دەپۋتات: «حالىقتىق قۇرىلىس» جوباسى پايدا تاباتىن ناۋقانعا اينالماۋ كەرەك

دەپۋتاتتىڭ ايتۋىنشا، باستاما حالىقتىڭ تۇرمىس ساپاسىن جاقسارتىپ، وڭىرلەردەگى ينفراقۇرىلىم ماسەلەلەرىن شەشۋگە باعىتتالعان. وسى ماقساتتا اۋىز سۋمەن قامتۋ، كارىز جۇيەسىن دامىتۋ، جولداردى جوندەۋ، اۋىلداردى گازبەن قامتاماسىز ەتۋ جانە تۇرعىن ءۇي- كوممۋنالدىق شارۋاشىلىقتى جاڭعىرتۋ جوسپارلانعان. سونىمەن قاتار 70 كە جۋىق دەنساۋلىق ساقتاۋ نىسانى، 50 گە جۋىق ءبىلىم بەرۋ، سپورت جانە مادەنيەت مەكەمەسى سالىنباق.

جوبالاردى ىسكە اسىرۋ ءۇشىن جىل سوڭىنا دەيىن مەملەكەتتىك كوميسسيا قۇرىلىپ، اۋىل- ايماقتاعى وزەكتى ماسەلەلەردىڭ ءتىزىمى جاساقتالادى. بۇل جۇمىسقا وڭىرلەردەن سايلانعان دەپۋتاتتار دا قاتىسىپ، جەرگىلىكتى قاجەتتىلىكتەردى ەسكەرۋگە اتسالىسادى. ولجاس قۇسپەكوۆتىڭ سوزىنشە، نەگىزگى ماسەلەلەردى 2029- 2030 -جىلدارعا دەيىن شەشۋ كوزدەلىپ وتىر.

- باستامانىڭ ناتيجەلى جۇزەگە اسۋى ءۇشىن وڭىرلەردەن سايلانعان دەپۋتاتتار، وبلىس اكىمدىكتەرى مەن قۇرىلىس كومپانيالارى بىرلەسىپ جۇمىس ىستەۋى كەرەك، - دەدى ول.

وسى رەتتە دەپۋتات جەرگىلىكتى قۇرىلىس كومپانيالارىن جوبالارعا تارتۋ ماڭىزدى ەكەنىن اتاپ ءوتتى. ونىڭ پىكىرىنشە، بۇل وڭىرلىك كاسىپورىنداردىڭ تاجىريبە جيناقتاپ، بولاشاقتا ءوز بەتىنشە ينۆەستيتسيا سالۋىنا مۇمكىندىك بەرەدى. سونىمەن بىرگە قۇرىلىس ساپاسىن باقىلاۋ، مەردىگەرلەردىڭ جاۋاپكەرشىلىگىن ارتتىرۋ جانە قىسقا مەرزىمگە عانا قۇرىلىپ، كەيىن جۇمىسىن توقتاتاتىن كومپانيالارعا جول بەرمەۋ قاجەت. ول ءۇشىن ليتسەنزيا بەرۋ مەن قۇرىلىس جۇمىستارىن قاداعالاۋ جۇيەسىن جەتىلدىرۋ ماڭىزدى.

- ءار قۇرىلىستىڭ ءوز مەرزىمى بار. ءبىر جىلدان كەيىن حالىقپەن كەزدەسىپ، ەلدى ارالايمىز. توقتاپ قالعان نەمەسە ماسەلەسى بار نىسانداردىڭ جاعدايىن تەكسەرەمىز. ەڭ باستىسى، بۇل باستاما ۋاقىتشا، پايدا تاباتىن ناۋقانعا اينالماي، حالىقتىڭ يگىلىگىنە قىزمەت ەتۋى كەرەك، - دەدى ولجاس قۇسپەكوۆ.