تەاترلاندىرىلعان قويىلىم، اكۋلانىڭ ءتىسى: ۇكىمەت مۇشەلەرىنە 8-ناۋرىزدا جاسالعان ەرەكشە سىيلىقتار
استانا. KAZINFORM - حالىقارالىق ايەلدەر مەرەكەسى كۇنى ەرلەر قاۋىمى نازىك جاندارعا ەرەكشە كوڭىل ءبولىپ، سىيلىق جاسايدى.
بىرەۋ اناسىن، ەكىنشىسى جۇبايىن، كەلەسى بىرەۋ قىزىن بارىنشا قۋانتقىسى كەلەدى. وسى مەرەكە قارساڭىندا Kazinform اگەنتتىگىنىڭ تىلشىلەرى مينيسترلەر مەن كۆازيمەملەكەتتىك ۇيىم باسشىلارىنان العان جانە جاساعان ەرەكشە سىيلىعى تۋرالى سۇراعان ەدى.
عىلىم جانە جوعارى ءبىلىم مينيسترلىگىنىڭ باسشىسى ساياسات نۇربەك جۇبايىنا تاۋىپ العان اكۋلانىڭ ءتىسىن سىيلاپتى.
«وزدەرىڭىز بىلەتىندەي، قازاقستاننىڭ باتىسىندا بۇرىن ۇلكەن تەتيس مۇحيتى بولعان. اكۋلانىڭ تىسىنە قازىر 2,5 ميلليون جىل، ول وتە جاقسى ساقتالعان. ونى جۇبايىما عىلىممەن اينالىساتىن ادام رەتىندە بەردىم. باسىندا ول ازداپ رەنجىدى، ءبىراق مەن سىيلىقتىڭ قۇندىلىعىن تۇسىندىرگەنىمدە، وكپەسى باسىلدى. بۇل جولى مەن جۇبايىمدى تاڭعالدىرامىن، ويتكەنى مەن كۇنى بويى (8-ناۋرىزدا) ۇيدە بولامىن. سەبەبى ءبىز قازىر دەمالىسسىز جۇمىس ىستەيمىز، وسى ۋاقىت ىشىندە بىزدە بىردە- ءبىر دەمالىس بولعان جوق. جۇبايىم ماعان «ۇيدە بول، مەن ءۇشىن سول ەڭ ۇلكەن سىيلىق» دەپ ايتادى»، - دەدى مينيستر.
وقۋ- اعارتۋ ءمينيسترى عاني بەيسەمبايەۆ مەرەكەلىك وتباسىلىق ءداستۇرى تۋرالى ايتىپ بەردى.
«جىل سايىن 8-ناۋرىزدا جۇبايىما ءۇي شارۋاسىنا كومەكتەسەمىن، داستارقان جايىپ، مەرەكەلىك پالاۋ پىسىرەمىن. بۇل تاعامدى مەنىڭ وتباسىم ەرەكشە جاقسى كورەدى. مەنىڭ بەس بالام جانە ەكى نەمەرەم بار. بۇل كۇنى ءبارىمىز بىرگە ايەلىمدى، انامىزدى جانە اجەمىزدى مەرەكەسىمەن قۇتتىقتاپ، وتباسىلىق جايلىلىق سىيلايمىز»، - دەپ ءبولىستى ۆەدومستۆو باسشىسى.
اتالعان مەرەكەنى قارسى الۋدا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆتىڭ دە ءوز ءداستۇرى بار ەكەن.
«ادەتتەگىدەي 8-ناۋرىزدا مەن جۇبايىما گۇل سىيلايمىن، بۇل داستۇرگە اينالدى. ءبىزدىڭ جاستىق شاعىمىزدا ەرەكشە سىيلىق جاساپ، بىرىنەن ءبىرى وزىپ تاڭعالدىرۋ دەگەن بولعان جوق. ەڭ باستىسى - وتباسىمەن بىرگە بولۋ جانە كوڭىل ءبولۋ. وسى ءساتتى پايدالانىپ، جۇبايىما العىس ايتقىم كەلەدى جانە ەلىمىزدىڭ ايەلدەر قاۋىمىن مەرەكەسىمەن قۇتتىقتايمىن. ولارعا ايەل باقىتىن، اماندىق پەن زور دەنساۋلىق تىلەيمىن»، - دەدى مينيستر.
ادىلەت ءمينيسترى ازامات ەسقارايەۆ «8-ناۋرىز مەرەكەسىنە (اناڭىزعا، جۇبايىڭىزعا، اپكە-قارىنداسىڭىزعا، قىزىڭىزعا) قانداي ەرەكشە سىيلىق جاسادىڭىز؟» دەگەن ساۋالعا قىسقا عانا جاۋاپ بەردى.
«8-ناۋرىزدا انام مەن قىزدارىما قىزعالداق سىيلايمىن»، - دەدى ول.
تاعى ءبىر ەرەكشە سىيلىق مادەنيەت جانە اقپارات ءمينيسترى ايدا بالايەۆاعا جاقىندارىنان بۇيىرىپتى.
«سىيلىق العان جاقسى. ال شىن جۇرەكتەن جاسالعان سىيلىق، بارىنەن قىمبات. مەنىڭ 40 جىلدىق مەرەيتويىمدا تۋىستارىم مەن بالالارىم «ايدا» تەاترلاندىرىلعان قويىلىمىن كورسەتتى. ءبىر قىزىعى، ولاردىڭ ەشقايسىسى حورەوگرافيا، دراماتۋرگيامەن اينالىسپايدى، ياعني ولار ونەر سالاسىندا جۇمىس ىستەمەيدى. مەن ءۇشىن ارنايى دايىندالىپ، ساحنالادى. قويىلىم كەرەمەت جارقىن ءارى ۇمىتىلماس بولىپ شىقتى»، - دەدى مينيستر.
«قازپوشتا» ا ق باسقارما ءتوراعاسى اسەل جاناسوۆا ءۇشىن 8-ناۋرىزدا بالالارىنىڭ قولدان جاساعان گۇلدەن ارتىق سىيلىق جوق ەكەن.
«مەنىڭ ۇلدارىمنىڭ ءتۇرلى ءتۇستى قاعازدان جاساعان راۋشان گۇل شوقتارىن ەرەكشە ايتىپ وتكىم كەلەدى. سۇيىسپەنشىلىكپەن ءارى قولدان جاسالعان. ونداي ساتتە ءوزىڭدى الەمدەگى ەڭ باقىتتى ادام سەزىنەسىڭ»، - دەپ ءبولىستى ەلىمىزدىڭ باس پوشتاشىسى.
اۆتور
داۋلەت ىزتىلەۋ
