تايسويعاندا كومىرسۋتەكتەردى ىزدەۋ جۇمىستارى جۇرگىزىلەدى

استانا. KAZINFORM - اتىراۋ وبلىسى قىزىلقوعا اۋدانىنىڭ تايسويعان ۋچاسكەلەرىندە كومىرسۋتەكتەردى ىزدەستىرۋ بويىنشا بارلاۋ جۇمىستارى جۇرگىزىلەدى. بۇل جايىندا ءماجىلىس دەپۋتاتتارىنىڭ ساۋالىنا پرەمەر- مينيستر ولجاس بەكتەنوۆتىڭ جاۋابىندا ايتىلعان.

ۇكىمەت باسشىسىنىڭ اتاپ وتۋىنشە، اتالعان ۋچاسكەلەردە بارلاۋ جۇمىستارىنىڭ قورشاعان ورتاعا اسەرى تۋرالى قوعامدىق تىڭداۋلار ءتورت رەت (تايسويعان اۋىلدىق وكرۋگىندە - اعىمداعى جىلعى 19- ماۋسىم، ميالى اۋىلدىق وكرۋگىندە - 20 - ماۋسىم، مۇقىر اۋىلدىق وكرۋگىندە - 24 -ماۋسىم جانە 4 - قازان) وتكىزىلدى. وعان 400 دەن استام جەرگىلىكتى تۇرعىن مەن قوعامدىق بەلسەندىلەر قاتىستى. سونىمەن قاتار بيىل 25 - شىلدەدە ءوڭىردىڭ قوعامدىق بىرلەستىكتەرىنىڭ وكىلدەرى مەن وبلىستىق ءماسليحات دەپۋتاتتارىنىڭ قاتىسۋىمەن دوڭگەلەك ۇستەل ۇيىمداستىرىلدى.

- قورشاعان ورتاعا اسەر ەتۋدىڭ پەرسپەكتيۆالارى تۋرالى ەسەپ وبلىستىق ەكولوگيا دەپارتامەنتىنىڭ ساراپتامالىق كەڭەسىندە دە تىڭدالدى. قوعامدىق تىڭداۋلاردىڭ، دوڭگەلەك ۇستەلدىڭ جانە ەسەپتى تىڭداۋدىڭ قورىتىندىسى بويىنشا وسى جوبانى قولداۋ تۋرالى شەشىم قابىلداندى. وسى جىلعى 14-جانە 19-تامىزدا گەولوگيالىق بارلاۋ جوبالارى بويىنشا وڭ قورىتىندىلار ۇسىنىلىپ، 13-قاراشادا ۋاكىلەتتى ورگان ىزدەۋ ۇڭعىمالارىن بۇرعىلاۋعا ەكولوگيالىق رۇقسات بەردى، - دەدى ولجاس بەكتەنوۆ جاۋابىندا.

6 كومپانياعا كومىرسۋتەكتەر بويىنشا جەر قويناۋىن پايدالانۋ قۇقىعى بەرىلگەنى تۋرالى جازدىق.