تاياۋ شىعىستاعى سوعىس جاعدايىندا مۇناي باعاسى ءوستى
يزرايل مەن گازاداعى جاعداي تاياۋ شىعىستاعى وندىرىسكە كەدەرگى كەلتىرۋى مۇمكىن دەگەن قاۋىپتەن دۇيسەنبى كۇنى مۇناي باعاسى %4 عا قىمباتتادى، دەپ حابارلايدى Kazinform اگەنتتىگى بۇل تۋرالى BBC جاڭالىقتارىنا سىلتەمە جاساپ.
West Texas Intermediate (WTI) مۇنايىنىڭ باعاسى باررەلىنە 86 دوللاردان استى. Brent ماركالى مۇناي باعاسى دا ازيالىق ساۋدا-ساتتىق باسىندا كوتەرىلدى.
يزرايل مەن پالەستينا اۋماقتارى مۇناي ءوندىرۋشى ەلدەر قاتارىندا ەمەس. دەگەنمەن، تاياۋ شىعىس ايماعى جاھاندىق جەتكىزۋدىڭ ۇشتەن ءبىر بولىگىن قۇرايدى. حاماستىڭ سەنبى كۇنى يزرايلگە جاساعان شابۋىلى — ەكى جاقتىڭ سوڭعى ونجىلدىقتاعى ەڭ ۇلكەن شيەلەنىسۋى بولدى.
«مۇناي باعاسى ءىرى مۇناي ءوندىرۋشى يران مەن ساۋد ارابياسى ەلدەرىنە تاراۋى مۇمكىن اۋقىمدى قاقتىعىستاردىڭ ىقتيمالدىعى سالدارىنان ءوسىپ جاتىر»، - دەدى ەنەرگەتيكا جونىندەگى ساراپشى ساۋل كاۆونيچ BBC News-كە.
كاۆونيچتىڭ پايىمداۋىنشا، ماڭىزدى مۇناي ساۋدا جولى - ورمۋز بۇعازى جابىلاتىن بولسا، الەم بويىنشا مۇناي جەتكىزۋدىڭ بەستەن ءبىر بولىگى توقتاپ قالادى. ورمۋز بۇعازى ەكونوميكاسى مۇناي مەن گاز وندىرۋگە نەگىزدەلگەن پارسى شىعاناعى ايماعىنداعى ءىرى مۇناي ەكسپورتتاۋشىلار ءۇشىن وتە ماڭىزدى.
الداعى كۇندەرى وقيعالاردىڭ قالاي وربيتىندىگىنىڭ بەيمالىم بولۋى ا ق ش- تىڭ قازىناشىلىق وبليگاتسيالارىنا جانە داعدارىس كەزىندە ينۆەستورلار ساتىپ العان دوللارعا ينۆەستيتسيالاردى ىنتالاندىرۋى مۇمكىن، دەيدى HSBC بانكىنىڭ ساراپشىسى دجەيمس چەو.
مۇناي باعاسى وسى جىلدىڭ مامىر ايىندا باررەلىنە 70 دوللاردان ءسال عانا اسىپ ءتۇستى، ءبىراق وندىرۋشىلەر نارىقتى قولداۋ ءۇشىن ءوندىرىستى شەكتەۋگە تىرىسقاندىقتان، سودان بەرى تۇراقتى تۇردە كوتەرىلدى.
ءىرى مۇناي ءوندىرۋشى ساۋد ارابياسى شىلدە ايىندا ءوندىرىستى تاۋلىگىنە ميلليون باررەلگە قىسقارتاتىنىن مالىمدەدى. مۇناي ءوندىرۋشى ەلدەر توبىنداعى وپەك+ باسقا مۇشەلەرى دە باعانىڭ تومەندەۋىنە قولداۋ كورسەتۋ ماقساتىندا ءوندىرىستى قىسقارتۋدى جالعاستىرۋعا كەلىستى. وپەك+ مۇشەلەرىنىڭ الەمدىك شيكى مۇناي وندىرىسىندەگى ۇلەسى شامامەن %40 دى قۇرايدى. ونىڭ شەشىمدەرى مۇناي باعاسىنا ۇلكەن اسەر ەتۋى مۇمكىن.
