تاسىمالداۋشىلارعا جاڭا تالاپ ەنگىزىلەدى

استانا. KAZINFORM -ەندىگى جەردە قازاقستاندىق تاسىمالداۋشىلار ءۇشىن شەتەلدىك رۇقسات بلانكىلەرىن الۋ ءتارتىبى وزگەرەدى.

جاڭا تالاپتارعا سايكەس، اشىقتىق ماسەلەسى رەتتەلىپ، نارىقتا تاسىمالدانعان ونىمدەردىڭ باعاسى ارزانداۋى مۇمكىن.

ورتالىق كوممۋنيكاتسيالار قىزمەتىندە وتكەن بريفينگتە كولىك مينيسترلىگى اۆتوموبيل كولىگى جانە كولىكتىك باقىلاۋ كوميتەتىنىڭ ءتوراعاسى التاي ءالى جاڭاشىلدىقتىڭ جاي-جاپسارىن ءتۇسىندىرىپ بەردى.

- بۇرىندارى تاسىمالداۋشىلارعا رۇقسات بلانكىلەرىن قولدانۋعا 100 كۇن ۋاقىت بەرىلەتىن. مەرزىمى اياقتالار كەزدە ولار قولدانىلماعان بلانكىنى ساتا باستايدى. رۇقسات قاعازى تاپ-تازا، ياعني، وزگە تاسىمالداۋشى قولدانا الادى. وسىلايشا، مۇنى كاسىپكە اينالدىرعان دەلدالدار پايدا بولا باستادى. ەندىگى جەردە تاسىمالداۋشىعا شەتەلگە تاسىمالدايتىن جۇگى دايىن بولعان كەزدە عانا رۇقسات قاعازى بەرىلەدى. بۇرىنعىداي تازا كۇيىندە ەمەس. جۇك كولىكتىڭ ءنومىرى، وزگە دە مالىمەتتەر جازىلادى. وسىلايشا، ەكىنشى تاراپقا ساتۋدىڭ جولى كەسىلەدى. قالا بەردى، كەدەندىك بەكەتتەردەن «بۇركىت» جۇيەسى ارقىلى جۇك كولىگىنىڭ شەكارادان وتكەنى تۋرالى اقپارات الامىز. ەرەجە بۇزعاندار 6 اي بويى تاسىمالداۋشى قۇقىعىنان ايىرىلادى. بۇدان كەيىن تاعى ءتارتىپ بۇزاتىن بولسا ءومىر باقي شەتەلگە جۇك تاسىمالداي المايدى،- دەدى التاي ءالى.

جاڭا ەرەجەگە سايكەس، رەسىمدەلگەن اۆتوكولىكتىڭ ق ر اۋماعىنان شىعۋى ءۇشىن تۋرا 30 كۇن ۋاقىت بەرىلەدى. قازاقستانعا ورالعاننان كەيىن 30 كۇن ىشىندە قۇجاتتاردى كولىكتىك باقىلاۋ ينسپەكتسياسىنا تاپسىرۋ قاجەت.

ايتپاقشى، رۇقسات بلانكىلەرىن الۋ ءتارتىبىنىڭ جەڭىلدەۋى جۇك تاسىمالداۋ ۋاقىتىن ازايتىپ، وزگە دە كەدەرگىلەردى جويىپ، سايكەسىنشە تاسىمالدانعان ونىمدەردىڭ باعاسىنىڭ ارزانداۋىنا اسەرىن تيگىزۋى مۇمكىن.

ايتا كەتەيىك، قازاقستان 42 ەلمەن حالىقارالىق تاسىمالداۋدى جۇزەگە اسىرادى. ءار ەلدە بارلىق ەرەجە كورسەتىلگەن ۇكىمەتارالىق كەلىسىم بار. 2022 -جىلى 155 مىڭ بلانكى الىنىپ، ونىڭ %45 ى عانا پايدالانىلعان. 2023 -جىلى 270 مىڭ بلانكى %67 قولدانىلعان.

اۆتور

ورالحان قوجانوۆ