پەنتاگونداعى كيبەرشابۋىل: 3 ميلليون ادامنىڭ دەرەگى اشىلىپ قالدى

بۇل تۋرالى ا ق ش قورعانىس ۆەدومستۆوسىنىڭ وكىلى حابارلادى.

شابۋىل قورعانىس مينيسترلىگىنىڭ اسكەري قىزمەتشىلەر مەن ازاماتتىق قىزمەتكەرلەر تۋرالى دەرەكتەردى ساقتايتىن قورعانىس كادرلىق دەرەكتەر ورتالىعىنا (DMDC) قاتىستى بولعان. الدىن الا مالىمەت بويىنشا، 2,76 ميلليون ءتىرى ادام مەن شامامەن 294 مىڭ قايتىس بولعان ادامنىڭ دەرەكتەرى بۇزىلعان.

اشكەرەلەنگەن اقپاراتتىڭ ىشىندە الەۋمەتتىك ساقتاندىرۋ نومىرلەرى، تۋعان كۇندەر، تولىق اتى-جوندەر، بايلانىس دەرەكتەرى جانە اسكەري قىزمەتشىلەردىڭ ماماندىقتارى تۋرالى مالىمەتتەر بولعان.

كيبەرشابۋىلشىلار دەرەكتەر الماسۋعا ارنالعان سەرۆەرگە رۇقساتسىز قول جەتكىزگەن. اقپاراتتىڭ قاۋىپسىزدىگىنە نۇقسان كەلگەن كەزەڭ 2025-جىلعى قازاننان 2026 -جىلعى شىلدەگە دەيىن سوزىلعانى حابارلاندى. قورعانىس ۆەدومستۆوسى جۇيەدەگى وسالدىقتى 16-شىلدەدە انىقتاعان.

قورعانىس مينيسترلىگى وقيعاعا بايلانىستى تەرگەۋ جۇرگىزىپ، زارداپ شەككەن ادامدارعا جەكە باسىن قورعاۋ جانە كرەديتتىك مونيتورينگ قىزمەتتەرىن ۇسىنۋدا.

كيبەرقاۋىپسىزدىك ماماندارى اسكەري قىزمەتشىلەرگە قاتىستى جەكە دەرەكتەردىڭ جاريا بولۋى قوسىمشا ءقاۋىپ تۋدىرۋى مۇمكىن ەكەنىن اتاپ وتىر. اتاپ ايتقاندا، مۇنداي مالىمەتتەردى باسقا اشىق دەرەككوزدەردەگى اقپاراتپەن بىرىكتىرۋ ارقىلى ادامدار تۋرالى الدەقايدا تولىق پروفيل جاساۋعا بولادى.

بۇل وقيعا ا ق ش مەملەكەتتىك ورگاندارىنا قاتىستى سوڭعى ۋاقىتتاعى ءىرى دەرەكتەردىڭ سىرتقا شىعۋ جاعدايلارىنىڭ ءبىرى بولدى. سول كەزەڭدە ا ق ش فەدەرالدىق تەرگەۋ بيۋروسىنىڭ جۇمىسقا قابىلداۋ پورتالىنا قاتىستى تاعى ءبىر دەرەكتەردىڭ بۇزىلۋى بويىنشا تەرگەۋ باستالعانى حابارلانعان.

ايتا كەتەيىك، لاتۆيادا اۋقىمدى كيبەرشابۋىل جاسالىپ، 1,2 ميلليون ادامنىڭ دەرەگى تارادى.

ال فرانسيادا كيبەرشابۋىلدان زارداپ شەككەن 678 مىڭ ادامعا حابارلاما جىبەرىلگەنىن جازدىق.