندا بۇل يگى باستاما وسىنداي ۇلكەن قوزعالىسقا اينالدى. ورتاق ىسكە كۇش جۇمىلدىرۋ دەگەنىمىز - وسى، - دەدى پرەزيدەنت.
قاسىم-جومارت توقايەۆ ەرىكتىلەردىڭ ەڭبەگىن دە ەرەكشە اتاپ ءوتتى.
ونىڭ ايتۋىنشا، ۆولونتەر بولۋ، ەڭ الدىمەن، ناعىز وتانشىل ازامات بولۋ، ياعني، پاتريوت بولۋ دەگەن ءسوز. سونداي-اق مەملەكەت باسشىسى ەكولوگيانى جاقسارتۋعا كاسىپورىندار مەن كاسىپكەرلەر زور ۇلەس قوسىپ جاتقانىنا توقتالدى. پرەزيدەنت «تازا قازاقستان» اياسىندا وتە اۋقىمدى جۇمىس اتقارىلعانىن، ميلليونداعان توننا قوقىس جينالىپ، كوشەت ەگىلگەنىن تىلگە تيەك ەتتى. بۇل رەتتە «بۇكىل قازاقستاندىق اعاش ەگۋ كۇنى» اكسياسىنىڭ جاقسى داستۇرگە اينالعانىن جەتكىزدى.
- وسى شارا شەڭبەرىندە بۇكىل ەلىمىز بويىنشا سوڭعى ءۇش كۇندە 4,5 ميلليونعا جۋىق كوشەت ەگىلىپ، ورمان القابىمىزدى تولتىردى. اينالامىزدى جيناۋ، اعاش وتىرعىزۋ ارقىلى ءبىز جايلى دا تازا قورشاعان ورتا قالىپتاستىرامىز. بارلىق اۋلا مەن كوشەنى، ساياباق پەن الاڭقايدى ۇقىپتى ۇستاۋ-ءوز قولىمىزدا. تازالىق پەن ءتارتىپ - دۇرىس ءومىر سالتىن ۇستانۋدىڭ باستى كورىنىسى، - دەدى مەملەكەت باسشىسى.
قاسىم-جومارت توقايەۆ تابيعاتتى ايالاۋ، تازالىق مادەنيەتىن ءاربىر ازاماتتىڭ، اسىرەسە، جاس ۇرپاقتىڭ ساناسىنا ءسىڭىرۋ وزەكتى دەپ سانايدى.
- مىسالى، قوقىستى سۇرىپتاۋ، سۋ مەن جارىقتى ۇنەمدەۋ، قوعامدىق ورىندى بۇلدىرمەۋ - اسا ماڭىزدى. بۇل ءبىزدىڭ قوعامنىڭ قالىپتى قاعيداتىنا اينالۋى قاجەت. ەكولوگيالىق اعارتۋ ىسىنە ايرىقشا ءمان بەرگەن ءجون. مۇنى «تازا قازاقستان» كامپانياسىنىڭ نەگىزگى باعىتتارىنىڭ ءبىرى دەۋگە بولادى. ۋاقىت وتكەن سايىن كوپتەگەن ادامداردىڭ قورشاعان ورتانى ايالاۋعا، قورعاۋعا ۇمتىلىپ جاتقانىن كورىپ وتىرمىز. ازاماتتارىمىز ەكولوگيالىق تالاپتاردى ساقتاپ، ونى سانالى تۇردە ءومىر سالتىنا اينالدىرىپ كەلەدى. مەن جاڭا عانا كورمەنى ارالادىم. وندا ەكولوگياعا ءمان بەرگەن كاسىپورىندارىمىزدىڭ جۇمىستارى قويىلعان. ولارعا ريزاشىلىعىمدى بىلدىرەمىن. قوعامدا جاڭا ەكولوگيالىق مادەنيەت قالىپتاسىپ جاتىر. تۇتاس ەلدىڭ سانا-سەزىمى وزگەرە باستادى. جاستارىمىز مۇنى تەرەڭ تۇسىنەدى، - دەدى پرەزيدەنت.
مەملەكەت باسشىسى جاستار ۇسىنعان جوبالارمەن تانىسقانىن جەتكىزىپ، ءار باستامادان تۋعان ەلگە، تابيعاتقا دەگەن قامقورلىق بايقالاتىنىنا نازار اۋداردى.
دانا ەسەنعالي مەن كاميلا قىشقاشبايەۆانىڭ جوبالارىنا توقتالىپ، بۇدان قازاق جاستارىنىڭ جاسامپاز بولمىسى كورىنەتىنىن، ەل مەن جەرگە شىنايى جاناشىرلىعى بىلىنەتىنىن ءمالىم ەتتى. سونىمەن قاتار قازاقستاننىڭ بولاشاعى وسىنداي ساناسى سەرگەك، ويى ۇشقىر جاستاردىڭ قولىندا ەكەنىن باسا ايتتى.
- ءبىزدىڭ قازاقستاننان باسقا وتانىمىز جوق. تۋعان جەرىمىزدى ەشكىم سىرتتان كەلىپ تازالاپ، كوركەيتىپ بەرمەيدى. وتانىمىزدى تازا ۇستاۋ - ءار ازاماتتىڭ قاستەرلى پارىزى. سوڭعى جىلدارى ەلىمىزدە كوپتەگەن ماڭىزدى وزگەرىس بولدى. ادىلەتتى مەملەكەت بولۋ ءۇشىن ءبىز زاڭ مەن تارتىپكە باعىناتىن قوعام قۇرىپ جاتىرمىز. سونداي-اق اۋقىمدى رەفورمالار جۇرگىزىلىپ جاتىر. مۇنىڭ ءبارى، ەڭ الدىمەن، وسكەلەڭ ۇرپاق ءۇشىن، ياعني، سىزدەر ءۇشىن جاسالۋدا. قازاق جاستارىنىڭ بولاشاعى - جارقىن، جولى - اشىق. مەن سىزدەرگە سەنەمىن، زور ءۇمىت ارتامىن! وتانشىل، ءبىلىمپاز، ەڭبەكقور بولىڭىزدار دەپ تىلەيمىن. سوندا قازاقستانىمىز دا ادىلەتتى، تازا، قاۋىپسىز جانە وركەندەگەن وزىق ەل بولماق. بارىڭىزگە ساتتىلىك تىلەيمىن، - دەدى قاسىم-جومارت توقايەۆ.
