تاسقىننان زارداپ شەككەن ايماقتارداعى بالالار جازعى بەلسەندى دەمالىسپەن قامتىلادى

үкімет
Фото: primeminister.kz

استانا. KAZINFORM - ايماقتاردا بالالاردىڭ جازعى دەمالىسىن ۇيىمداستىرۋ شارالارى اياقتالدى. بۇل تۋرالى ق ر پرەمەر-ءمينيسترىنىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەستەردە وبلىس اكىمدەرىنىڭ ورىنباسارلارى باياندادى.

بيىل 3 ميلليوننان اسا بالانى بەلسەندى جازعى دەمالىسپەن قامتۋ جوسپارلانعان. وقۋشىلار ءۇشىن 10 مىڭنان اسا لاگەر قىزمەت كورسەتپەك. بالالارعا دەمالىستان بولەك جاس ەرەكشەلىكتەرىنە قاراي ءتۇرلى تانىمدىق شارالاردىڭ ۇيىمداستىرىلۋى بيىلعى جاز مەزگىلىنىڭ باستى وزگەشەلىگى بولماق.

باستاۋىش سىنىپ وقۋشىلارىنىڭ جان-جاقتى دامۋى ءۇشىن مەكتەپ جانىنداعى لاگەرلەر جۇمىس ىستەمەك. ودان بولەك، ءار ءتۇرلى تانىمدىق شارالار قاراستىرىلىپ وتىر. ماسەلەن، اتىراۋ وبلىسىندا «Kids university» جوباسى شەڭبەرىندە بالالار ۋاقىتشا «ستۋدەنتتىك بيلەت» الىپ، بىرنەشە كۇن ەرەكشە ساباقتار ارقىلى عىلىم الەمىنە بويلاماق.

ورتا سىنىپ وقۋشىلارىنا ەكسكۋرسيالىق-تۋريستىك باعدارلامالار ۇسىنىلاتىن بولادى. بالالار تۋعان ولكەسىنىڭ تاريحي، مادەني مۇرالارىمەن تانىسۋ مۇمكىندىگىنە يە بولادى.

مىسالى، سولتۇستىك قازاقستان وبلىسى اۋىل مەكتەپتەرىنىڭ وقۋشىلارى ءۇشىن پەتروپاۆل قالاسىنا ساپارلارى ۇيىمداستىرىلادى. مۇندا ولارعا شاھاردىڭ كورنەكى ورىندارى كورسەتىلىپ، تاريحي ەسكەرتكىشتەر مەن مۇراجايلارعا تانىمدىق ساياحاتتار قاراستىرىلادى.

شىعىس قازاقستان وڭىرىندە بالالارعا «قوناقجاي وتباسى» جوباسى ۇسىنىلادى. ونىڭ اياسىندا نيەت بىلدىرگەندەر قازاق ءتىلىن مەڭگەرۋگە جانە ايماقتىڭ اسەم تابيعاتى مەن مادەنيەتىمەن تانىسۋعا مۇمكىندىك الادى. جوباعا قاتىسۋشىلار 20 كۇن بويى اۋىلدىق ەلدى مەكەندەردەگى وتباسىلاردا تۇراتىن بولادى.

جوعارى سىنىپ وقۋشىلارى ءۇشىن كوللەدج بەن جوعارى وقۋ ورىندارى بازاسىندا مامانداندىرۋ باعىتىنداعى ءبىرقاتار شارا جۇزەگە اسىرىلادى.

وقۋ-اعارتۋ مينيسترلىگىنىڭ دەرەگىنشە، الەۋمەتتىك جاعىنان از قامتىلعان وتباسىلاردان شىققان بالالاردىڭ %94 قامتىلاتىن بولادى.

سۋ تاسقىنى سالدارىنان زارداپ شەككەن ايماقتاردىڭ بالالارى ەرەكشە نازاردا بولادى. تاسقىن باستالعان كەزدەن باستاپ 614 بالا وقۋ-ساۋىقتىرۋ ورتالىقتارىندا بولعان. قازىرگى تاڭدا ول نىسانداردا 629 بالا دەمالىپ جاتىر. جازعى دەمالىس كەزىندە 3833 بالانى دەمالىس جانە ساۋىقتىرۋ شارالارىمەن قامتۋ جوسپارلانعان.

«وقۋ-اعارتۋ مينيسترلىگى ايماقتارداعى وڭ تاجىريبەلەردىڭ كەڭىنەن تارالۋىن قولعا الۋى ءتيىس. شارالاردى ۇيىمداستىرۋ كەزىندە بالالاردىڭ قاۋىپسىزدىگىنە باسا ءمان بەرىلگەنى ءجون. بۇگىندە دەمالىس، ساۋىقتىرۋ ورىندارىن تەكسەرۋ جانە قابىلداۋ كەستەسى بەكىتىلگەن. ونىڭ ساقتالۋىن مۇددەلى مەملەكەتتىك ورگاندار مەن ءوڭىر اكىمدىكتەرى تۇراقتى باقىلاۋدا ۇستاۋى قاجەت»، - دەپ اتاپ ءوتتى تامارا دۇيسەنوۆا.

سوڭعى جاڭالىقتار