تازا بالدى قالاي اجىراتۋعا بولادى
استانا. KAZINFORM -بۇگىن - حالىقارالىق ارالار كۇنى. وسى مەرەكەگە وراي «بۇگىن LIVE» ستۋدياسىنا وسكەمەننەن ارنايى كەلگەن اكە مەن بالا قوناق بولدى.
تالعات احمەتجانوۆ بال ارالار بيزنەسىن باستاۋعا ۇلدارىنىڭ سەبەپ بولعانىن ايتادى.
- ءبىر كۇنى ۇلكەن ۇلىم «ءسابي» قورىنىڭ بايقاۋى تۋرالى جارنامانى كورىپتى. تۇندە ەكى ۇلىم بىزدەن جاسىرىپ، شاعىن 1 مينۋتتىق روليك ءتۇسىرىپ، بايقاۋعا جىبەرىپتى. سولاي قانشاما قاتىسۋشىنىڭ اراسىنان ەكەۋى گرانتتى ۇتىپ الىپتى. ول روليكتە بالدىڭ قانداي پايداسى بار ەكەنىن ايتقان. سودان باستاپ ارا ساتىپ الىپ، سولاردان بال ءوندىرىپ، قازىر ۇلكەن دارەجەگە جەتىپ وتىرمىز. ەڭ العاش باستاعاندا الىس-جاقىن اۋىلداعى شاعىن جارمەڭكەلەرگە قاتىساتىنبىز. كەيىننەن وزگە وڭىرلەرگە شىعا باستادىق، - دەيدى ومارتاشى اكە.
ال ونىڭ ۇلى تاميرلان 10 جاسىنان باستاپ ومارتاشىلىقپەن اينالىسادى. العاشىندا اپكەسى مەن جەزدەسىنىڭ كاسىبىنە كومەكتەسىپ باستاعان ول بىرەر جىلدان سوڭ بار جيعان-تەرگەنىنە ارانىڭ 1 ۇياسىن ساتىپ الىپتى.
- مەن ءوزىم 10 جاسىمنان اعاما كومەكتەسىپ باستادىم. كەيىن 16 جاسىمدا 1 ۇيا ارانى اسىراي باستادىم. اقشامدى جيناپ، سول ۇيانى الدىم. بۇل وتباسىلىق كاسىپ دەسە دە بولادى. قازىرگى ۋاقىتتا اكەم ەكەۋمىز 400 گە جۋىق ارانىڭ ۇياسىن اسىراپ وتىرمىز، - دەيدى تاميرلان احمەتجانوۆ.
قازىر ومارتاشىلار وتباسى جۇزدەگەن ميلليون ارانى اسىرايدى. 400 گە جۋىق ارا ۇياسىن اسىراپ وتىرعان ماماندار مۇنى تابىسى مول كاسىپ دەپ وتىر.
- قازىر ارالار قىستان شىققان، كوكتەمگى ۋاقىت بولعاندىقتان 1 ۇيادا 30-40 مىڭ ارادان بولادى. ال جازدا، گۇلدىڭ توزاڭىن جيناۋدى باستاعان كەزدە ارالاردىڭ سانى كوبەيەدى. ول كەزدە 1 ۇياداعى ارانىڭ سانى ءجۇز مىڭعا دەيىن جەتەدى. جالپى، 1 ارا 1 اي عانا ءومىر سۇرەدى. ول ءوزىنىڭ بۇكىل عۇمىرىندا 1 شاي قاسىق بال وندىرەدى. ال 1 ۇياداعى ارالار 50-60 كەلى بال جينايدى. ماۋسىم كەزىندە شامامەن 10 توننادان ارتىق بال جينالادى، - دەيدى ومارتاشى.
بۇگىندە كاسىپكەرلەر بالدىڭ 10 عا جۋىق ءتۇرىن وندىرەدى. ستۋديا قوناقتارى پايدالى ونىمدەردى ءتۇر-تۇرگە ءبولىپ، قالاي وندىرەتىندەرىن ءتۇسىندىردى.
- ارالاردىڭ بارلىعى ءبىر جەردە تۇرمايدى. ءبىز ولاردى ءارتۇرلى بال جيناۋ ءۇشىن ءارتۇرلى جەرگە قوندىرامىز. ول جەردەگى گۇلدىڭ ءنارى بىتكەننەن كەيىن ارالاردى باسقا جەرگە كوشىرەمىز. ماسەلەن، كۇنباعىس جازدىڭ سوڭىندا گۇلدەيدى. ءبىز ارالارىمىزدى كۇنباعىس القابىنا الىپ بارامىز. ونداعى ارالار تەك قانا كۇنباعىستىق بالىن جينايدى. باسقا ەشقانداي گۇلگە قونبايدى. قازىرگى ۋاقىتتا ەڭ باعالى بالدار - مامىر بالى مەن جوڭىشقا بالى. ولار ەليتالىق بالداردىڭ قاتارىنا جاتادى، - دەيدى ولار.
10 جىلعا جۋىق ۋاقىت بويى ومارتاشىلىقپەن اينالىسىپ كەلە جاتقان تاميرلان احمەتجانوۆ بالدىڭ تازا نە جاساندى ەكەنىن قالاي ايىرۋعا بولاتىنىن ايتىپ بەردى.
- جازعى ۋاقىتتا بالدار سۇيىق بولادى. تازا بالدى قانشالىقتى بيىككە كوتەرسەڭ دە، اعىسى جۇقارىپ كەتسە دە ول ۇزىلمەيدى. ودان كەيىن بالدار قۇيىلعاندا بىردەن باتىپ كەتپەيدى، الدىمەن تاۋ سەكىلدى جينالادى. جانە ءۇشىنشىسى - تازا بالدى قاسىقپەن نە باسقا نارسەمەن ۇرعان كەزدە ول ەشقاشان جان-جاققا شاشىرامايدى، - دەيدى ول.
ايتا كەتەيىك، بۇعان دەيىن «بۇگىن LIVE» باعدارلاماسىنا 76 جاستاعى حورەوگراف قوناق بولىپ، ءوز تاجىريبەسىمەن بولىسكەن ەدى.
