تايلاندقا كىرۋ اقىلى بولماق: تۋريستەر قانشا تولەيدى

جاڭا ءتارتىپتى 2027-جىلدان باستاپ كەزەڭ-كەزەڭىمەن ىسكە قوسۋ كوزدەلگەن.

تايلاندتىڭ تۋريزم جانە سپورت مينيسترلىگى شەتەلدىك ساياحاتشىلاردان تۋريستىك الىم الۋ جوباسىن ازىرلەپ جاتىر. قازىرگى ۇسىنىس بويىنشا ونىڭ مولشەرى اۋە، قۇرلىق نەمەسە تەڭىز جولىمەن كەلگەنىنە قاراماستان ءبىر ادامعا 450 بات بولادى. بۇعان دەيىن اۋە ارقىلى كەلگەندەردەن 300 بات، ال قۇرلىق جانە تەڭىز جولىمەن كىرگەندەردەن 150 بات الۋ قاراستىرىلعان ەدى.

جاڭا جۇيەنى بىردەن بارلىق شەكارا بەكەتتەرىندە ەمەس، كەزەڭ-كەزەڭىمەن ەنگىزۋ جوسپارلانعان. الدىمەن الىم اۋە ارقىلى كەلەتىن تۋريستەرگە قولدانىلماق. قولدانىستاعى جوبا بويىنشا بۇل ءتارتىپ ءتيىستى قۇجات Royal Gazette رەسمي باسىلىمىندا جاريالانعاننان كەيىن 180 كۇن وتكەن سوڭ كۇشىنە ەنۋى مۇمكىن. قۇرلىق جانە تەڭىز ارقىلى كىرەتىن تۋريستەر ءۇشىن جۇيە كەيىنىرەك ىسكە قوسىلادى. بيلىك العاشقى كەزەڭدى 2027-جىلى باستاۋدى كوزدەپ وتىر.

الىم نە ءۇشىن قاجەت؟

تايلاند بيلىگىنىڭ تۇسىندىرۋىنشە، جينالعان قاراجات جالپى مەملەكەتتىك بيۋجەتكە ەمەس، تۋريزمدى دامىتۋعا باعىتتالماق. ونىڭ ءبىر بولىگى شەتەلدىك ساياحاتشىلاردىڭ قاۋىپسىزدىگى مەن مەديتسينالىق ساقتاندىرۋىنا جۇمسالادى. قالعان قارجى تۋريستىك نىسانداردى دامىتۋعا، ينفراقۇرىلىمدى جاڭارتۋعا جانە جاڭا تۋريستىك باعىتتاردى قولداۋعا باعىتتالادى.

بيلىكتىڭ ەسەبىنشە، جۇيە تولىق ىسكە قوسىلعان جاعدايدا تۋريستىك قور جىلىنا ميللياردتاعان بات قاراجات جيناي الادى. 2027-جىلى شامامەن 35,4 ميلليون شەتەلدىك تۋريست كەلەدى دەگەن بولجام نەگىزىندە، تەك اۋە جولاۋشىلارىنان الىناتىن الىمنىڭ ءوزى 12 ميلليارد باتتان استام قاراجات اكەلۋى مۇمكىن.

تولەم قالاي الىنادى؟

قازىر بىرنەشە ءتاسىل قاراستىرىلىپ جاتىر. سونىڭ ىشىندە 450 باتتى اۋە بيلەتىنىڭ باعاسىنا قوسۋ، ارنايى رەسمي سايت نەمەسە موبيلدى قوسىمشا ارقىلى تولەۋ، سونداي-اق شەكاراداعى وزىنە-ءوزى قىزمەت كورسەتۋ تەرمينالدارىن پايدالانۋ ۇسىنىلعان. ناقتى تولەم ءتارتىبى جوبا تۇپكىلىكتى ماقۇلدانعاننان كەيىن بەلگىلى بولادى.

سونىمەن بىرگە ءبىر رەت تولەنگەن الىم 30 كۇن ىشىندە بىرنەشە رەت كىرىپ-شىعۋعا مۇمكىندىك بەرۋى مۇمكىن. وسى كەزەڭدە تۋريستكە قاراستىرىلعان ساقتاندىرۋ دا كۇشىندە بولادى. ديپلوماتيالىق جانە قىزمەتتىك پاسپورت يەلەرى، جۇمىس ىستەۋگە رۇقساتى بار شەتەلدىكتەر، ترانزيتتىك جولاۋشىلار جانە ەكى جاسقا تولماعان بالالار سياقتى ءبىرقاتار ساناتتى الىمنان بوساتۋ ۇسىنىلعان.

ايتا كەتەيىك، ازىرگە 450 باتتىق تۋريستىك الىم كۇشىنە ەنگەن جوق. 7-قازاندا جاريالانعان سوڭعى مالىمەت بويىنشا، قوعامدىق تالقىلاۋ اياقتالعانىمەن، ۇسىنىس ۇلتتىق تۋريستىك ساياسات كوميتەتىندە قارالىپ، ودان كەيىن تايلاند ۇكىمەتىنىڭ ماقۇلداۋىنان ءوتۋى ءتيىس. سوندىقتان 2027-جىلعا جوسپارلانعان مەرزىم وزگەرۋى دە مۇمكىن.

ايتا كەتەيىك، قازاقستاندىقتار يندونەزياعا ۆيزاسىز بارا الادى.