تاسقىننان قىرىلعان 11,5 مىڭ مالدىڭ 13 پايىزىن وزگە شارۋالار مالداي وتەپ بەرگەن
استانا. KAZINFORM - تاسقىندا قىرىلعان مال 100 پايىز وتەلدى. اۋىل شارۋاشىلىعى مال شىعىنى قانداي تاسىلدەرمەن وتەلگەنىن ءتۇسىندىردى.
- جەرگىلىكتى اتقارۋشى ورگاندارىڭ اقپاراتىنا سايكەس بيىل كوكتەمگى سۋ تاسقىنىنىڭ سالدارىنان ولگەن اۋىل شارۋاشىلىعى جانۋارلارى سانى 13428 باس بولدى، - دەپ جازىلعان جاۋاپتا.
ونىڭ ىشىندە 4750 سيىر، 5134 قوي-ەشكى، 2233 جىلقى، 34 تۇيە سۋعا كەتكەن. سونداي-اق 249 شوشقا مەن 1028 قۇس ولگەن.
- بۇگىنگى تاڭدا 7 وبلىستا 11543 باس اۋىل شارۋاشىلىعى جانۋارىنىڭ وتەمىنە 2 ميلليارد 886,1 ميلليون تەڭگە تولەنگەن. ال اقمولا، قاراعاندى جانە باتىس قازاقستان وبلىستارىندا 1885 باس اۋىل شارۋاشىلىعى جانۋارى فەرمەرلىك جانە شارۋا قوجالىقتارىنىڭ الەۋمەتتىك كومەك (دەمەۋشىلىك) كورسەتۋى ەسەبىنەن ناتۋرالدى تۇردە (مالمەن) وتەلدى. اقشالاي وتەلگەن شىعىن جەرگىلىكتى بيۋدجەتتەن جانە بيۋدجەتتەن تىس قارجىمەن تولەندى. جالپى شىعىن %100 وتەلدى، - دەپ جازادى ۆەدومستۆو ماماندارى.
